ខេត្តសៀមរាប ៖ បុរសជាឪពុកម្នាក់សង្ស័យស្រវឹងស្រាបាននាំកូនស្រី២នាក់ទៅដកព្រលឹតនៅស្រះខាងក្រោយផ្ទះ លុះពេលចុះទៅដកព្រលឹតបាន១ដើមក្នុងទឹកស្រះ ស្រាប់តែបុរសជាឪពុកបានធ្វើជាលង់ទឹកឱ្យកូនៗមើល បន្ទាប់ពីមិនឃើញឪពុកងើបមកវិញ កូនៗក៏រត់ទៅប្រាប់ម្តាយ និងអ្នកជិតខាងឱ្យមកជួយដែរ ប៉ុន្តែបុរសរងគ្រោះបានលង់ទឹកបាត់បង់ជីវិតទៅហើយ ។
ហេតុការណ៍ខាងលើនេះបង្កការភ្ញាក់ផ្អើលបានកើតឡើងកាលពីវេលាម៉ោង១០និង៤០នាទីព្រឹកថ្ងៃទី២១ ខែសីហា ឆ្នាំ២០២០ ស្ថិតចំណុចស្រះទឹកក្រោយផ្ទះជនរងគ្រោះ ក្នុងភូមិប្រិយ៍ ឃុំខ្នារសណ្តាយ ស្រុកបន្ទាយស្រី ខេត្តសៀមរាប។
ជនរងគ្រោះម្នាក់ដែលបាត់បង់ជីវិតខាងលើឈ្មោះ ព្រះ វៀច ភេទប្រុស អាយុ៤៨ឆ្នាំ មានប្រពន្ធឈ្មោះ សាន សុវ៉ាត អាយុ៤៩ឆ្នាំ មានកូនចំនួន៦នាក់ (ប្រុស៣នាក់ និងស្រី៣នាក់) ។ គ្រួសារនេះរស់នៅក្នុងភូមិឃុំកើ់តហេតុខាងលើ ។
បើតាមការបញ្ជាក់ពីលោកវរសេនីយ៍ឯក ឡុង សំណាង អធិការនគរបាលស្រុកបន្ទាយស្រីបានឱ្យដឹងនៅវេលាម៉ោង៥ល្ងាចថ្ងៃទី២១ ខែសីហា ឆ្នាំ២០២០ កន្លងទៅនេះថា មុនពេលកើតហេតុ ជនរងគ្រោះបាននាំកូនស្រីចំនួន២នាក់ទៅដកព្រលឹតខាងក្រោយផ្ទះចម្ងាយប្រហែលជា៣០០ម៉ែត្រពីផ្ទះ នៅពេលដកព្រលឹតបាន១ដើម ស្រាប់តែជនរងគ្រោះធ្វើជាលង់ទឹកឱ្យកូនស្រីទាំងពីរមើល លុះមិនឃើញឪពុកងើបមកវិញ កូនៗទាំង២នាក់ក៏រត់ទៅប្រាប់ម្តាយនិងអ្នកជិតខាងឱ្យមកជួយ ប៉ុន្តែជនរងគ្រោះបានលង់ទឹកស្រះបាត់បង់ជីវិតទៅហើយ ។
បន្ទាប់ពីកើតហេតុ កម្លាំងជំនាញបានពិនិត្យសពជនរងគ្រោះ រួចសន្និដ្ឋានថា ជនរងគ្រោះពិតជាបាត់បង់ជីវិតដោយសារលង់ទឹកប្រាកដមែន ពុំមានជាប់ពាក់ព័ន្ធករណីអ្វីផ្សេងឡើយ ។
បច្ចុប្បន្ន សពជនរងគ្រោះត្រូវបានកម្លាំងនគរបាលជំនាញប្រគល់ឱ្យក្រុមគ្រួសារយកទៅធ្វើបុណ្យតាមប្រពៃណី៕ (កែសម្រួលដោយ ៖ ធីតា)
ចែករំលែកព័តមាននេះ