ខេត្តសៀមរាប ៖ កម្លាំងអធិការរដ្ឋាននគរបាលស្រុកពួកបានសហការជាមួយកងរាជអាវុធហត្ថស្រុកធ្វើការឃាត់រថយន្ត និងអ្នកបើកបរចំនួន២នាក់ ដែលសង្ស័យមានដឹកឈើគ្រញូង ខណៈពេលនោះកម្លាំងយើងបានឆែកឃើញមានប្រហែល៦១១គីឡូក្រាម រួចប្រគល់ឱ្យមន្ត្រីរដ្ឋបាលព្រៃឈើយកទៅធ្វើការសួរនាំ និងចាត់ការបន្ត ទៅតាមនីតិវិធីច្បាប់ស្តីពីរដ្ឋបាលព្រៃឈើ ។
ហេតុការឃាត់ខ្លួនអ្នកបើកបរ និងរថយន្តដឹកឈើនោះបានធ្វើឡើងនៅវេលាម៉ោង២និង៣០នាទីរសៀល ថ្ងៃទី២២ ខែសីហា ឆ្នាំ២០២០ ខណៈកំពុងចុះត្រួតពិនិត្យសន្តិសុខនៅលើផ្លូវជាតិលេខ(៦) ត្រង់ចំណុចភូមិគោកជួន ឃុំពួក ស្រុកពួក ខេត្តសៀមរាប ។
លោកវរសេនីយ៍ឯក ទេព ពុំសែន អធិការនគរបាលស្រុកពួកបានប្រាប់នៅល្ងាចថ្ងៃទី២២ ខែសីហា ឆ្នាំ២០២០នេះថា ជនសង្ស័យទាំង២នាក់មានទី១- ឈ្មោះ ស៊ុយ ប៊ុនហុង ភេទប្រុស អាយុ២៤ឆ្នាំ នៅស្រុកត្រាំកក់ ខេត្តតាកែវ បើករថយន្តម៉ាក vistoពាក់ផ្លាកលេខភ្នំពេញ2U. 3370 និងទី២-ឈ្មោះ សល់ វី ភេទប្រុសអាយុ៤០ឆ្នាំ ទីលំនៅបច្ចុប្បន្នស្រុកមុខកំពូល ខេត្តកណ្ដាល បើករថយន្តម៉ាកកូរ៉េ ពាក់ផ្លាកលេខតាកែវ2A.1456 ដោយមានការកែច្នៃដឹកឈើប្រភេទគ្រញូង និងដាក់សត្វទាពីលើ ។
លោកបានបញ្ជាក់ថា បន្ទាប់ពីធ្វើការឃាត់ខ្លួនយកមកសួរនាំ រួចជនសង្ស័យបានឆ្លើយសារភាពថា រូបគេទាំង២នាក់ ពិតជាបានដឹកឈើគ្រញូងចេញពីស្រុកក្រឡាញ់ទៅកាន់រាជធានីភ្នំពេញដោយស៊ីឈ្នួលគេ ។ លោកបានបញ្ជាក់បន្ថែមទៀតថា ជនសង្ស័យទាំងពីរនាក់ និងវត្ថុតាងពាក់ព័ន្ធបានប្រគល់ជូនខណ្ឌរដ្ឋបាលព្រៃឈើសៀមរាប អស់ហើយ ។
បច្ចុប្បន្នជនសង្ស័យទាំងពីរនាក់ និងវត្ថុតាងមន្ត្រីជំនាញរដ្ឋបាលព្រៃឈើបានរៀបចំកសាងសំណុំរឿងបញ្ជូនខ្លួន ជនសង្ស័យ ទាំង២នាក់ទៅតុលាការខេត្ត ដើម្បីចាត់ការសួរនាំបន្តទៅតាមនីតិវិធីច្បាប់ស្តីពីច្បាប់រដ្ឋបាលព្រៃឈើ ។ ចំណែកវត្ថុតាងយកទៅរក្សាទុកនៅខណ្ឌរដ្ឋបាលព្រៃឈើសៀមរាប ៕
ចែករំលែកព័តមាននេះ