ខេត្តកំពង់ស្ពឺ ៖ អធិការរងនគរបាលស្រុកសំរោងទងមួយរូប ត្រូវបានសមត្ថកិច្ចនៃស្នងការដ្ឋាននគរបាលខេត្តកំពង់ស្ពឺធ្វើការឃាត់ខ្លួន បន្ទាប់ពីលោកអធិការរងរូបនេះបានផឹកស៊ីជាមួយកូនចៅក្រោមឱវាទនិយាយអួតក្អេងក្អាងថា ខ្លួនមានខ្នងបង្អែកយ៉ាងរឹងមាំនៅក្រសួងមហាផ្ទៃ បើទោះជាបង្ករភាពអនាធិបតេយ្យបាញ់បោះសេរីក៏គ្មានអ្នកណាហ៊ានធ្វើអ្វីខ្លួនដែរ។
ក្រោយពីនិយាយអួតក្អេងក្អាងចប់រួចមក អធិការរងទទួលផែនសន្តិសុខរូបនេះ បានទាញអាវុធខ្លីរបស់ខ្លួនម៉ាកឡុកទៅឈរបាញ់លេងយ៉ាងអនាធិបតេយ្យ នៅក្នុងបរិវេន សាលាស្រុក ចំណុចមាត់ត្រពាំងទឹកខាងត្បូង ជាមួយកូនចៅរបស់ខ្លួនជាច្រើននាក់។ការបាញ់បោះយ៉ាងអនាធិបតេយ្យនេះ ទំនងជាចង់អួតនឹងបង្ហាញថាខ្លួនគឺជាមនុស្សមានឥទ្ធិពលនិងមានខ្នងបង្អែករឹងមាំឲ្យកូនចៅក្រោមឱវាទបានឃើញតែទីបំផុត ត្រូវអាម៉ាសមុខដោយសារតែសមត្ថកិច្ចស្នងការដ្ឋាននគរបាលខេត្តកំពង់ស្ពឺនៃកងអន្តរាគមន៍ធ្វើការឃាត់ខ្លួនយកទៅសួរនាំនៅស្នងការដ្ឋាននគរបាលខេត្តកំពង់ស្ពឺ។
យោងតាមរបាយការណ៍ដែលអធិការដ្ថាននគរបាលស្រុកសំរោងទងគោរពផ្ញើជូនលោកស្នងការនគរបាលខេត្តកំពង់ស្ពឺចុះថ្ងៃទី 20 ខែសីហាឆ្នាំ 2020 បានរៀបរាប់ថា កាលពីថ្ងៃទី 18 ខែសីហាឆ្នាំ 2020 វេលាម៉ោង9 និង 00 នាទីលោកវរសេនីយ៍ទោកងភារីអធិការរងទទួលការងារសន្តិសុខនៃអធិការដ្ឋាននគរបាលស្រុកសំរោងទងបានយកអាវុធខ្លីរបស់ខ្លួនមួយដើមម៉ាកឡុកធ្វើសកម្មភាពឈរបាញ់បោះយ៉ាងសេរីនិងអនាធិបតេយ្យបំផុតចំនួន 3 គ្រាប់គឺនៅចំណុចបរិវេណសាលាស្រុកមាត់ស្រះទឹកខាងត្បូង។
ក្នុងរបាយការណ៍បន្តថាលុះមកដល់ថ្ងៃទី 19 សីហាឆ្នាំ 2020 ដដែលវេលាម៉ោង 18 និង 30 នាទីលោកវរ:សេនីយ៍ទោកងភារីអធិការរងដ៏ទំនើងរូបនេះបាននាំកូនចៅក្រោមឱវាទផឹកស៊ីរហូតស្រវឹងនិយាយអួតក្អេងក្អាងហើយបានយកអាវុធខ្លីម៉ាកឡុកដដែលជាកម្មសិទ្ធិរបស់ខ្លួនមកឈរបាញ់បោះលេងយ៉ាងសេរីនៅក្នុងបរវេនសាលាស្រុកចំណុចមាត់ស្រះទឹកដដែលក្នុងនោះកូនចៅរបស់ខ្លួនជាច្រើនដែលផឹកស៊ីក៏បានចូលរួមក្នុងការបាញ់បោះនេះដែរ។
អ្នកដែលចូលរួមបាញ់បោះជាមួយអធិការរង ដ៏ទំនើងរូបនេះរួមមានលោកអនុសេនីយ៍ឯក ដន សុខុម ឋានៈនាយរងផ្នែកសន្តិសុខបាញ់ចំនួន 2 គ្រាប់លោកអនុសេនីយ៍ត្រីព្រីងឡងឌីឋានៈនាយរងប៉ុស្តិ៍វល្លិ៍សបាញ់ចំនួន 2 គ្រាប់លោកអនុសេនីយ៍ត្រីតាន់សៅលីឋានៈនាយរងផ្នែកគ្រឿងញៀនបាញ់ចំនួន 2 គ្រាប់លោកអនុសេនីយ៍ត្រីម៉ាន់ប៊ុណ្ណារ៉ា ឋានៈនាយរងផ្នែកគ្រឿងញៀនបាញ់ចំនួន 2 គ្រាប់លោកព្រិន្ទបាលទោឌី សូភក្តិ ឋានៈមន្ត្រីប៉ុស្តិ៍ទំព័រមាសបាញ់ចំនួន 2 គ្រាប់។
ការបាញ់បោះបង្កភាពអនាធិបតេយ្យបង្កើតឲ្យមានអសន្តិសុខនៅក្នុងសង្គមរបស់ក្រុមមន្ត្រីនគរបាលនិងលោកសក្កិ4 កន្លះកងភារីរូបនេះសមត្ថកិច្ចជំនាញបានរកឃើញសំបកគ្រាប់នៅកន្លែងកើតហេតុចំនួន 11 គ្រាប់លោកអធិការងដ៏ទំនើងរូបនេះត្រូវបានសមត្ថកិច្ចកម្លាំងការិយាល័យអន្តរាគមន៍ឃាត់ខ្លួននៅវេលាម៉ោង 22 និង 30 នាទីថ្ងៃដដែល ។
ពេលនេះ កម្លាំងនគរបាលជំនាញនៃស្នងការដ្ឋាននគរបាលខេត្តកំពង់ស្ពឺកំពុងតែធ្វើការសាកសួរលោកអធិការរងដ៏ទំនើងរូបនេះរកមូលហេតុដើមចមនៃការបង្កភាពអនាធិបតេយ្យនិងបង្កបញ្ហាអសន្តិសុខដល់សង្គមឋានៈដែលខ្លួនជាសមត្ថកិច្ចជាគំរូដល់ប្រជាពលរដ្ឋនិងជាអ្នកការពារសន្តិសុខសុវត្ថិភាពតែបែរជាប្រព្រឹត្តិទង្វើបែបនេះទៅវិញ។ ក្នុងរបាយការណ៍ដែលគោរពផ្ញើជូនលោកស្នងការនគរបាលខេត្តមិនត្រឹមតែចុះហត្ថលេខាដោយលោកវរសេនីយ៍ឯកឃុតសុផលអធិការស្រុកសំរោងទងតែម្នាក់នោះទេគឺសូម្បីតែអភិបាលស្រុកសំរោងទងក៏ចុះហត្ថលេខាឯកភាពផងដែរ។
គួររំលឹកថា អធិការងរូបនេះកន្លងមក ធ្លាប់បើកល្បែងជល់មាន់ online ហើយក៏ត្រូវបានសមត្ថកិច្ចនៃការិយាល័យព្រហ្មទណ្ឌកម្រិតស្រាលធ្វើការបង្ក្រាបដែរតែកាលនោះមិនដឹងថា បណ្ដាលមកពីឥទ្ធិពលខ្នងបង្អែករបស់លោកអធិការងរូបនេះឬក៏ជាការត្រូវរូវគ្នានោះទេទើបក្រុមអ្នកបង្ក្រាបធ្វើរបាយការណ៍គោរពជូនថ្នាក់ដឹកនាំដោយមិនមានឈ្មោះលោកអធិការរងរូបនេះឡើយ គឺជាឈ្មោះអ្នកផ្សេងទៅវិញដែលធាតុពិតមហាជននិងសមត្ថកិច្ចជាច្រើននៅក្រុងច្បារមននៃសង្កាត់សុព័រទេពបានដឹងយ៉ាងច្បាស់ថាទីតាំងកន្លែងជល់មាន់ online ដែលត្រវបង្ក្រាបនោះគឺជារបស់លោកកងភារីអធិការរងរូបនេះយ៉ាងពិតប្រាកដ ។
ព័ត៌មានពិស្តារមានផ្សាយជូននៅកាសែតកោះសន្តិភាពថ្ងៃទី២៣ សីហា ។
ចែករំលែកព័តមាននេះ