ក្រុងព្រះសីហនុ ៖ បើតាមសេចក្តីរាយការណ៍បានឱ្យដឹងថា មានករណីអគ្គិភ័យមួយបានកើតឡើងនៅខាងក្រោយការ៉ាសសាំង TOTAL TAVANNA បណ្តាលឱ្យឆាបឆេះផ្ទះមួយខ្នងធ្វើអំពីឈើលើ ថ្មក្រោម បង្កឱ្យមានការភ្ញាក់ផ្អើលកាលពីម៉ោង៩និង១០នាទីព្រឹក ថ្ងៃទី២០ ខែសីហា ឆ្នាំ២០២០ ស្ថិតក្រុម១៤ ក្នុងភូមិ ២ សង្កាត់លេខ៣ ក្រុង/ខេត្តព្រះសីហនុ។
យោងតាមសម្ដីម្ចាស់ផ្ទះបានឱ្យដឹងថា មុនពេលកើតហេតុ គាត់ទើបត្រឡប់មកពីខាងក្រៅ ក៏បានទៅកាច់បារ៉ែតភ្លើង ក៏ស្រាប់តែឆ្លងចរន្តឆាបឆេះនៅខាងលើផ្ទះជាន់ទី១តែម្តង (ឈើលើ ថ្មក្រោម )។ ភ្លាមៗនោះ ដោយសារគាត់ភ័យខ្លាំងពេក ក៏បានហៅអ្នកជិតខាងអោយជួយគាត់ បន្ទាប់មកមានបុរសម្នាក់ដែលជាអ្នកជិតខាងនោះបានយកបំពង់ពន្លត់អគ្គិភ័យមកជួយបាញ់ពន្លត់អស់ចំនួន១០បំពង់ តែនៅមិនទាន់រលត់នៅឡើយ។
ម្ចាស់ផ្ទះបន្តថា ក្រោយមកសមត្ថកិច្ចជំនាញពន្លត់អគ្គិភ័យរបស់ស្នងការនគរបាលខេត្តព្រះសីហនុ បានចុះមកដល់ ក៏នាំយករថយន្ដពន្លត់អគ្គិភ័យចំនួន២គ្រឿង និងបានប្រើរថយន្ដពន្លត់អគ្គិភ័យអស់ចំនួន១គ្រឿង ទើបអាចគ្រប់គ្រងស្ថានភាពបានភ្លាមៗ ដោយរលត់ទាំងស្រុង១០០% នៅវេលាម៉ោង៩និង៤០នាទី ។ ក្នុងហេតុការណ៍ខាងលើនេះ គឺបណ្ដាលអោយខូចខាតទ្រព្យសម្បត្តិក្នុងផ្ទះតែ៣០%ប៉ុណ្ណោះ និងមិនបណ្ដាលឱ្យមានមនុស្សរងរបួសឡើយ ។
ក្រោយកើតហេតុបន្ទាប់ពីសមត្ថកិច្ចពន្លត់បានទាំងស្រុងរួចមកទើបដឹងថា មូលហេតុដែលបង្កឱ្យមានគ្រោះអគ្គិភ័យ គឺបណ្ដាលមកពីឆ្លងចរន្តអគ្គិសនី៕
ចែករំលែកព័តមាននេះ