ខេត្តបន្ទាយមានជ័យ ៖ ជនរងគ្រោះ២នាក់យាយ តា ដោយសារអគ្គិភ័យឆាបឆេះផ្ទះ កាលពីព្រឹកថ្ងៃទី១១ ខែកុម្ភៈ ឆ្នាំ២០១៥ កន្លងទៅនេះ នៅភូមិតាអ៊ីន២ ឃុំស្រះរាំង ស្រុកមង្គលបូរី នាព្រឹកថ្ងៃទី១៤ ខែកុម្ភៈ ឆ្នាំ២០១៥ លោកឡុង ពុន អភិបាលស្រុកមង្គលបូរី ជាប្រធានកិត្តិយស អនុសាខាកាកបាទក្រហកម្ពុជាស្រុកមង្គលបូរី រួមដំណើរដោយលោកអធិការនគរបាលស្រុក លោកមេបញ្ជាការកងរាជអាវុធស្រុក និងមេបញ្ជាការតំបន់ប្រតិបត្តិការស្រុកមង្គលបូរី រួមទាំងអាជ្ញាធរឃុំភូមិ បាននាំយកអំណោយជាគ្រឿងឧបភោគ បរិភោគ និងថវិកា ទៅប្រគល់ជូន ដើម្បីសម្រួលដល់ ការលំបាករបស់ លោកតាសួង ទី អាយុ៧៧ឆ្នាំ ជាប្តី និងប្រពន្ធឈ្មោះហួត ឡាំ អាយុ៧៤ឆ្នាំ ស្របពេលថ្ងៃនេះគឺជាថ្ងៃបុណ្យនៃសេចក្រីស្រឡាញ់ ។
លោកឡុង ពុន អភិបាលស្រុកមង្គលបូរី ជាប្រធានកិត្តិយសអនុសាខាកាកបាទក្រហកម្ពុជា ស្រុកមង្គលបូរី បានថ្លែងនូវការចូលរួមសោកស្តាយពីហេតុការណ៍ នៃអគ្គិភ័យដែលបានកើតឡើងនេះ បណ្តាលឲ្យផ្ទះរបស់លោកតា លោកយាយ រងនូវការខូចខាត ។
ហើយក្រោយពីទទួលបានព័ត៌មានពីអគ្គិភ័យនេះ លោកបានដឹកនាំប្រតិភូអនុសាខាកាកបាទក្រហមកម្ពុជាស្រុកមង្គលបូរី ចុះមកសាកសួរសុខទុក្ខ និងនាំយកអំណោយរបស់អនុសាខាកាកបាទក្រហមស្រុក ជាគ្រឿងឧបភោគ បរិភោគ មានអង្ករចំនួន៥០គ.ក្រ មី៤កេស តង់១ ត្រីខ ២យួរ ទឹកត្រី៣យួរ ទឹកស៊ីអ៊ីវ២យួរ កន្ទេល១ មុង១ ភួយ១ ឆ្នាំ១ បំពង់ទឹកក្តៅ១ ខ្ទះ១ ចាន១៥ ស្លាបព្រា១០ និងថវិកាចំនួន៥០៥.០០០រៀល (៥០ម៉ឺន៥ពាន់រៀល) ។
ជាមួយគ្នានោះដែរលោកអភិបាលស្រុក បញ្ជាក់ថា កាកបាទក្រហមកម្ពុជាក្រោមការដឹកនាំរបស់សម្តេចគតិបណ្ឌិត ប៊ុន រ៉ានី ហ៊ុន សែន ជាប្រមុខ សម្តេចតែងតែគិតគូរយកចិត្តទុកដាក់ដល់ប្រជាពលរដ្ឋដែលរងគ្រោះ និងងាយរងគ្រោះដោយប្រការផ្សេងៗ ដោយមិនប្រកាន់ពូជសាសន៍ ពណ៌សម្បុរនោះឡើយ៕
ចែករំលែកព័តមាននេះ