ខេត្តបន្ទាយមានជ័យ ៖ ទន្ទឹមនឹងមានករណីបាក់រលំដងសន្ទូចស្ទូចជញ្ជាំងបេតុងសង្កត់ពីលើអគារផ្ទះល្វែងមួយកន្លែងនៅក្រុងប៉ោយប៉ែតកាលពីម៉ោង២រសៀលថ្ងៃទី១២ ខែសីហា ឆ្នាំ២០២០ បណ្តាលឲ្យមានមនុស្សបាត់បង់ជីវិត និងរបួសកន្លងមក គឺនៅវេលាម៉ោង៦និង៣០នាទីព្រឹក ថ្ងៃទី១២ ខែសីហា ឆ្នាំ២០២០ដដែលនោះ ក៏មានករណីបាក់រលំបង្កាន់ដៃជញ្ជាំងអគារមន្ទីរពេទ្យខេត្តមិត្តភាពកម្ពុជា-ជប៉ុននៅស្រុកមង្គលបូរី បណ្តាលឲ្យរលំសង្កត់ពីលើក្មេងស្រីម្នាក់បានបាត់បង់ជីវិតផងដែរ តែដូចជាមានសភាពស្ងប់ស្ងាត់ ហើយរឿងនេះ ទើបតែត្រូវបានបែកធ្លាយនៅថ្ងៃទី១៨ ខែសីហា ឆ្នាំ២០២០នេះតែម្តង។
បើយោងតាមការឲ្យដឹងពីសមត្ថកិច្ចនគរបាលយុត្តិធម៌បានឱ្យដឹងថា ករណីបាក់រលំបង្កាន់ដៃជញ្ជាំងអគារមន្ទីរពេទ្យខេត្តមិត្តភាពកម្ពុជា-ជប៉ុននេះ គឺបានបិទការស៊ើបអង្កេតហើយ ព្រោះជាគ្រោះថ្នាក់បង្កពីឧបទ្ទវហេតុ មិនមែនជាកំហុសរបស់អង្គភាព ឬបុគ្គលណាម្នាក់នៅមន្ទីរពេទ្យនេះឡើយ។
សមត្ថកិច្ចបានបញ្ជាក់ឲ្យដឹងថា កាលពីម៉ោង៦និង៣០នាទីព្រឹក នៅថ្ងៃទី១២ ខែសីហា ឆ្នាំ២០២០កន្លងមក មានបុរសម្នាក់ឈ្មោះបាន សំរេច អាយុ២៩ឆ្នាំ រស់នៅភូមិពង្រ សង្កាត់កំពង់ស្វាយ ក្រុងសិរីសោភ័ណ បានទៅមើលថែរក្សាម្តាយមានជំងឺសម្រាកនៅមន្ទីរពេទ្យខេត្តមិត្តភាពកម្ពុជា-ជប៉ុន ស្រុកមង្គលបូរី ហើយគាត់បានយកអង្រឹងទៅចងនឹងភ្នាក់ដៃជញ្ជាំងថ្មនៃយ៉ខាងមុខអគារមួយ រួចអង្គុយយោលអង្រឹងជាមួយកូនតូចឈ្មោះ សំរេច សៀវអា អាយុ១ឆ្នាំ ឯកូនស្រីម្នាក់ទៀតឈ្មោះសំរេច សៀវអឺ អាយុ៦ឆ្នាំ នៅឈរលេងក្បែរចុងអង្រឹង។
សមត្ថកិច្ចបន្តថា ស្របពេលនោះ ស្រាប់តែជញ្ជាំងថ្មដែលមានបណ្តោយ១,២ម៉ែត្រ និងទទឹង១ម៉ែត្រ បានបាក់សង្កត់ទៅលើកូនស្រីឈ្មោះសៀវអឺ បណ្តាលឲ្យបាត់បង់ជីវិតតែម្តង។ ស្របពេលនោះ បុគ្គលិកពេទ្យ ក៏បានណែនាំ ហើយហាមអ្នកជំងឺ និងអ្នកកំដរអ្នកជំងឺហាមតោង អង្គុយលេង ឬចងអង្រឹងលើបង្កាន់ដៃអគារនោះ ព្រោះបារម្ភគ្រោះថ្នាក់បន្ត ។
ប៉ុន្តែអ្នកជំងឺ និងក្រុមគ្រួសារបានរិះគន់ថា ករណីនេះ អង្គភាពមន្ទីរពេទ្យ គួរតែសរសេរស្លាកបង្ការគ្រោះថ្នាក់ និងហាមប៉ះពាល់បង្គាន់ដៃនោះ ឬក៏ជួសជុលជាមុនដើម្បីកុំឲ្យមានគ្រោះថ្នាក់ដូចមុនតទៀត ។
ទោះជាយ៉ាងណា ក្រោយគ្រោះថ្នាក់នោះខាងគ្រូពេទ្យបានខ្នះខ្នែងជួយសង្គ្រោះកុមារីរងគ្រោះផងដែរ ប៉ុន្តែស្ថានភាពធ្ងន់ធ្ងរពេកមិនអាចជួយបាន ។ ជាមួយគ្នានោះដែរ មន្ទីរពេទ្យក៏បានចាត់តំណាងនាំយកថវិកាទៅចូលរួមធ្វើបុណ្យសពចំនួន១លានរៀលផងដែរ ។
ឯប្រធានមន្ទីរសុខាភិបាលខេត្តបន្ទាយមានជ័យ លោកវេជ្ជបណ្ឌិត ឡេ ច័ន្ទសង្វាត បានឲ្យដឹងថា ករណីនេះ មន្ទីរមិនបានទទួលសេចក្តីរាយការណ៍ភ្លាមៗនោះទេ ហើយទើបតែដឹងនៅពេលនេះ គឺជួនជាសមត្ថកិច្ចជំនាញយុត្តិធម៌បានបិទសំណុំរឿងទៅហើយ។
មន្ត្រីនគរបាលស្រុកមង្គលបូរី និងនគរបាលខេត្តបន្ទាយមានជ័យ បានឲ្យដឹងថា ករណីបាក់ភ្នាក់ដៃជញ្ជាំងយ៉នៃអគារមន្ទីរពេទ្យខេត្តមិត្តិភាពកម្ពុជា-ជប៉ុន ស្រុកមង្គលបូរីនេះ បង្កឲ្យសង្កត់ក្មេងស្រីបណ្តាលឱ្យបាត់បង់ជីវិតនោះ ត្រូវបានសមត្ថកិច្ចស៊ើបអង្កេត និងស្រាវជ្រាវយ៉ាងលម្អិត ហើយបានលទ្ធផលថា គ្រោះថ្នាក់ដោយឧបទ្ទវហេតុ ហេតុនេះបានជាសមត្ថកិច្ចបិទសំណុំរឿងនៃការស៊ើបអង្កេតតែម្តង ៕
ចែករំលែកព័តមាននេះ