អន្តរជាតិ ៖ ការវាយប្រហារតាមប្រព័ន្ធបច្ចេកវិទ្យា មានការកើនឡើងខ្លាំងចាប់តាំងពីដើមឆ្នាំនេះ ជាឧទាហរណ៍កាលពីថ្ងៃសៅរ៍កន្លងទៅនេះ អាជ្ញាធរប្រទេសកាណាដា បានប្រាប់ឱ្យដឹងថា មានការលួចចូលគណនីរាប់ពាន់របស់អ្នកប្រើប្រាស់ ដែលប្រើសេវាកម្មជាមួយរដ្ឋាភិបាលតាមប្រព័ន្ធអ៊ិនធឺណិត ។…
អន្តរជាតិ ៖ ការវាយប្រហារតាមប្រព័ន្ធបច្ចេកវិទ្យា មានការកើនឡើងខ្លាំងចាប់តាំងពីដើមឆ្នាំនេះ ជាឧទាហរណ៍កាលពីថ្ងៃសៅរ៍កន្លងទៅនេះ អាជ្ញាធរប្រទេសកាណាដា បានប្រាប់ឱ្យដឹងថា មានការលួចចូលគណនីរាប់ពាន់របស់អ្នកប្រើប្រាស់ ដែលប្រើសេវាកម្មជាមួយរដ្ឋាភិបាលតាមប្រព័ន្ធអ៊ិនធឺណិត ។ ការវាយប្រហារនេះគឺសំដៅទៅលើសេវាកម្ម GCKey ដែលកំពុងប្រើប្រាស់ដោយនាយកដ្ឋានចំនួន៣០ និងគណនីរបស់ភ្នាក់ងារពន្ធដារ នៃប្រទេសកាណាដា ។
តាមការបង្ហាញប្រាប់ពីអាជ្ញាធរថា យ៉ាងហោចណាស់មានលេខសម្ងាត់ និងឈ្មោះអ្នកប្រើប្រាស់ចំនួន ៩,០៤១ ដែលត្រូវបានលួច និងត្រូវបានព្យាយាមចូល ដើម្បីប្រើសេវាកម្មរបស់រដ្ឋាភិបាល ។ គណនីទាំងនេះ ត្រូវបានបិទចោល ក្រោយពីរកឃើញថា បានរងផលប៉ះពាល់ពីការវាយប្រហារនេះ ។ ជាមួយគ្នានេះដែរទិន្នន័យគណនីរបស់ទីភ្នាក់ងារពន្ធដារប្រមាណ ៥,៥០០គណនី ក៏ត្រូវបានគេកំណត់គោលដៅនៅក្នុងការវាយប្រហារនេះ និងការវាយប្រហារមួយផ្សេងទៀតផងដែរ ហើយការចូលទៅកាន់គណនីទាំងនោះត្រូវបានផ្អាក ដើម្បីការពារព័ត៌មានរបស់អ្នកប្រើប្រាស់ ។
បច្ចុប្បន្ន អាជ្ញាធររបស់ប្រទេសកាណាដា កំពុងស៊ើបអង្កេត ដើម្បីធ្វើការកំណត់ឱ្យច្បាស់ថា តើមានការរំលោភលើឯកជនភាព ឬមានទិន្នន័យណា ត្រូវបានទាញយកពីគណនីទាំងនោះ ។
នាយកដ្ឋានប្រឆាំងបទល្មើសបច្ចេកវិទ្យា ក្រសួងមហាផ្ទៃ នៃកម្ពុជា សូមឱ្យអ្នកប្រើប្រាស់មានការប្រុងប្រយ័ត្ន ក្នុងការរក្សាទុកឈ្មោះ និងលេខសម្ងាត់ ដើម្បីជៀសវាងពីការលួចយករបស់ជនអនាមិក ជាងនេះទៅទៀត សូមបងប្អូនមានការប្រុងប្រយ័ត្នជាមួយនឹងការបោកប្រាស់តាមប្រព័ន្ធបច្ចេកវិទ្យា តាមរូបភាពផ្សេងៗ ដូចជាការបន្លំតេឬផ្ញើសារថា ជាភ្នាក់ងារមកពីធនាគារ ដើម្បីឱ្យបងប្អូន ផ្ដល់លេខកូដឬលេខសម្ងាត់នោះ ៕
ចែករំលែកព័តមាននេះ