ខេត្តកំពង់ធំ ៖ បើតាមសេចក្តីរាយការណ៍បានឱ្យដឹងថា បុរសម្នាក់ស្រវឹងស្រាជោកជាំបានឡើងធ្វើលើដំបូលផ្ទះ តែជាអកុសលធ្វើឱ្យបុរសរងគ្រោះបានធ្លាក់ចុះមកក្រោមវិញ បណ្ដាលឱ្យបាត់បង់ជីវិតភ្លាមៗនៅនឹងកន្លែងកើតហេតុ បង្កឱ្យមានការភ្ញាក់ផ្អើលកាលពីម៉ោង២និង ៣០នាទីរសៀល ថ្ងៃទី១៨ ខែសីហា ឆ្នាំ ២០២០ ស្ថិតនៅភូមិសាលាសន្ទុក ឃុំកកោះ ស្រុកសន្ទុក ខេត្តកំពង់ធំ។
សេចក្តីរាយការណ៍បន្តថា សពជនរងគ្រោះខាងលើមានឈ្មោះ លាង អ៊ន ភេទប្រុស អាយុ ៤៩ឆ្នាំ មុខរបរជាមេជាង រស់នៅភូមិទ្រៀល ឃុំទ្រៀល ស្រុកតាំងគោក ខេត្តកំពង់ធំ។
យោងតាមការបំភ្លឺពីបុរស៣នាក់ដែល ១-ឈ្មោះ យើង ធា អាយុ៤៩ឆ្នាំ ២-ឈ្មោះ រឹត ឈាន់ អាយុ៣៥ឆ្នាំ និង៣-ឈ្មោះ យ៉ាន ធា អាយុ៣៦ឆ្នាំ រស់នៅភូមិ-ឃុំកើតហេតុដែលជាម្ចាស់ផ្ទះ បានរៀបរាប់ប្រាប់ឱ្យដឹងថា ជនរងគ្រោះជាមនុស្សញៀនស្រាផឹកស្រវឹងជាប្រចាំ។
ប្រភពពីបុរសទាំង៣នាក់បន្តថា មុនពេលកើតហេតុ គឺជនរងគ្រោះបានផឹកស្រា រួចក៏បានឡើងធ្វើផ្ទះឲ្យពួកគាត់ដែលមានដំបូលកម្ពស់៦ម៉ែត្រ ។ ហើយនៅពេលដែលឃើញជនរងគ្រោះមានសភាពស្រវឹងស្រានោះ ពួកកូនជាង និងខាងម្ចាស់ផ្ទះបានប្រាប់គាត់ថា «បើស្រវឹងស្រាហើយ កុំឡើងលើដំបូលផ្ទះអី ខ្លាចគ្រោះថ្នាក់» ប៉ុន្តែជនរងគ្រោះរូបនេះចចេសមិនស្ដាប់គេទេ នៅពេលឡើងទៅដល់លើដំបូលហើយ ក៏ស្រាប់តែបានធ្លាក់ពីលើដំបូលចុះមកក្រោមវិញ បណ្ដាលឲ្យបាត់បង់ជីវិតភ្លាមៗនៅទីកន្លែងកើតហេតុតែម្តង។
ក្រោយពីទទួលបានព័ត៌មានខាងលើភ្លាម សមត្ថកិច្ចជំនាញបានសហការជាមួយប៉ុស្តិ៍រដ្ឋបាល, រដ្ឋអំណាចមូលដ្ឋានភូមិ-ឃុំ ដើម្បីចុះទៅពិនិត្យកន្លែងកើតហេតុ និងសាកសព បន្ទាប់ពីពិនិត្យរួចក៏សន្និដ្ឋានថា គឺមកពីជនរងគ្រោះផឹកស្រាស្រវឹងជោកជាំគ្រប់គ្រងសតិមិនបាន ទើបបណ្តាលធ្លាក់ចុះបាត់បង់ជីវិតបែបនេះ។ ក្រោយមកសមត្ថកិច្ចជំនាញក៏បានធ្វើកំណត់ហេតុ រួចប្រគល់សពជនរងគ្រោះជូនក្រុមគ្រួសារ ដើម្បីយកទៅធ្វើបុណ្យតាមប្រពៃណី។
ចែករំលែកព័តមាននេះ