ខេត្តប៉ៃលិន ៖ ចាប់តាំងពីថ្ងៃទី១៧ -១៨ ខែសីហា ឆ្នាំ២០២០ គេសង្កេតឃើញភ្ញៀវទេសចរនៅក្នុងខេត្តប៉ៃលិន ក៏ដូចជា មកពីតាមបណ្តាខេត្តនានាបាននាំគ្នាសម្រុកទៅលេងនៅតាមរមណីយដ្ឋានជាច្រើនដូចជា រមណីយដ្ឋានចំការខ្នុរ…
ខេត្តប៉ៃលិន ៖ ចាប់តាំងពីថ្ងៃទី១៧ -១៨ ខែសីហា ឆ្នាំ២០២០ គេសង្កេតឃើញភ្ញៀវទេសចរនៅក្នុងខេត្តប៉ៃលិន ក៏ដូចជា មកពីតាមបណ្តាខេត្តនានាបាននាំគ្នាសម្រុកទៅលេងនៅតាមរមណីយដ្ឋានជាច្រើនដូចជា រមណីយដ្ឋានចំការខ្នុរ រមណីយដ្ឋានទឹកធ្លាក់ភ្នំខៀវ និងរមណីយដ្ឋានប្រវត្តិ សាស្ត្រភ្នំយ៉ាត គួរឱ្យកត់សម្គាល់ផងដែរ ។ ជាហេតុធ្វើឱ្យអាជីវករលក់ដូរកាក់កប ស្ទើរតែលើកម្ហូបអាហារឱ្យភ្ញៀវមិនទាន់នោះឡើយ ។
បើតាមការរៀបរាប់ពីស្ត្រីម្នាក់ ឈ្មោះ ទិត្យ ផល្លា ហៅមួច អាយុ៥០ឆ្នាំ រស់នៅភូមិបរហ៊ុយ ត្បូង សង្កាត់បរយ៉ាខា ក្រុងប៉ៃលិន ជាម្ចាស់រមណីយដ្ឋានចំការខ្នុរ បានរៀបរាប់ឱ្យដឹងថា ៖ គាត់ពិតជាសប្បាយរីករាយយ៉ាងខ្លាំង ខណ:ប៉ុន្មានថ្ងៃជាប់ៗ គ្នានេះមានភ្ញៀវទេសចរចូលទៅលេងនៅក្នុងរមណីយដ្ឋានរបស់ខ្លួនជាច្រើននាក់ ដែលពួកគេទាំងនោះធ្វើដំណើរមកពីតាមបណ្តាខេត្តនានា ដូចជា បន្ទាយមានជ័យ បាត់ដំបង ពោធិ៍សាត់ សៀមរាប និងរាជធានីភ្នំពេញជាដើម ។
គាត់បន្តទៀតថា នៅក្នុងរមណីយដ្ឋានរបស់ខ្លួន មានម្ហូបប្រចាំត្រកូល ដែលភ្ញៀវចូលចិត្តកុម្ម៉ង់ជាងគេ គឺឆាសាច់មាន់ សាច់ទា សាច់ជ្រូក ជាមួយដើមក្រវ៉ាញ ហើយតម្លៃមិនខ្ពស់នោះទេ គឺមុនពេលរដូវបុណ្យទាន និងពេលចូលឆ្នាំខ្មែរ ក៏នៅរក្សាតម្លៃថេរដដែល ។
ចំណែកភ្ញៀវឯទេសចរ ឈ្មោះ គុយ យឿន ភេទស្រី អាយុ៧៤ឆ្នាំ និងឈ្មោះ នី ភេទស្រី អាយុ៥៨ឆ្នាំ មកពីស្រុកម៉ាល័យ ខេត្តបន្ទាយមានជ័យ ហើយឈ្មោះ សារ៉ូ ភេទប្រុស មកពីខេត្តបាត់ដំបង បានរៀបរាប់ឱ្យដឹងដូចៗគ្នាថា ៖ ពួកគាត់ ទើបតែធ្វើដំណើរមកលេងក្នុងរមណីយដ្ឋាននានា ក្នុងខេត្តប៉ៃលិន ជាលើកទី១ លុះពេលមកដល់ ពួកគាត់សង្កេតឃើញទេសភាពនៅកន្លែងលេងពិតជាល្អ ស្រស់ស្អាត ហើយក៏ទាក់ទាញឱ្យសប្បាយរីករាយយ៉ាងខ្លាំង ។
ប្រភពបន្តទៀតថា ពួកគាត់បាន កុម្ម៉ង់ទិញម្ហូបអាហារ ដូចជា មាន់ដុត ត្រីអាំង និងឆាក្រវ៉ាញ សម្រាប់ទទួលទានជួបជុំក្រុមគ្រួសារ នៅលើខ្យុស ដោយបន្ទាប់ពីអាហាររួចរាល់ អ្នកខ្លះនាំគ្នាចុះងូតទឹកលេង ធ្វើឱ្យត្រជាក់ខ្លួន ហើយបន្តនាំគ្នាអង្គុយលេង រហូតដល់ពេលល្ងាច ទើបធ្វើដំណើរត្រឡប់ទៅផ្ទះរៀងៗខ្លួនវិញ ។ នៅពេលក្រោយៗទៀត បើសិនជាមានឱកាស ឬពេលបុណ្យទានជាដើម ពួកគាត់នឹងមិនភ្លេចមកលេងក្នុងខេត្តប៉ៃ លិននោះឡើយ ។
ចំណែកឯនៅកន្លែងរមណីយដ្ឋានប្រវត្តិសាស្ត្រភ្នំយ៉ាត ក៏មានភ្ញៀវទេសចរចូលទៅលេងកម្សាន្តយ៉ាងច្រើនកុះករផងដែរ ដោយអ្នកខ្លះទិញចេក ផ្លែឈើ ធូប ទៀន និងដង្វាយផ្សេងៗ យកទៅថ្វាយរូបសំ ណាកលោកយាយយ៉ាត ទើបនាំគ្នាបន្តដំណើរទៅលេងកន្លែងផ្សេងៗទៀត ។
លើសពីនេះអ្នកណាៗ ដែលមានជំនឿទៅលើយាយយ៉ាត តែងតែចូលទៅបែរបន់ ដើម្បីសុំសេចក្តីសុខ និងសុវត្ថិភាពតាមដងផ្លូវ ក៏មានសមត្ថកិច្ច និងសន្តិសុខ ឈរចាំ រៀបចំសណ្តាប់ធ្នាប់នៅទីនោះ មិនបណ្តាលឱ្យស្ទះចរាចរនោះឡើយ ៕
ចែករំលែកព័តមាននេះ