រាជធានីភ្នំពេញ ៖ អាជ្ញាធរខណ្ឌដូនពេញនឹងចុះបិទអាជីវកម្មខារ៉ាអូខេ និងក្លិបឌីស្កូចំនួន១០ទីតាំង និងអប់រំណែនាំ ១ទីតាំង ក្នុងតំបន់ផ្សារហ្គោលឌែនសូរិយាម៉ល ដែលបំពានទៅនឹងបម្រាមរបស់រាជរដ្ឋាភិបាល ។
មន្ត្រីរដ្ឋបាលខណ្ឌដូនពេញបានអោយដឹងថា ដោយអនុវត្តតាមគោលកាណ៍ដឹកនាំរបស់លោក ឃួង ស្រេង អភិបាលនៃគណៈអភិបាលរាជធានីភ្នំពេញ នៅវេលាម៉ោង១យប់ ថ្ងៃទី១៦ ឈានចូលថ្ងៃទី១៧ ខែសីហា ឆ្នាំ២០២០ លោក សុខ ពេញវុធអភិបាលនៃគណៈអភិបាលខណ្ឌដូនពេញបានដឹកនាំក្រុមការងារចម្រុះធ្វេីការចុះត្រួតពិនិត្យទីតាំងខារ៉ាអូខេ (KTV) ក្លិបឌីស្កូ នៅក្នុងភូមិសាស្ត្រខណ្ឌដូនពេញ រាជធានីភ្នំពេញ ។
រួមមាន ភោជនីយដ្ឋានយីហោ ហេភីណេស ស្ថិតនៅសង្កាត់បឹងរាំង បានកែប្រែពីខារ៉ាអូខេ មកបេីកអាជីវកម្មភោជនីយដ្ឋានវិញ និងបានសម្រេចបិទអាជីវកម្មភោជនីយដ្ឋានចំនួន ១០ទីតាំង ជាក្លិបឌីស្កូ ស្ថិតនៅក្នុងផ្សារសូរិយាម៉ល សង្កាត់ផ្សារថ្មីទី៣ ក្រុមការងារបានធ្វើកំណត់ហេតុផ្អាកអាជីកម្មជាបណ្តោះអាសន្ន និងដកហូតឧបករណ៍សម្រាប់ចាក់បំពងសំលេង ព្រមទាំងបានធ្វើការឃាត់ម្ចាស់ទីតាំងយកទៅធ្វើកិច្ចសន្យាអប់រំណែនាំបន្ត នៅអធិការដ្ឋាននគរបាលខណ្ឌដូនពេញ ។
មន្ត្រីដដែលបានបញ្ជាក់ថា ដោយមូលហេតុនៃការចុះបិទដូចខាងក្រោម ៖
១-មិនអនុវត្តតាមការណែនាំរបស់ក្រសួងសុខាភិបាលពីការបង្ការ និងទប់ស្កាត់ជម្ងឺកូវីដ១៩ ដោយមិនរក្សាគម្លាតសង្គម ១.៥ម ទៅ ២.០០ម ។ ២-ចាក់សម្លេងលឺខ្លាំងៗ បង្កអោយបាត់បង់សណ្តាប់ធ្នាប់ និងប៉ះពាល់ដល់ការស្នាក់នៅរបស់ប្រជាពលរដ្ឋនៅពេលយប់ ។
៣-មិនគោរពតាមកាណែនាំ និងកិច្ចសន្យារបស់អាជ្ញាធរខណ្ឌចំនួន០៣លើក និងបង្កអោយកកស្ទះចរាចរណ៍ជាប្រចាំនៅបណ្តោយផ្លូវលេខ៥១ (ការឈប់ចតគ្មានសណ្តាប់ធ្នាប់)ហេតុនេះហើយទើប គណៈបញ្ជាការឯកភាពរដ្ឋបាលខណ្ឌដូនពេញ សម្រេចបិទភោជនីយដ្ឋានចំនួន ១០ទីតាំងចាប់ពីពេលនេះតទៅ ៕
ចែករំលែកព័តមាននេះ