ខេត្តកំពង់ចាម ៖ គ្រោះមហន្តរាយពីទឹកជំនន់ទន្លេមេគង្គ បានធ្វើអោយច្រាំងទន្លេក្រោយសាលាសង្កាត់កំពង់ចាម ក្រុងកំពង់ចាម បានបាក់ស្រុតជាច្រើនមែត្រ រួមនឹងច្រាំងទន្លេនៅក្នុងឃុំពង្រ ស្រុកកោះសូទិន ក៏បានរងការបាក់ស្រុតជាច្រើនម៉ែត្រផងដែរ ។ ហើយត្រូវបានអាជ្ញាធរខេត្ត និងស្ថាប័នពាក់ព័ន្ធក្រសួងធនធានទឹកបានប្រើប្រាស់វិធានការទៅតាមបច្ចេកទេសស្ថាបនាច្រាំង រហូតមកដល់ពេលនេះបានប្រមាណ៨០% ដើម្បីឱ្យមានសុវត្ថិភាពជូនដល់ប្រជាពលរដ្ឋបញ្ចៀសកុំឲ្យមានគ្រោះថ្នាក់ណាមួយកើតឡើងជាយថាហេតុ ។
លោកផ្លោក សុវណ្ណ ចៅសង្កាត់កំពង់ចាម មានប្រសាសន៍ឲ្យដឹងនៅថ្ងៃទី១៦ សីហា ២០២០ថា នៅក្នុងរដូវទឹកសម្រក ឆ្នាំ២០១៩ បណ្ដាលឲ្យខឿនបេតុង នៅក្រោយសាលាសង្កាត់របស់លោកត្រូវបានបាក់ស្រុតខូចខាតជាច្រើនម៉ែត្រ មកដល់ខែមិនា ២០២០ ឯកឧត្តមអ៊ុនចាន់ដា អភិបាលខេត្ត បានឲ្យក្រុមជាងមកធ្វើការជួសជុលជាបន្ទាន់ ដើម្បីការពារសំណង់អគារសាលាសង្កាត់កំពង់ចាម រួម និងប៉ុស្តិ៍រដ្ឋបាលកំពង់ចាមកុំឲ្យបាក់ស្រុត ។
លោកចៅសង្កាត់កំពង់ចាម មានប្រសាសន៍បន្តថា លុះមកដល់រសៀលថ្ងៃទី១៥ សីហា២០២០ ឯកឧត្តមអភិបាលខេត្ត បានអញ្ជើញចុះមកពិនិត្យមើលការស្ថាបនាខឿនបេតុងច្រាំងទន្លេ ក្រោយសាលាសង្កាត់កំពង់ចាម ដែលបានដំណើរការប្រមាណ៨០% ដែលមានប្រវែង ៦១ម៉ែត្រ ។ សម្រាប់ផែនការរបស់រដ្ឋបាលខេត្ត មានគម្រោងនឹងសាងសង់ច្រាំងទន្លេបន្តបន្ទាប់ ដើម្បីឲ្យផ្លូវតាមមាត់ទន្លេក្នុងក្រុងកំពង់ចាម កាន់តែមានសោភ័ណភាពហើយនឹងធានាបានគុណភាព។
លោកយី វណ្ណៈ អភិបាលស្រុកកោះសូទិន បានឱ្យដឹងដែលថា
ឯកឧត្តមអ៊ុន ចាន់ដា អភិបាលខេត្តរួមនឹងសហការីកាលពីរសៀលថ្ងៃទី ១៥ សីហា ២០២០ បានអញ្ជើញមកពិនិត្យការស្ថាបនាច្រាំងទន្លេនៅក្នុងឃុំពង្រ ស្រុកកោះសូទិន ដែលបានដំណើរការសាងសង់បានប្រមាណ៨០% ដោយធានាបានដល់ការធ្វើដំណើរតាមដងផ្លូវរបស់ប្រជាពលរដ្ឋនឹងលែងជាបញ្ហាចោទទៀតហើយ ។
អភិបាលស្រុកកោះសូទិនបញ្ជាក់ថា នេះ គឺជាការយកចិត្តទុកដាក់របស់អាជ្ញាធរពាក់ព័ន្ធគ្រប់លំដាប់ថ្នាក់ ដែលបានស្ថាបនាខឿនបេតុងច្រាំងទន្លេមិនអោយបាក់ដល់ផ្លូវថ្នល់ ។ ជាមួយនោះឯកឧត្តមអភិបាលខេត្ត ក៏មានផែនការ និងបូមសាច់ដាក់ទុបច្រាំងទន្លេមុខផ្សារជីហែ ក្នុងពេលខាងមុខ ដើម្បីការពារកុំឱ្យច្រាំងទន្លេបាក់ដល់លំនៅដ្ឋានរបស់ប្រជាពលរដ្ឋ ។ សមិទ្ធិផលដែលបានក៏កើតនេះធ្វើឱ្យប្រជាពលរដ្ឋសម្ដែងនូវអំណរសាទរ និងបានចាត់ក្រុមជាងឱ្យមកស្ថាបនាច្រាំងទន្លេទាន់ពេលវេលា៕
ចែករំលែកព័តមាននេះ