ខេត្តត្បូងឃ្មុំ ៖ ទោះបីជាសហភាពអឺរ៉ុប(EU) បានប្រកាសផ្ដាច់ប្រព័ន្ធអនុគ្រោះពន្ធ
(EBA)២០%ក៏ដោយ សម្ដេចក្រឡាហោម ស ខេង ឧបនាយករដ្ឋមន្ដ្រី រដ្ឋមន្ដ្រីក្រសួង មហាផ្ទៃបានបញ្ជាក់ថា កម្ពុជានៅតែរក្សាជំហរទំនាក់ទំនងល្អជាមួយសហគមន៍អឺរ៉ុប(EU)ដដែល ។
សម្តេចក្រឡាហោមបន្តថា ទោះបី EU ផ្ដាច់ប្រព័ន្ធអនុគ្រោះពន្ធលើគ្រប់មុខទំនិញលើកលែងតែគ្រឿងសព្វាវុធ(EBA)២០%ពីកម្ពុជាក៏ដោយ ក៏ទំនិញរបស់កម្ពុជានៅតែនាំទៅ EU បាន ។ថ្លែងក្នុងពិធីសម្ពោធដាក់ឲ្យប្រើប្រាស់ជាផ្លូវការទីតាំងនិងសមិទ្ធផលនានារបស់ស្នងការដ្ឋាននគរបាលខេត្ត កាលពីថ្ងៃទី១៣ ខែសីហា ឆ្នាំ២០២០ សម្ដេចក្រឡាហោម ស ខេង មានប្រសាសន៍ថា «EBA បានចូលជាធរមាន យើងដឹង
ហើយតាំងពីថ្ងៃទី១២ ខែសីហា ។
ប៉ុន្ដែយើងក៏មិនមានជំហរអ្វីប្លែកពីមុនទេ គឺនៅដដែល គឺយើងខិតខំប្រឹងដើម្បីជម្នះឧបសគ្គបញ្ហាប្រឈមទាំងឡាយ អត់មានជម្រើសក្រៅពីហ្នឹងទេ ។ មិនមែនយើងផ្ដាច់ ទំនាក់ទំនងជាមួយសហគមន៍អឺរ៉ុបទេ បានសេចក្ដីថាទំនាក់ទំនងជាមួយសហគមន៍អឺរ៉ុបនៅតែមានសារៈសំខាន់ ហើយយើងខិតខំបន្ថែមទៀត» ។
សម្ដេចក្រឡាហោម ថ្លែងទៀតថា ទំនិញរបស់កម្ពុជានាំយកទៅសហភាពអឺរ៉ុប គឺយកទៅបានគ្រាន់តែបង់ពន្ធប៉ុណ្ណោះ ក្នុងទំហំទឹកប្រាក់២០% ហើយ៨០%អត់បានបង់ពន្ធ ។ ដូច្នេះ ភាគីពាក់ព័ន្ធត្រូវរួមគ្នាដោះស្រាយ និងជម្នះរាល់ការលំបាកទាំងនោះ ដើម្បីរក្សាកំណើនសេដ្ឋកិច្ច ឬស្ថិរភាពនយោបាយ ដែលទាក់ទងទៅនឹងបញ្ហា EBAនេះ ។
ទាក់ទិននឹងបញ្ហាទាំងនេះ ឯកឧត្តម ផៃ ស៊ីផាន អ្នកនាំពាក្យរាជរដ្ឋាភិបាល បានលើកឡើងថា រាជរដ្ឋាភិបាលកម្ពុជានៅតែរក្សាជំហរដដែលឥតកែប្រែ គឺត្រូវការពាររដ្ឋធម្មនុញ្ញដោយមិនយកអធិបតេយ្យភាព និងឯករាជ្យកម្ពុជាទៅដោះដូរជាមួយជំនួយ ឬប្រព័ន្ធអនុគ្រោះពន្ធណាមួយឡើយ ។ ជាពិសេស កម្ពុជាមិនលុតជង្គង់សុំទានគេជាដាច់ខាត ។
សូមជម្រាបថា កាលពីថ្ងៃទី១២ សីហា ឆ្នាំ២០២០ EUបានចេញសេចក្តីថ្លែងការណ៍ចំនួន២ទំព័រស្តីពីការកាត់២០% ។ សេចក្តីថ្លែងការណ៍លើកឡើងថា «ការកាត់នេះដោយសារតែព្រួយបារម្ភពីការរំលោភសិទ្ធិមនុស្សនៅកម្ពុជា និងមានភាពផុយស្រួយផ្នែកប្រជា ធិបតេយ្យជាដើម» ៕
ចែករំលែកព័តមាននេះ