ខេត្តកំពង់ឆ្នាំង ៖ បុរសម្នាក់បានធ្លាក់ទឹកទន្លេបាត់ខ្លួនជាង២ម៉ោង ទើបក្រុមគ្រួសាររកសពឃើញ ដែលក្នុងហេតុការណ៍គ្រោះថ្នាក់ចរាចរណ៍នេះបានកើតឡើងនៅវេលាម៉ោង៧ និង១៥ នាទីព្រឹក ថ្ងៃទី១៤ ខែសីហា ឆ្នាំ២០២០ នៅចំណុច ចុងព្រែកដីដុល ស្ថិតនៅភូមិកណ្ដាល សង្កាត់ផ្សារឆ្នាំង ក្រុងកំពង់ឆ្នាំង ។
សមត្ថកិច្ចនគរបាល ការិយាល័យចរាចរណ៌ផ្លូវទឹក ខេត្តកំពង់ឆ្នាំងបានអោយដឹងថា ៖ ជនរងគ្រោះមានឈ្មោះ ពីន ម៉ៅ អាយុ២៦ឆ្នាំ មានទីលំនៅភូមិកំពង់បឹង ឃុំកំពង់ហាវ ស្រុកកំពង់លែង ។
មុនពេលកើតហេតុជនរងគ្រោះបានបើកកាណូតបាឡាស្មាច់១គ្រឿងត្រឡប់ពីផ្សារឆ្នាំង បំណងទៅផ្ទះវិញ លុះមកដល់ចំណុចកើតហេតុក៏បានបុកជាមួយនឹងកាណូតបាឡាស្មាច់មួយគ្រឿងទៀត ដែលបើកបរដោយឈ្មោះ ខុន សុជា អាយុ២៤ឆ្នាំ មានទីលំនៅភូមិកំពង់បឹង ឃុំកំពង់ហៅ ក្នុងទិសដៅច្រាស់គ្នា យ៉ាងពេញទំហឹង បណ្ដាលឱ្យជនរងគ្រោះបោកក្បាលត្រូវ និងក្បាលកាណូត ភាគីម្ខាងទៀត ធ្លាក់លិចទៅក្នុងទឹកបាត់ជាង ២ ម៉ោង គឺនៅម៉ោងជាង៩ ព្រឹកថ្ងៃដដែលទើបក្រុមគ្រួសាររកសពជនរងគ្រោះឃើញ ។
ប្រភពដដែលបានបន្តថា ៖ ក្រោយពេលកើតហេតុ អ្នកបើកបរកាណូតភាគីម្ខាងទៀត មិនមានរងរបួសទេ តែភ័យពេកក៏បើកកាណូតរត់មកសំដៅនៅការិយាល័យចរាចរណ៍ផ្លូវទឹក ដើម្បីប្រគល់ខ្លួនឱ្យសមត្ថកិច្ច នគរបាលតែម្តង ព្រោះខ្លាចមានអំពើហិង្សាកើតឡើង ។
សពជនរងគ្រោះត្រូវបានសមត្ថកិច្ចប្រគល់ជូនទៅក្រុមគ្រួសារធ្វើបុណ្យតាមប្រពៃណី ។ ចំណែកមធ្យោបាយកាណូតបាឡាស្មាច់ទាំង២គ្រឿង ត្រូវបាននគរបាលការិយាល័យចរាចរាចរណ៍ ផ្លូវទឹកយកមករក្សាទុក ដើម្បីរង់ចាំការដោះស្រាយតាមនីតិវិធី ៕
ចែករំលែកព័តមាននេះ