ខេត្តព្រៃវែង ៖ ប្រជាពលរដ្ឋនៅស្រុកពោធិ៍រៀង បានត្អូញត្អែថា ប៉ុន្មានថ្ងៃមកនេះ ក្នុងភូមិស្រុករបស់ពួកគាត់មានរថយន្តដឹកទំនិញប្រភេទយីឌុបធំៗជាច្រើនគ្រឿង បានបើកឆ្លងកាត់ភូមិរបស់ពួកគាត់រាល់ថ្ងៃ ធ្វើអោយផ្លូវលំក្នុងភូមិរបស់ពួកគាត់ ត្រូវស្រុតខូចជាច្រើនកន្លែង និងបង្កផលប៉ះពាល់ដល់ការរស់នៅរបស់ពួកគាត់ជាខ្លាំង។
ប្រជាពលរដ្ឋខាងលើបានអោយដឹងថា កន្លងមកក្រុមរថយន្តទាំងនោះ បើកបរនៅលើកំណាត់ផ្លូវជាតិលេខ៨អា មិនដែលបើកកាត់តាមផ្លូវលំក្នុងភូមិរបស់ពួកគាត់ឡើយ ប៉ុន្តែថ្មីៗនេះ ក្រោយពីស្ថានីយជញ្ជីងនៅលើកំណាត់ផ្លូវជាតិលេខ៨អា ត្រង់ចំណុចឃុំព្រៃព្នៅ ស្រុកពារាំង មានការរឹតបន្តឹងខ្លាំង ស្រាប់តែក្រុមរថយន្តទាំងនោះនាំគ្នាបើកវាងជញ្ជីង ចូលមកក្នុងភូមិរបស់ពួកគាត់តែម្តង ហើយរថយន្តទាំងនោះភាគច្រើនគឺក្រុមរថយន្ត ដែលមានបិទអក្សរ L.M.H ។
ដោយឡែកប្រជាពលរដ្ឋទាំងនោះ បានបញ្ជាក់ប្រាប់ថា ក្រុមរថយន្តយីឌុបទាំងនោះ គឺមកពីកន្លែងផ្សេងៗគ្នា ប៉ុន្តែពេលមកដល់ស្រុកស្វាយអន្ទរ ក៏បត់ចូលផ្លូវតែមួយគឺផ្លូវចូលស្រុកពោធ៌រៀង ហើយចាក់ឡើងទៅលើផ្លូវជាតិលេខ៨អា ត្រង់ចំណុចផ្សារស្នាយពល ក្នុងស្រុកពារាំង ដោយវាងគេចមិនចូលថ្លឹងនៅក្នុងស្ថានីយជញ្ជីងនៅឃុំព្រៃព្នៅនោះទេ។
តាមប្រភពខាងលើបានបន្តថា វត្តមានរបស់ក្រុមរថយន្តទាំងនោះ មិនត្រឹមតែធ្វើអោយខូចផ្លូវនិងស្ពាននៅក្នុងភូមិនោះទេ ប៉ុន្តែក៏ធ្វើអោយប្រជាពលរដ្ឋមានការព្រួយបារម្ភជាខ្លាំង អំពីសុវត្ថិភាពកូនចៅរបស់ខ្លួន ព្រោះក្រុមរថយន្តទាំងនោះ បើកលឿនខ្លាំងណាស់ ហាក់មិនខ្វល់ពីអ្នកស្រុកដែលរស់នៅតាមបណ្តោយផ្លូវសោះឡើយ ដូច្នេះហើយទើបពួកគាត់សំណូមពរដល់អាជ្ញាធរស្រុកខេត្ត ក៏ដូចជាមន្ទីរសាធារណៈការខេត្តព្រៃវែង មេត្តាជួយអន្តរាគមន៍ទប់ស្កាត់រថយន្តខ្នាតយក្សទាំងនោះផង។
លោក អ៊ុន សុធា ប្រធានមន្ទីរសាធារណៈការ និងដឹកជញ្ជូនខេត្តព្រៃវែង បានអោយដឹងថា បញ្ហាខាងលើនេះ ខាងអាជ្ញាធរស្រុកពោធ៌រៀង ក៏បានរាយការណ៌មករូបលោកដែរ ហើយលោកបានបញ្ជាក់ថា ក្រុមរថយន្តទាំងនោះគឺសុទ្ធតែដឹកលើសទំងន់ខ្លាំង ទើបនាំគ្នាបើកវាងគេចជញ្ជីង ហើយលោកបានស្នើអោយខាងអាជ្ញាធរស្រុក សុំគោលការណ៌ទៅលោកអភិបាលខេត្ត ដើម្បីដាក់បារ៉ាស់កាត់ថ្នល់ នៅចំណុចគល់ស្ពានកំពង់ខ្សាច់ ដើម្បីកុំអោយរថយន្តទាំងនោះអាចឆ្លងកាត់បានទៀត ប៉ុន្តែចំពោះមុខពេលនេះ គឹមិនទាន់អាចចុះធ្វើភ្លាមៗទេ គឺអាចត្រូវរង់ចាំដល់ផុតថ្ងៃសំរាក ដែលរាជរដ្ឋាភិបាលបានសង ជំនួសថ្ងៃចូលឆ្នាំសិន៕ (កែសម្រួលដោយ ៖ ធីតា)
ចែករំលែកព័តមាននេះ