រាជធានីភ្នំពេញ ៖ តារាសម្តែង និងជាតារាចម្រៀងអ្នកនាង ទូច ស្រី ល័ក្ខ បានធ្វើអោយមហាជនអ្នកគាំទ្រមានការរន្ធត់ចិត្តជាខ្លាំង ទៅលើក្រុមគ្រួរសាររបស់អ្នកនាង ក្រោយពីរូបនាងផ្ទាល់សម្រេចចិត្តទម្លាយមូលហេតុពិតដែលឈានដល់ការលែងលះបែកបាក់គ្រួសារ ។
ចំណងស្នេហ៍អាពាហ៍ពិពាហ៍របស់តារាចម្រៀងស្រីពេញទៅដោយសមត្ថភាពរូបនេះ ជាមួយនឹងស្វាមីជាជនជាតិហូឡង់ ត្រូវបានមហាជនអ្នកគាំទ្របានដឹងពីការបែកបាក់រវាងអ្នកទាំង២ ក្រោយពីកញ្ញាទូច ស្រីល័ក្ខ បង្ហោះសារក្នុងបណ្តាញសង្គមជាបន្តបន្ទាប់ថា ខ្លួនជាស្ត្រីមេម៉ាយពេញៗមាត់ និងលែងលះដាច់ស្រេចគ្នា ចាប់តាំងពីខែឧសភា ឆ្នាំ២០២០ កន្លងទៅនេះ ។
ជុំវិញនៃការឈានដល់ការបែកបាក់គ្រួសារ និងបានបន្សល់នូវចំណងស្នេហ៍កូនប្រុសមួយនោះ អ្នកនាង ទូច ស្រីល័ក្ខ មិនបានប្រាប់មហាជនអោយបានដឹងពីមូលហេតុពិតប្រាកដពីការលែងលះនោះទេ រហូតមកដល់ពេលនេះទើបរូបនាងដាច់ចិត្តទម្លាយមូលហេតុ ពីក្រោយខ្នងពីជីវិតគ្រួសាររបស់នាងថា « ប្អូនពៅរបស់ខ្ញុំតែងតែសួរខ្ញុំថា ហេតុអីបានជា ខ្ញុំអាចឈរបានដោយគេឆក់យកអតីតគ្រួសាររបស់ខ្ញុំហើយ រូបខ្ញុំនៅឡើយមិនតបត? ប្រុសដែលថ្លៃ គឺគ្មានថ្ងៃធ្វើអោយប្រពន្ធខ្លួនទឹកភ្នែកស្រែករកប្តីរាល់យប់ រូបខ្ញុំសុខចិត្តដេកអោបទុក្ខជាច្រើនឆ្នាំរង់ចាំបើកទ្វារអោយគេជាប្តី មិនដែលស្គាល់ថា ដេកចាយលុយបំផ្លាញ រឺក៏មានមិត្តភក្តិចូលបារ រឺក៏ទៅបង្កបញ្ហាអោយគ្រួសារមានទុក្ខ ។
នៅសុខៗស្រីរបស់គេមកបរិហារកេរ្តិ៍ខ្ញុំជាប្រពន្ធដោយបំពាន ហ៊ានធ្វើឲ្យរូបខ្ញុំនឹងកូនទទួលបាន ការរងទុក្ខជាច្រើនឆ្នាំ រូបខ្ញុំក៏កើតជំងឺ វិបិត្តផ្លូវចិត្តខ្លាចនឹងជួបមនុស្សបែបនេះទៀត ។ ព្យាយាមកែហើយគេចពីផ្លូវដែលឈឺមួយនេះ រូបខ្ញុំបានទទួលអីខ្លះ ក្រៅពីទុក្ខលំបាកក្រោយពីគេឆក់យកអតីតប្តីយើងទាំងដែលយើងមិនដឹងថា គេរួមគំនិតក្បត់យើងជាប្រពន្ធ ទុក្ខដែលធ្ងន់ គឺត្រូវប្រឈម និងបង្ហាញដែលគាត់បានបន្សល់ទុកអោយខ្ញុំជាអ្នករ៉ាប់រង គេជាប្រុសគេសប្បាយសាងសងជាមួយស្រីថ្មីរបស់គេ មួយម៉ាត់ក៏មិនដែលតេរកកូន គឺគ្មានសោះ! មួយរយរៀលខ្មែរក៏មិនដែរផ្តល់អោយកូនប្រុសដែលជាឈាមរបស់គាត់ដែរ ខ្ញុំឈឺណាស់តែខ្ញុំមិនទាមទារខ្ញុំសូមលើកដៃបន់ផ្សងកុំអោយជីវិតរបស់ខ្ញុំជួបនឹងមនុស្សប្រុសដែរហ៊ានប្រហារចិត្តខ្ញុំដូចនេះទៀត»។
មូលហេតុនៃការប្រាប់មហាជនអោយបានដឹងពីការផិតក្បត់របស់អតីតស្វាមីរបស់តារាចម្រៀងស្រីរូបនេះ ពីព្រោះពេលនេះរូបនាងផ្ទាល់កំពុងតែសប្បាយរីករាយក្នុងជីវិតប្រចាំថ្ងៃ ទើបរូបនាងហ៊ានបើកចិត្តនិយាយប្រាប់ពីទុក្ខរបស់អ្នកនាងនាពេលកន្លងមកនេះ។
គួរបញ្ជាក់ផងដែរថា បន្ទាប់ពីលែងលះលែងគ្នាជាមួយនឹងស្វាមីដាច់ស្រេច កាលពីពេលថ្មីៗកន្លងមកនេះ រូបនាងផ្ទាល់បានសម្រេចចិត្តចិត្តរស់នៅជាមួយនឹងកូនប្រុស និងបានមើលថែផ្ដល់ភាពកក់ក្ដៅចំពោះកូនបើទោះបីជាមិនមានស្វាមីចាំថែរក្សា ៕
ចែករំលែកព័តមាននេះ