ខេត្តសៀមរាប៖ ថ្ងៃទី១២ សីហា កម្លាំងអធិការដ្ឋាននគរបាលក្រុងសៀមរាប ប៉ុស្ដិ៍នគរបាលរដ្ឋបាលស្លក្រាម សហការជាមួយកម្លាំងនគរបាលព្រហ្មទណ្ឌកំរិតធ្ងន់នៃស្នងការដ្ឋាននគរបាលខេត្តសៀមរាប បានស្រាវជ្រាវរហូតមានការឈានដល់ឃាត់ខ្លួនជនសង្ស័យម្នាក់ ឈ្មោះ ណិប វណ្ណា ហៅព្រំ ភេទប្រុស អាយុ២៩ឆ្នាំ ជាកម្មករសំណង់ មានទីលំនៅបច្ចុប្បន្នភូមិបន្ទាយចាស់ សង្កាត់ស្លក្រាម ក្រុង- ខេត្តសៀមរាប ពាក់ព័ន្ធករណីអំពើលួចដោយមានស្ថានទម្ងន់ទោស (ប្រើប្រាស់អាវុធ) និងបទប្រើប្រាស់ដោយខុសច្បាប់នូវសារធាតុញៀន រួចយកមកការិយា ល័យ ជំនាញ សួរនាំ ដើម្បីរៀបចំកសាងសំណុំរឿងបញ្ជូនខ្លួនទៅកាន់តុលាការ។
បើតាមការបញ្ជាក់ពីលោកឧត្តមសេនីយ៍ត្រី ភឹង ចិន្តារ៉េត ស្នងការរងទទួលបន្ទុកផ្នែកការងារនគរបាលព្រហ្មទណ្ឌ នៃស្នងការនគរបាលខេត្តបានប្រាប់ថា កាលពី ថ្ងៃទី៧ សីហា ឆ្នាំ២០២០ វេលាម៉ោង០៩និង៣០នាទីយប់ ស្ថិតនៅក្រុមទី១២ ភូមិបន្ទាយចាស់សង្កាត់ស្លក្រាម ក្រុង-ខេត្តសៀមរាប មានជនរងគ្រោះឈ្មោះ ផែនទី ណារឹទ្ធ ស្រីស្រស់ ភេទស្រី អាយុ១៨ឆ្នាំ ជាសិស្សស្នាក់នៅបន្ទប់ជួលភូមិបន្ទាយចាស់ សង្កាត់ស្លក្រាម ក្រុង-ខេត្តសៀមរាប និងមិត្តភក្កិចំនួន៣នាក់ទៀត បាននាំគ្នាអង្គុយផឹកស៊ីនៅមុខបន្ទប់ជួលពេលនោះ ស្រាប់តែមានជនសង្ស័យចំនួន២នាក់ ដែលជាមនុស្សប្រុស អាយុប្រហែលជាង២០ឆ្នាំ មិនធ្លាប់ស្គាល់គ្នាបានធ្វើសកម្មភាពប្រើកាំបិតប៉័ងតោដេញកាប់ទៅលើជនរងគ្រោះ និងមិត្តភក្ដិរបស់គាត់ ហើយបាននាំគ្នារត់ចូលក្នុងបន្ទប់អស់ ខណៈពេលដែលជនរងគ្រោះ និងមិត្តភក្ដិ រត់ចូលក្នុងបន្ទប់ ភ្លេចយកទូរស័ព្ទចំនួន២គ្រឿងនៅកន្លែងតុអង្គុយផឹកស៊ី គឺទូរស័ព្ទម៉ាក iphone 8 plus ពណ៌ស និង ម៉ាក iphone 7 plus ពណ៌ផ្កាឈូក ពេលនោះ ត្រូវបានជនសង្ស័យទាំង២នាក់បានលួចយកទូរស័ព្ទទាំង២គ្រឿងហើយរត់គេចខ្លួនបាត់ ។
ក្រោយមក ជនរងគ្រោះក៏បានមកដាក់ពាក្យបណ្ដឹងនៅប៉ុស្តិ៍នគរបាលរដ្ឋបាលស្លក្រាម បន្ទាប់ពីទទួលពាក្យបណ្តឹងភ្លាម យើងបានចុះស្រាវជ្រាវជុំវិញកន្លែងកើតហេតុ និងកំណត់មុខ សញ្ញាបាន ។ លុះមកដល់ថ្ងៃទី១១ សីហា ឆ្នាំ២០២០ វេលាម៉ោង ៨ នាទីព្រឹក យើងបានធ្វើការនាំខ្លួនឈ្មោះ ចេវ ឧត្តម ហៅដំ ភេទប្រុស អាយុ៣៣ឆ្នាំ មុខបរបរកម្មករសំណង់ និង ប្អូនប្រុសបង្កើតរបស់គេឈ្មោះ ចេវ វិដេត ហៅតាក់ ភេទ ប្រុស អាយុ២៥ឆ្នាំ មុខរបរកម្មករសំណង់ ទាំងពីរនាក់មានទីលំនៅបច្ចុប្បន្នភូមិបន្ទាយចាស់ សង្កាត់ស្លរក្រាម ក្រុងសៀម រាប ហើយយើងបានធ្វើការឆែកឆេរនៅ ក្នុងបន្ទប់លើផ្ទះរបស់អ្នកទាំងពីរនាក់បាន ឃើញទូរស័ព្ទមួយគ្រឿង iphone 8plus ពណ៌ស ដែលជាទូរស័ព្ទរបស់ជនរងគ្រោះនៅក្នុងបន្ទប់លើផ្ទះរបស់ពួកគេ។ ក្រោយពីការសាកសួរអ្នកទាំងពីរអ្នកបានឆ្លើយសារភាពថា ទូរស័មួយគ្រឿងនេះរូបគេបានឃើញឈ្មោះ ណិប វណ្ណា ហៅព្រំ និង ប្អូនប្រុសបង្កើត របស់ពួកគេឈ្មោះ ចេវ ពិដោ ហៅតោ អាយុ ២៣ ឆ្នាំ បានយកមកបង្ហាញពួកគេ ប៉ុន្តែពួកគេមិនបានដឹងថា ទូរស័ព្ទមួយគ្រឿងខាងលើនេះបានមកពីណានោះទេ ។
លុះមកដល់ថ្ងៃទី ១២ ខែសីហា ឆ្នាំ២០២០ វេលាម៉ោង៩ នាទីព្រឹក យើងបានធ្វើការស្រាវជ្រាវនិងនាំខ្លួនឈ្មោះ ណិប វណ្ណា ហៅព្រំ មកធ្វើការសួរនាំ ក្រោយពីការសាកសួរឈ្មោះ ណិប វណ្ណា បានឆ្លើយសារភាពថារូបខ្លួននឹងឈ្មោះ ចែវ ពិដោ ហៅតោ ពិត ជាបានធ្វើសកម្មភាពប្រើកាំបិត តាំងតោដេញកាប់ជនរងគ្រោះ រួចហើយលួចយកទូរស័ព្ទរបស់ជនរងគ្រោះទាំងពីរគ្រឿងខាងលើពិតប្រាកដមែន ដោយទូរស័ព្ទមួយគ្រឿងម៉ាក 7 plus ពណ៌ផ្កាឈូក រូបគេនឹងឈ្មោះ ចេវ ពិដោរ យកទូរស័ព្ទមួយគ្រឿងទៀត ដែលពួកខ្លួនទុកចោលនៅក្នុងបន្ទប់លើផ្ទះរបស់ឈ្មោះ ចេវ ឧត្តម ហើយយើងបានធ្វើការដកហូតទូរស័ព្ទទាំងពីរគ្រឿងបានមកវិញ រួចធ្វើការប្រគល់ឱ្យជនរងគ្រោះយកទៅប្រើប្រាស់
វិញ។
ចំណែកជនសង្ស័យឈ្មោះ ចេវ ពិដោ បានរត់គេចខ្លួនបាត់ដោយមិនដឹងថា ទៅនៅទីណានោះទេ ។លោកបានបញ្ជាក់ថា ជនសង្ស័យ ត្រូវបានកម្លាំងជំនាញ រៀបចំ កសាងសំណុំរឿងតាមនីតិវិធី បញ្ជូនទៅសាលាដំបូងខេត្តសៀមរាប ដើម្បីធ្វើការផ្ដន្ទាទោសតាមច្បាប់។ ចំណែកវត្ថុតាង(ទូរស័ព្ទ) បានធ្វើការប្រគល់ឱ្យទៅជនរងគ្រោះយកទៅគ្រប់គ្រងថែរក្សានិងប្រើវិញជាធម្មតា៕
ចែករំលែកព័តមាននេះ