ខេត្តសៀមរាប៖ ពោលដោយមោទនភាព អភិបាលស្រុកបន្ទាយស្រីបានលើកឡើងថា ជំងឺឆ្លងកូវីដ ១៩ មិនមែនជាឧបសគ្គសម្រាប់រមណីយដ្ឋានសហគមន៍ទេសចរណ៍បឹងឈូកបន្ទាយស្រី ក្នុងការអភិវឌ្ឍនិងពង្រីកវិសាលភាពរបស់ខ្លួននោះទេ ។
អភិបាលស្រុកបន្ទាយស្រី លោក ឃីម ហ្វីណង់ បានឱ្យដឹងនៅថ្ងៃទី ១៣ ខែ សីហា បានលើកឡើងថា ប្រាក់ចំណូលកើនឡើងជិត៤០០% ក្នុងរយៈពេល១០ខែចុងក្រោយ ប្រែក្លាយពីសហគមន៍ដែលធ្លាប់តែខាតបង់រឺមិនទទួលបានប្រាក់ចំណេញ ទៅជាសហគ្រាសសង្គមមួយប្រកបដោយសក្តានុពលធំធេង សម្រាប់អភិវឌ្ឍសហគមន៍ ផ្តល់ការងារថ្មី បង្កើតមុខរបរបន្ថែម និងអនុញ្ញាតអោយសហគមន៍អាចមានមូលនិធិផ្ទាល់ខ្លួនដើម្បីការងារអភិរក្ស និងថែរក្សាផលប្រយោជន៍រួមរបស់សហគមន៍។
លោកអភិបាលស្រុកវ័យក្មេងរូបនេះ សហគមន៍ទេសចរណ៍បឹងឈូក គឺជាសហគមន៍បង្គោលមួយនៅក្នុងស្រុកបន្ទាយស្រី ដែលបានធ្វើការយ៉ាងជិតស្និតជាមួយរដ្ឋបាលស្រុកក្នុងពេលកន្លងមក ហើយដែលមានការរៀបចំរចនាសម្ព័ន្ធច្បាស់លាស់ លក្ខន្តិកៈពេញលេញ និងមានរបបប្រជុំ-សន្និបាតជាប្រចាំ។ ជាផ្នែកមួយនៃកិច្ចសហប្រតិបត្តិការនេះ ខ្ញុំត្រូវបានអញ្ជើញអោយចូលរួមនៅក្នុងសន្និបាតប្រចាំឆ្នាំរបស់សហគមន៍ ធ្វើការបូកសរុបលទ្ធផលក្នុងរយៈពេល ១០ខែចុងក្រោយ ក្នុងបរិបទមួយដែលសហគមន៍កំពុងធ្វើការសម្រេចចិត្តសំខាន់ៗជាយុទ្ធសាស្ត្រមួយចំនួន ដើម្បីចាប់យកសក្តានុពលនៃការរីកចម្រើននៃវិស័យទេសចរណ៍នៅក្នុងស្រុកបន្ទាយស្រី។
ចៃដន្យអី ១០ខែនេះក៏ជាពេលវេលាដែលខ្ញុំបានមកដល់ទឹកដីបន្ទាយស្រី និងបានមកស្គាល់បឹងដ៏ស្រស់ស្អាតទំហំ ១៦៧ ហិតាមួយនេះផងដែរ។ ដូច្នេះហើយទើបបានជាខ្ញុំបានឃើញដោយផ្ទាល់ភ្នែកពីការអភិវឌ្ឍរីកចម្រើនដ៏គួរអោយកោតសរសើររបស់សហគមន៍មួយនេះ។ ការអភិវឌ្ឍមួយដែលពោរពេញទៅដោយបរិយាប័ន្នគួរតែនាំមកជាមួយនូវភាពប្រសើរឡើងនៃជីវភាពប្រចាំថ្ងៃរបស់បងប្អូនប្រជាពលរដ្ឋ ហើយអ្វីដែលបាន និងកំពុងកើតឡើងនៅក្នុងសហគមន៍ដែលមានសមាជិកជិត២០០នាក់នេះ គឺជាគំរូនៃការអភិវឌ្ឍប្រកបដោយចីរភាពនៅក្នុងស្រុកបន្ទាយស្រី ដែលរដ្ឋបាលស្រុកគ្រោងនឹងយកគំរូជោគជ័យនៃសហគមន៍បឹងឈូកនេះ ដើម្បីកសាងនិងពង្រឹងសហគមន៍ផ្សេងៗទៀតនៅក្នុងស្រុកផងដែរ។
សូមបញ្ជាក់ថា សហគមន៍ទេសចរណ៍បឹងឈូកគឺជាប្រតិបត្តិករនៃរមណីយដ្ឋានបឹងឈូកបន្ទាយស្រី ដែលកំពុងទាក់ទាញភ្ញៀវទេសចរទៅលេងកម្សាន្ត ពី៥០០នាក់ ទៅ១០០០នាក់ ក្នុងមួយថ្ងៃៗ ដោយសារតែសម្រស់ធម្មជាតិព្រៃភ្នំដ៏ស្រស់ស្អាត ផ្ទៃបឹងធំល្វឹងល្វើយ ខ្យល់អាកាសល្អបរិសុទ្ធ មានរៀបចំជាខ្យូសបណ្តែតទឹក និងសេវាម្ហូបអាហារគ្រប់ប្រភេទ រួមនឹងការជិះទូកកម្សាន្តទស្សនាព្រៃកោងកាង សត្វស្លាប និងជីវៈចម្រុះច្រើនប្រភេទ។ សហគមន៍នេះក៏ត្រូវបានបង្កើតឡើងក្នុងគោលបំណងការពារថែរក្សា អភិរក្សជីវៈចម្រុះ និងពូជត្រីនៅក្នុងតំបន់នេះផងដែរ ៕ (កែសម្រួលដោយ ៖ ធីតា)
ចែករំលែកព័តមាននេះ