រាជធានីភ្នំពេញ ៖ នគរបាលម្នាក់មានឋានន្តរស័ក្តិឧត្តមសេនីយ៍ត្រី(ផ្កាយ១) ដែលគេស្គាល់ថាជាអនុប្រធាននាយកដ្ឋាន បានបង្កឱ្យមានការភ័យខ្លាចក្នុងហាងផឹកស៊ីមួយកន្លែងយីហោវិមានព្រិល ដោយការដកកាំភ្លើងខ្លីអាម៉េគំរាមដល់គូជម្លោះ ។ ដោយឃើញស្ថានការណ៍មិនស្រួល ក៏បានព្យាយាមរត់គេច ផ្អើលសមត្ថកិច្ចដេញតាមឆ្លងខណ្ឌចំការមន និងខណ្ឌច្បារអំពៅ ទើបឃាត់ខ្លួនបាននៅវេលាម៉ោង១និង១០នាទីរំលងអធ្រាត្រឈានចូលថ្ងៃទី១២ ខែសីហា ឆ្នាំ២០២០ ។
ហាងផឹកស៊ីយីហោវិមានព្រិល ស្ថិតនៅតាមបណ្ដោយផ្លូវ១៦៣ សង្កាត់ទួលទំពូង១ ខណ្ឌចំការមន មានម្ចាស់ហាងរូបស្រស់ត្រកាលឈ្មោះ លីលី ស្នាក់នៅផ្ទះ១៣៦ ជាហាងវិមានព្រិលនេះតែម្តង ។
ក្រោយកើតហេតុ មានអ្នកសារព័ត៌មានចុះផ្សាយព្រោងព្រាតថា«ខឹងលួងលោមសុំស្នេហ៍ស្ត្រីម្ចាស់ហាងវិមានព្រិល មិនបាន ដកកាំភ្លើងគំរាម»ខ្លះទៀតចុះផ្សាយថា«លេបខាយសម្ដីស្នេហាម្ចាស់ហាង រហូតឈានទៅទាស់គ្នាប្រើប្រាស់កាំភ្លើងគំរាម» ។ បន្ទាប់មកនៅល្ងាចថ្ងៃទី១២ សីហា ២០២០ កញ្ញាលីលី ម្ចាស់ហាងវិមានព្រិល បានចេញមកធ្វើការស្រាយបំភ្លឺ តាមការផ្សាយផ្ទាល់ដោយអះអាងថា «លោកផ្កាយមួយ មិនមែនសុំស្នេហ៍រូបនាងទេ ហើយក៏មិនបានរកបាញ់នាងខ្ញុំអីដែរ គាត់ជាបងប្រុសដែលស្គាល់គ្នាជាយូរមកហើយ ហើយមានរឿងនៅហាងនាងខ្ញុំ នាងខ្ញុំ គ្រាន់តែចូលមកបំភ្លឺទេ សុំអង្វរអស់លោកសារព័ត៍មានទាំងឡាយអើយ រឿងខ្លះអាចចុះទៅធ្វើអោយគេមានរឿង រឺអស់លោកសប្បាយចិត្តណាស់ ពេលឃើញខ្មែរដូចគ្នាឈ្លោះគ្នា ? ធ្វើជាអ្នកសារព័ត៏មាន ត្រូវដឹងរឿងអោយច្បាស់សិន មិនមែនចេះតែចុះទេ ធ្វើអោយខូចឈ្មោះនាងខ្ញុំអស់ នាងខ្ញុំសុំបញ្ចាក់ថា គាត់មិនបានសុំស្នេហ៍នាងខ្ញុំ ហើយក៏អត់បានញ៉ែនាងខ្ញុំអីដែរ ហើយក៏មិនបានរកបាញ់អីនាងខ្ញុំដែរ ។ សុំកុំយករូបនាងខ្ញុំផុសតទៀត ។ អស់លោកសារព័ត៌មាន កុំដោយសារប្រយយោន៍របស់ខ្លួន រួចបំផ្លាញអ្នកដទៃ» ។
លោកផ្កាយ១ ដែលដកកាំភ្លើងខ្លីគំរាមគេឯងត្រូវបានឱ្យដឹងថាឈ្មោះ ជិន សាមឺឌី ភេទប្រុស អាយុ៣២ឆ្នាំ មានតួនាទីអនុប្រធាននាយកដ្ឋានគ្រប់គ្រងសន្តិសុខឯកជន ក្រសួងមហាផ្ទៃ ។ ជាមួយនឹងការតាមឃាត់ខ្លួននៅវេលារំលងអធ្រាត្រនោះ
សមត្ថកិច្ចបានដកហូតកាំភ្លើងម៉ាកCF 98 មួយដើម និងរថយន្តឡិចស៊ីស RX400h ពណ៌ទឹកប្រាក់ ពាក់ផ្លាកលេខ នគរបាល 2-7119 មួយគ្រឿងផងដែរ ។
ប្រភពព័ត៌មានបានឱ្យដឹងថា មុនពេលកើតហេតុ គេបានឃើញលោកផ្កាយ១ បានចូលទៅផឹកស៊ីនៅភោជនីយដ្ឋាន វិមានព្រិល ដែលជាភោជនីយដ្ឋានទើបនឹងបើកសម្ពោធនៅយប់នោះតែម្តង ។ ខណៈពេលអង្គុយផឹកស៊ីបានបន្តិច ក៏មានការជះកំហឹងរហូតឌឺដងដាក់គ្នាជាមួយនឹងអ្នកដែលអង្គុយផឹកស៊ីនៅតុក្បែរគ្នានោះ ដែលគេដឹងថាជាសមត្ថកិច្ចដូចគ្នា ។ ភ្លាមៗនោះត្រូវបានស្ត្រីម្ចាស់ហាងនាំគ្នាឃាត់ ទើបលោកផ្កាយ១ដើរចេញហើយបើករថយន្តទៅក្រៅបាត់ ។
ប្រភពបានបន្តទៀតថា លុះមួយសន្ទុះក្រោយមក លោកផ្កាយ១បានបើករថយន្តរបស់ខ្លួនត្រឡប់មកវិញ ឈប់នៅមុខហាង ហើយបានដើរចូលមកក្នុងហាងវិញ និងដកកាំភ្លើងខ្លីអាម៉េគំរាមអ្នកនៅក្នុងហាងផឹកស៊ី តែមិនបានបាញ់ទេ។ គាប់ជួនពេលនោះកម្លាំងសមត្ថកិច្ចមូលដ្ឋានដែលល្បាតនៅទីនោះក៏បានបង្ហាញវត្តមានត្រៀមធ្វើអន្តរាគមន៍ ។ ដោយឃើញកងកម្លាំងច្រូងច្រាងលោកផ្កាយមួយតែម្នាក់ឯងបានព្យាយាមបើករថយន្តដើម្បីរត់គេច តែពេលនោះដែរ កម្លាំងសមត្ថកិច្ចបានបោះដៃតាមវិទ្យុទាក់ទងឱ្យគ្រប់បណ្ដាខណ្ឌជួយឃាត់តាមភិនភាគរថយន្តរហូតដល់ចំណុចផ្លូវជាតិលេខ១ ជិតសាលាអន្តរជាតិបែលធី សង្កាត់ច្បារអំពៅ១ ខណ្ឌច្បារអំពៅ ទើបឃាត់រថយន្ដ និងអ្នកបើកបរបាន ព្រមទាំងដកហូត អាវុធខ្លី ម៉ាក CF98 ពណ៌ខ្មៅ មួយដើម ហើយសមត្ថកិច្ចនាំខ្លួនបុរសខាងលើទៅធ្វើការសាកសួរនៅអធិការដ្ឋាននគរបាលខណ្ឌចំការមនតែម្ដង ។
ជុំវិញករណីខាងលើសង្ស័យរឿងប្រចណ្ឌនារីជាសង្សារលោកផ្កាយ១ ទើបផ្ទុះកំហឹងដកកាំភ្លើងខ្លីពីចង្កេះ ធ្វើចិត្តសឿងបង្កឱ្យមានការភ្ញាក់ផ្អើលទាំងកណ្តាលយប់ ។
តាមប្រភពព័ត៌មានពីនគរបាលបានប្រាប់ឱ្យដឹងថា បុរសក្លាហានដែលបានចាប់ឃាត់ខ្លួននេះឈ្មោះ ជិន សាមឺឌី អាយុ៣២ឆ្នាំ មានឋានន្តរសក្តិថ្នាក់ឧត្តមសេនីយ៍ត្រី(ផ្កាយ១) មានតួនាទីជាអនុប្រធាននាយកដ្ឋានគ្រប់គ្រងក្រុមហ៊ុនសន្តិសុខឯកជន នៃក្រសួងមាហាផ្ទៃ មានទីលំនៅផ្ទះលេខ១៥វេ ផ្លូវលេខ ១៩៥ ភូមិវាលស្បូវ សង្កាត់វាលស្បូវ ខណ្ឌច្បារអំពៅ រាជធានីភ្នំពេញ ។
ប្រភពបានបន្តថា មុនពេលកើតហេតុ លោកផ្កាយមួយវ័យក្មេងរូបនេះ បានជិះរថយន្តម៉ាក Lexus RX 400h ពណ៌ទឹកប្រាក់ ពាក់ស្លាកលេខនគរបាល២-៧១១៩ មួយគ្រឿង ដោយមិនដឹងមានអ្នកណាមកជាមួយខ្លះទេ ដោយគ្រាន់តែបានដឹងថាក្នុងចំណោមនោះ ក៏មាននារីម្នាក់ជាសង្សាររបស់គាត់មកផឹកស៊ីជាមួយដែរ ។
តាមប្រភពថា សង្សារលោកផ្កាយ១ជាមិត្តភក្តិថៅកែស្រីម្ចាស់ហាងនេះដែរ ។
តាមប្រភពដដែលបានប្រាប់បន្តទៀតថា លុះដល់វេលារំលងអធ្រាត្រ ទំនងជាម្នាក់ៗសុទ្ធតែមានសភាពស្រវឹងរៀងៗខ្លួន លោកផ្កាយ១ ជាអនុប្រធាននាយកដ្ឋានក៏មានការទាស់សម្តីគ្នាជាមួយនឹងនារីជាសង្សារបស់ខ្លួនទំនងជារឿងប្រចណ្ឌ ក៏បានដកកាំភ្លើងខ្លីម៉ាក CF 98 មួយដើម ចេញពីចង្កេះមកអាម៉េ តែមិនមានការបាញ់បោះអ្វីទេ ក៏ធ្វើឱ្យមានការភ្ញាក់ផ្អើលកើតឡើងតែម្តង ។
ការផ្ទុះកំហឹងនិងដកកាំភ្លើងសម្ញែង ក្នុងហាងបែបនេះដោយលោកផ្កាយ១ រហូតកម្លាំងមានសមត្ថកិច្ចតាមឃាត់ខ្លួននាំមកកាន់អធិការដ្ឋានខណ្ឌចំការមន ហើយក៏បានបញ្ជូនបន្តទៅកាន់នាយកដ្ឋានគ្រប់គ្រងក្រុមហ៊ុនឯកជននៃក្រសួងមហាផ្ទៃ ដែលជាអង្គភាពរបស់លោកដើម្បីចាត់ ការទៅតាមវិន័យរបស់កងកម្លាំង ក្រោយពីនារីជាម្ចាស់ហាងដ៏ស្រស់សោភាក៏បានចូលខ្លួនមកបំភ្លឺពីហេតុការណ៍នេះដែរ ៕
អត្ថបទសរសេរ ដោយ
អត្ថបទសរសេរ ដោយ
ចែករំលែកព័តមាននេះ