ខេត្តបន្ទាយមានជ័យ ៖ មនុស្សយ៉ាងតិចជិត១០នាក់ស្លាប់និងរបួស ក្នុងឧបទ្ទវហេតុក្រឡាប់រថយន្តដងសន្ទូចធ្លាក់ផែនស៊ីម៉ង់ត៍ទាំងផ្ទាំងសង្កត់លើ បង្កឱ្យមានការភ្ញាក់ផ្អើលនៅក្រុងប៉ោយប៉ែតនារសៀល ថ្ងៃទី១២ សីហា ២០២០ នៅភូមិគីឡូម៉ែត្រលេខ៤ សង្កាត់ផ្សារកណ្តាល…
ខេត្តបន្ទាយមានជ័យ ៖ មនុស្សយ៉ាងតិចជិត១០នាក់ស្លាប់និងរបួស ក្នុងឧបទ្ទវហេតុក្រឡាប់រថយន្តដងសន្ទូចធ្លាក់ផែនស៊ីម៉ង់ត៍ទាំងផ្ទាំងសង្កត់លើ បង្កឱ្យមានការភ្ញាក់ផ្អើលនៅក្រុងប៉ោយប៉ែតនារសៀល ថ្ងៃទី១២ សីហា ២០២០ នៅភូមិគីឡូម៉ែត្រលេខ៤ សង្កាត់ផ្សារកណ្តាល ក្រុងប៉ោយប៉ែត ។
ជនរងគ្រោះក្នុងហេតុការណ៍ដ៏រន្ធត់នេះមាន៩នាក់ ក្នុងនោះស្លាប់៥នាក់របួសស្រាលធ្ងន់៤នាក់រួមមាន៖១-ឈ្មោះ ឈាង ហុង អាយុ៤៩ឆ្នាំ ២-ឈ្មោះ ចៅ លី អាយុ៥០ឆ្នាំ ៣-ឈ្មោះ សេង មុយគា អាយុ៥៧ឆ្នាំ ៤-ឈ្មោះ ឡឹក អាយុ៦៦ឆ្នាំ ៥-ឈ្មោះ ឌឹម ស្រីណាក់ អាយុ៣៦ឆ្នាំ (ទាំង៥នាក់ខាងលើស្លាប់) ៦-ឈ្មោះ កា សុម៉ាមាន ៧-ឈ្មោះ កាន់ ចាន់ឌី អាយុ២៧ឆ្នាំ ៨-ឈ្មោះ ផន សុខធីតា និង៩-ឈ្មោះ សៅ រិទ្ធ អាយុ៤០ឆ្នាំ ។ ជនរងគ្រោះទាំងអស់ជាអ្នករស់នៅក្រុងប៉ោយប៉ែត ។
ប្រភពបាននិយាយថា មុនកើតហេតុនៅចំណុចអគារការដ្ឋានសំណង់The park cityមានការស្ទូចផែនស៊ីម៉ង់ត៍១ផ្ទាំងធំឡើងលើ សម្រាប់ធ្វើជញ្ជាំង ប៉ុន្តែជាអកុសលស្រាប់តែរថយន្តដងសន្ទូចដ៏ធំវែងក្រឡាប់ដេកស្ដូក បណ្តាលឲ្យធ្លាក់ផ្ទាំងស៊ីម៉ង់ត៍នោះ ចំមនុស្សប្រុសស្រីមួយក្រុម ដែលកំពុងអង្គុយលេងល្បែងមុខផ្ទះអ្នកស្រុក ជាប់នឹងរបងអគារការដ្ឋានសំណង់ខាងលើ បណ្តាលឲ្យស្លាប់ និងរបួសមនុស្សជាច្រើននាក់ និងមានការភ្ញាក់ផ្អើលមនុស្សចោមរោមមើលយ៉ាងកកកុញ ពោរពេញទៅដោយក្ដីរន្ធត់នៃសោកនាដកម្មនេះ ។
ក្រោយហេតុការណ៍កើតឡើង ខាងក្រុមហ៊ុនបានយកគ្រឿងចក្រស្ទូចផ្ទាំងស៊ីម៉ង់ត៍ ដែលសង្កត់លើជនរងគ្រោះចេញពីចំណុចកើតហេតុ ហើយអាជ្ញាធរខេត្ត និងក្រុងប៉ោយប៉ែត ដឹកនាំកម្លាំងចម្រុះចុះទៅកាន់ទីនោះភ្លាមៗដើម្បីជួយសង្គ្រោះ និងដឹកអ្នករបួសទៅកាន់មន្ទីរពេទ្យ ។ គេមិនទាន់ដឹងថា ខាងក្រុមហ៊ុនម៉ៅការសំណង់នៅទីតាំងThe park city និងមានដំណោះស្រាយយ៉ាងណាចំពោះជនរងគ្រោះនោះទេ ព្រោះភ្លាមៗមិនអាចទាក់ទងសុំការបំភ្លឺបាន នៅឡើយទេ ។
មន្ត្រីកងរាជអាវុធហត្ថក្រុងប៉ោយប៉ែតបានប្រាប់ថា ក្រោយឧបទ្ទវហេតុនេះបានឃាត់ខ្លួនមនុស្ស២នាក់ ម្នាក់ឈ្មោះ លី វីន ភេទប្រុសអាយុ២០ឆ្នាំ (ជាអ្នកបើកបររថយន្តស្ទូចកង់ច្រវាក់ ឬហៅក្រែន) រស់នៅស្រុកកំពង់ត្របែក ខេត្តព្រៃវែង និងម្នាក់ទៀតឈ្មោះ អុីន ហេង ភេទប្រុស អាយុ៦៥ឆ្នាំ (ជាមេការសំណង់) មានស្រុកកំណើតស្រុកចំការលើ ខេត្តកំពង់ចាម និងរស់នៅរាជធានីភ្នំពេញ ។
មន្ត្រីកងរាជអាវុធហត្ថដដែលឱ្យដឹងទៀតថា ជញ្ជាំងបេតុងដែលធ្លាក់សង្កត់មានទំហំ៤ម៉ែត្រគុណនឹង៦ម៉ែត្រ មានទម្ងន់៨តោន គឺស្ទូចដាក់នៅជាន់ទី២ ដែលមានកម្ពស់២០ម៉ែត្របានក្រឡាប់ទៅផ្នែកខាងកើតអគារបុរី បណ្តាលឱ្យធ្លាក់ សង្កត់សំយាបផ្ទះនៅខាងកើតការដ្ឋាន ដែលនៅទីនោះមានមនុស្សមួយក្រុមកំពុងអង្គុយលេងបៀ ។ មន្ត្រីអាវុធហត្ថបានបញ្ជាក់ថា នៅកន្លែងកើតហេតុក្រៅពីស្លាប់និងរបួស សំយាបផ្ទះដែលជញ្ជាំងបេតុងសង្កត់ក៏បាក់ដល់ដី ។ ចំណែកចុងដងសន្ទូចក៏ធ្លាក់សង្កត់ចំដំបូលផ្ទះ១ខ្នងទៀតនៅផ្នែកខាងកើតអគារបុរីដែលកំពុងសាងសង់នេះដែរ ៕
ចែករំលែកព័តមាននេះ