ខេត្តរតនគិរី ៖ អនុវត្តតាមអនុសាសន៍ដ៏ខ្ពង់ខ្ពស់របស់សម្តេចកិត្តិព្រឹទ្ធបណ្ឌិតប៊ុន រ៉ានី ហ៊ុន សែន ប្រធានកាកបាទក្រហមកម្ពុជាក្នុងការជម្រុញលើកទឹកចិត្តឲ្យស្ត្រីជាមាតាគ្រប់រូបមកសម្រាលកូននៅមណ្ឌលសុខភាព
ខេត្តរតនគិរី ៖ អនុវត្តតាមអនុសាសន៍ដ៏ខ្ពង់ខ្ពស់របស់សម្តេចកិត្តិព្រឹទ្ធបណ្ឌិតប៊ុន រ៉ានី ហ៊ុន សែន ប្រធានកាកបាទក្រហមកម្ពុជាក្នុងការជម្រុញលើកទឹកចិត្តឲ្យស្ត្រីជាមាតាគ្រប់រូបមកសម្រាលកូននៅមណ្ឌលសុខភាពដោយគ្រូពេទ្យជំនាញនោះ នៅព្រឹកថ្ងៃទី៩ កុម្ភៈ ២០១៥ លោក ឌឹម ណាត នាយកសាខាកាកបាទក្រហមខេត្តរតនគិរី និងសហការីបាននាំយកអំណោយរួមមាន ឃីត២កញ្ចប់ផ្តល់ជូនស្ត្រីពីរនាក់ដែលមកសម្រាលកូននៅមណ្ឌលសុខភាពឃុំកិចុង ស្រុកបរកែវ ខេត្តរតនគីរី។
ស្ត្រីទាំងពីរដែលមកសម្រាលកូននៅមណ្ឌលសុខភាពខាងលើទី១-ឈ្មោះ រចំ បូឡា រស់នៅភូមិរ៉យ ទី២-ឈ្មោះ ក្វាស អំផឿស ជនជាតិទំពួន ស្ត្រីខាងលើសំរាលបានកូនស្រីដូចគ្នា ហើយទារកទាំងពីរមានសុខភាពល្អណាស់ នេះបើតាមការបញ្ជាក់ពីប្រធានមណ្ឌលសុខភាព ។
លោកឌឹម ណាត មានប្រសាសន៍ថា ចាប់ពីឆ្នាំ២០១៥នេះតទៅ សាខាកាកបាទក្រហមខេត្តនឹងធ្វើការផ្តល់ជូននូវស្ត្រីជាមាតាគ្រប់រូបនៅតាមជនបទដាច់ស្រយាលដែលបានអញ្ជើញមកសម្រាលកូននៅមណ្ឌលសុខភាព នូវឃីតមួយសម្រាប់ដល់ទារក មានមុង ភួយ ខ្នើយ សាប៊ូ និងម្សៅ ។ លោកបន្តថា ការផ្តល់ឃីតសំរាប់ទារកនេះគឺអនុវត្តតាមអនុសាសន៍របស់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជាដើម្បីលើកទឹកចិត្តដល់ស្ត្រីជាមាតាឲ្យមកទទួលយកសេវាសម្រាលកូននៅតាមមណ្ឌលសុខភាពដើម្បីកាត់បន្ថយមរណភាពមាតា និងទារក ។
លោក ឌឹម ណាត បានផ្តាំផ្ញើដល់ស្ត្រីក្រោយសំរាលកូនទាំងពីរ សូមថែទាំសុខភាពឱ្យបានល្អ និងសូមជួយផ្សព្វផ្សាយបន្តដល់ស្ត្រីជាមាតាក្នុងសហគមន៍ បើមានបុត្រសូមមកសម្រាលនៅមណ្ឌលសុខភាពឱ្យបានគ្រប់ៗគ្នា នឹងទទួលបានឃីតសម្រាប់ទារកពីសាខាកាកបាទក្រហមខេត្តដូចគ្នា ៕
ចែករំលែកព័តមាននេះ