ខេត្តព្រៃវែង ៖ ហេតុការណ៍គ្រោះថ្នាក់ចរាចរណ៍គួរឲ្យរន្ធត់មួយ បានបង្កឲ្យមានការភ្ញាក់ផ្អើលទាំងព្រឹកព្រលឹម នៅទីប្រជុំជនអ្នកលឿង ដោយរថយន្តបែនដឹកដីមួយគ្រឿង បានបោលបុកចូលផ្ទះអ្នកស្រុកដែលនៅក្បែរផ្លូវ បណ្តាលឲ្យបាក់សសរសំយាបផ្ទះអស់១ដើម និងបែកថូផ្កាអស់២ តែមិនបណ្តាលឲ្យមានគ្រោះថ្នាក់ដល់នរណាម្នាក់នោះទេ ។
ហេតុការណ៍នេះ កើតឡើងកាលពីវេលាម៉ោងប្រមាណ៧ព្រឹកថ្ងៃទី១២ ខែសីហា នៅអតីតកំ
ពង់ចម្លងអ្នកលឿងត្រើយខាងកើត ក្នុងភូមិ៣ ឃុំព្រែកខ្សាយ«ខ» ស្រុកពាមរក៍ ។ រថយន្តបែនដឹកដីខាងលើ ពាក់ផ្លាកលេខ ភ្នំពេញ ៣C-០៣០០ បើកបរដោយបុរសម្នាក់ឈ្មោះ ផែ វី ហៅបា
រាំង អាយុ៣៩ឆ្នាំ មានទីលំនៅក្នុងឃុំពាមរក៍ ស្រុកពាមរក៍ ខេត្តព្រៃវែង ។
ចំណែកផ្ទះដែលត្រូវរថយន្តកបុកខូចខាតមានចំនួន៣ផ្ទះ ដែលផ្ទះទី១បែកថូផ្កា និងរានព្រះភូមិ ម្ចាស់ផ្ទះឈ្មោះ ម៉ៅ ចន្ថា ភេទស្រី អាយុ៤៨ឆ្នាំ ។ ផ្ទះទី២និងទី៣ខូចខាតសសរផ្ទះ(សសរ១រួមគ្នា) ។ ម្ចាស់ផ្ទះទី២ឈ្មោះ លីវ ចាង ភេទប្រុស អាយុ៧៤ឆ្នាំ និងម្ចាស់ផ្ទះទី៣ឈ្មោះ ឈឿង
ទ័រ ភេទប្រុស អាយុ៥០ឆ្នាំ ។
ប្រភពព័ត៌មានពីម្ចាស់ផ្ទះបានឲ្យដឹងថា រថយន្តខាងលើធ្វើដំណើរមកកំពង់ចម្លង បត់ចូលមកតាមមាត់ទន្លេមុខផ្ទះរបស់ពួកគាត់ ហើយទំនងជាអ្នកបើកបរបួងចង្កូតខ្លាំងពេក ទើបជ្រុលក្បាលបុករះចូលផ្ទះរបស់ពួកគាត់តែម្តង ។ ក្រោយកើតហេតុភ្លាម សមត្ថកិច្ចក៏មកនាំអ្នកបើកបរ និងយករថយន្តយកទៅទុកនៅប៉ុស្តិ៍នគរបាលរដ្ឋបាលឃុំព្រែកខ្សាយ«ខ» ដើម្បីការពារកុំឲ្យមានការកកស្ទះចរាចរណ៍ ។
អ្នកបើកបររថយន្តនិយាយថា គ្រោះថ្នាក់នេះ មិនមែនបណ្តាលមកពីរូបគេបើកលឿនពេកនោះទេ គឺមកពីរថយន្តបែកកាប៉ែនហ្វ្រាំងកង់ក្រោយ ធ្វើឲ្យជាន់ហ្វ្រាំងមិនស៊ី ។ ភ្លាមៗនោះ រូបគេចង់ងាកក្បាលរថយន្តទៅខាងស្តាំដែរ តែខាងស្តាំដៃនោះមានសុទ្ធតែរថយន្តទំនើបជាច្រើនគ្រឿង ។ ដោយខ្លាចប៉ះរថយន្តគេ ទើបបង្ខំចិត្តបុកចូលផ្ទះអ្នកស្រុកដែលនៅខាងឆ្វេងដៃនោះតែម្តងទៅ ។
រីឯខាងសមត្ថកិច្ចបានឲ្យដឹងថា ដោយសារគ្រោះថ្នាក់នេះមិនបណ្តាលឲ្យមានមនុស្សរបួស ឬស្លាប់ ដូច្នេះហើយទើបម្ចាស់ផ្ទះ និងភាគីខាងរថយន្តចរចាព្រមព្រៀងគ្នា ដោយឲ្យភាគីបង្កជួសជុលសងការខូចខាតដល់ម្ចាស់ផ្ទះវិញ ដើម្បីបញ្ចប់រឿង ៕
ចែករំលែកព័តមាននេះ