រាជធានីភ្នំពេញ ៖ នៅថ្ងៃទី១២ ខែសីហា២០២០នេះ សហភាពអឺរ៉ុបបានប្រកាសជាផ្លូវការក្នុងការដកប្រព័ន្ធអនុគ្រោះពន្ធលើ «គ្រប់មុខទំនិញលើកលែងសព្វាវុធ» ឬ Everything But Arms…
រាជធានីភ្នំពេញ ៖ នៅថ្ងៃទី១២ ខែសីហា២០២០នេះ សហភាពអឺរ៉ុបបានប្រកាសជាផ្លូវការក្នុងការដកប្រព័ន្ធអនុគ្រោះពន្ធលើ «គ្រប់មុខទំនិញលើកលែងសព្វាវុធ» ឬ Everything But Arms (EBA)នាំចូលទៅកាន់ទីផ្សារសហភាពអឺរ៉ុបចំនួន២០ភាគរយ តាមការសម្រេចកាលពីខែកុម្ភៈ ២០២០ ដោយហេតុថា កម្ពុជាបានរំលោភសិទ្ធិមនុស្សមានលក្ខណៈជាប្រព័ន្ធ ។ នេះបើយោងតាមប្រកាសព័ត៌មានរបស់សហភាពអឺរ៉ុបចេញថ្ងៃទី ១២ ខែសីហា ឆ្នាំ២០២០ ។
យ៉ាងណាមិញ លោកកាំង ម៉ូនីកា អគ្គលេខាធិការងសមាគមរោងចក្រកាត់ដេរកម្ពុជា ហៅកាត់ថា GMAC បានអោយដឹងថា GMAC មិនមានប្រតិកម្មអ្វីទេ ពាក់ព័ន្ធនឹងការដកEBA នេះ ក៏ប៉ុន្តែGMAC សម្ដែង ការសោកស្ដាយហើយយើងបានដឹងជាយូរហើយពីការដកប្រព័ន្ធអនុគ្រោះពន្ធ ។
លោកបាននិយាយថា «ការដកមានតែ៤០បន្ទាត់ពន្ធគយទេ ដូច្នេះនៅមានបន្ទាត់ពន្ធគយជាច្រើនទៀតដែលកម្ពុជាទទួលបានការអនុគ្រោះពន្ធចាំចូលសហគមន៍អឺរ៉ុប » ។
ប្រព័ន្ធអនុគ្រោះពន្ធ EBA របស់សហភាពអឺរ៉ុប ដែលផ្ដល់ជូនប្រទេសកំពុងអភិវឌ្ឍន៍ រួមទាំងកម្ពុជា កន្លងមកគឺត្រូវបានទំនិញគ្រប់យ៉ាងទៅកាន់ទីផ្សារអឺរ៉ុបដោយមិនបង់ពន្ធលើកលែងតែអាវុធនិងគ្រាប់រំសេវ ។ គិតត្រឹមថ្ងៃនេះ ១២ សីហានេះ ផលិតផលនាំចេញធម្មតារបស់កម្ពុជាមួយចំនួនដូចជា សម្លៀកបំពាក់ និងស្បែកជើង ផលិតផលសម្រាប់ធ្វើដំណើរ និងស្ករ នឹងត្រូវយកពន្ធឡើងវិញនៅពេលនាំចូលទៅកាន់ទីផ្សារអឺរ៉ុប។
ជុំវិញការដកប្រព័ន្ធអនុគ្រោះពន្ធ «ផ្នែកខ្លះ» ពីកម្ពុជានេះ ឬដក ២០% ខាងសហភាពអឺរ៉ុបបានពន្យល់ក្នុងសេចក្តីថ្លែងការណ៍របស់ខ្លួនថា ការអនុគ្រោះដែលទទួលបានដោយប្រទេសកម្ពុជាក្រោម រៀបចំឡើងដោយពាណិជ្ជកម្មរបស់សហភាពអ៊ឺរ៉ុបសម្រាប់បណ្តាប្រទេសអភិវឌ្ឍន៍តិចបំផុតឥឡូវនេះត្រូវបានដកចេញជាបណ្តោះអាសន្នពីកម្ពុជាដោយសារតែការព្រួយបារម្ភទាក់ទងទៅនឹងសិទ្ធិមនុស្ស។
ការដកសិទ្ធិអនុគ្រោះចូលទីផ្សារអឺរ៉ុបទាក់ទងនឹងការនាំចេញរបស់កម្ពុជាទៅសហភាពអឺរ៉ុបប្រមាណ ២០ ភាគរយ។តែប្រទេសកម្ពុជានៅតែអាចនាំចេញផលិតផលទាំងនោះទៅកាន់សហភាពអឺរ៉ុប ប៉ុន្តែកម្ពុជានឹងត្រូវបង់ពន្ធទូទៅដែលអនុវត្តចំពោះសមាជិកផ្សេងទៀតនៃអង្គការពាណិជ្ជកម្មពិភពលោក។ ៨០% ទៀតនៃការនាំចេញរបស់កម្ពុជានៅតែបន្តទទួលបានការអនុគ្រោះ (ដោយមិនគិតពន្ធកូតា) ចូលទីផ្សារអឺរ៉ុប។
ការដកផ្នែកខ្លះនៃប្រព័ន្ធអនុគ្រោះពន្ធរបស់អឺរ៉ុបពីកម្ពុជាគឺធ្វើឡើងចំពេលដែលពិភពលោកក៏ដូចជា កម្ពុជាបានជួបនឹងវិបត្តិកូវីដ១៩ ដោយបានធ្វើអោយរោងចក្រកាត់ដេរសម្លៀកបំពាក់និងស្បែកជើងកម្ពុជាជាង៤០០បានផ្អាកដំណើរការនិងប៉ះពាល់ដល់កម្មករប្រមាណ១៥ម៉ឺននាក់អត់មានការងារធ្វើ ខណៈកាលពីពេលកន្លងទៅនេះដែរ ធនាគារអភិវឌ្ឍន៍អាស៊ី បានព្យាករណ៍ថា ផលិតផលក្នុងស្រុកសរុបរបស់កម្ពុជានឹអធ្លាក់ចុះប្រមាណ៥,៥ភាគរយក្នុងឆ្នាំនេះ ។
បើតាមសេចក្ដីប្រកាសព័ត៌មានមួយរបស់សមាគមរោងចក្រកាត់ដេរ នៅកម្ពុជា បានអោយដឹងផងដែរថា សេចក្តីសម្ដេចរបស់គណៈកម្មការអឺរ៉ុបកាលពីថ្ងៃទី១១ខែកុម្ភៈ ២០២០កន្លងទៅ បានដកអត្ថប្រយោជន៍សម្រាប់បន្ទាត់ពន្ធសរុបចំនួន ៤០ ខ្សែបន្ទាត់ពន្ធលើស្ករចំនួន១ ខ្សែបន្ទាត់ពន្ធលើផលិតផលធ្វើដំណើរចំនួន៥ ខ្សែបន្ទាត់ពន្ធលើផលិតផលសម្លៀកបំពាក់ចំនួន២៥ និងខ្សែបន្ទាត់ពន្ធផលិតផលស្បែកជើងចំនួន៩ ។
លោកអាត់ ធន់ ប្រធានសម្ព័ន្ធសហជីពប្រជាធិបតេយ្យកម្មករកាត់ដេរកម្ពុជាបានបង្ហាញការសោកស្ដាយចំពោះសេចកក្តីសម្រេចសហភាពអឺរ៉ុប ក្នុងការដកប្រព័ន្ធអនុគ្រោះពន្ធ ២០ភាគរយពីកម្ពុជា ហើយក៏រំពឹងថាការបាត់បង់ការងារនៅក្នុងវិស័យកាត់ដេរកម្ពុជានឹងកើតមានឡើង ដោយសារតែការបាត់បង់អ្នកបញ្ជាទិញមួយចំនួនផងដែរ ។
លោកបន្តថាសម្រាប់ រាជរដ្ឋាភិបាលដែលកន្លងមកធ្លាប់ប្រកាសថាមានទុនបម្រុងសម្រាប់ទប់ទល់ជាមួយនឹងEBA គួរយកទុនបម្រុងនោះ ទុកដោះស្រាយលើកម្មករដែលបាត់បង់ការងារនិងត្រៀមសម្រាប់ជួយពួកគាត់នៅពេលមានវិបត្តិធ្ងន់ធ្ងរ ។លោកថា៖« វិស័យកាត់ដេរ នៅតែមានសារសំខាន់សម្រាប់សេដ្ឋកិច្ចកម្ពុជា ក៏ប៉ុន្តែទន្ទឹមនឹងការបាត់បង់ផ្នែកខ្លះនៃEBA រដ្ឋាភិបាលគួរតែជំរុញទៅលើវិស័យផ្សេងទៀតដែលជំរុញកំណើនសេដ្ឋកិច្ច ដូចជាសេវាកម្មទេសចរណ៍ និងកសិកម្មជាដើម »។
លោកបន្ថែមថា បើសិនជាស្ថានភាពកូវីដ១៩នៅកម្ពុជា និងលើពិភពលោកបានធូរស្រាលឡើងវិញ លោកជឿជាក់រដ្ឋាភិបាលនឹងអាចដោះស្រាយបញ្ហាប្រឈមអោយងើបប្រសើរឡើងវិញ នៅពេលឆាប់ៗនេះពីព្រោះថាក្រៅពីទីផ្សារអឺរ៉ុប រដ្ឋាភិបាលក៏បានរកទីផ្សារផ្សេងៗបានច្រើន និងអាចនាំចេញទំនិញពីកម្ពុជា បានកាន់តែច្រើនផងដែរ ៕ (កែសម្រួលដោយ ៖ ធីតា)
ចែករំលែកព័តមាននេះ