រាជធានីភ្នំពេញ ៖ កាលពីវេលាម៉ោង៩យប់ ថ្ងៃទី១០ ខែសីហា ឆ្នាំ២០២០ គណៈបញ្ជាការឯកភាពខណ្ឌចំការមនបានចុះត្រួតពិនិត្យទីតាំងអ៊ិនធឺណេតចំនួន២កន្លែង កម្លាំងគណៈបញ្ជាការឯកភាពខណ្ឌចំការមនដឹកនាំដោយលោក កែវ សំណាង…
រាជធានីភ្នំពេញ ៖ កាលពីវេលាម៉ោង៩យប់ ថ្ងៃទី១០ ខែសីហា ឆ្នាំ២០២០ គណៈបញ្ជាការឯកភាពខណ្ឌចំការមនបានចុះត្រួតពិនិត្យទីតាំងអ៊ិនធឺណេតចំនួន២កន្លែង កម្លាំងគណៈបញ្ជាការឯកភាពខណ្ឌចំការមនដឹកនាំដោយលោក កែវ សំណាង អភិបាលរង ជួសមុខអោយលោក ថេង សុថុល អភិបាលខណ្ឌចំការមន បានដឹកនាំកម្លាំងចំរុះ ចុះត្រួតពិនិត្យអាជីវកម្មអ៊ីនធឺណេតចំនួន២កន្លែង ដែលមិនបានចូលរួមទប់ស្កាត់ការឆ្លងជំងឺកូវីដ១៩ អោយបានត្រឹមត្រូវ តាមការណែនាំរបស់ក្រសួងសុខាភិបាល ។
ទីតាំងអុីនធើរណេតទាំង២ខាងលើ ក្នុងនោះមួយកន្លែងយីហោ TK ស្ថិតនៅតាមបណ្ដោយផ្លូវ ៤៧៨ កែងនិងផ្លូវ ១៥៥ សង្កាត់ទួលទំពូង១ និងមួយកន្លែងទៀតយីហោ ឌែលតា DELTA ដែលស្ថិតនៅតាមបណ្ដោយផ្លូវ៤៦៨កែងនិងផ្លូវ១៣៥ សង្កាត់ទួលទំពូង១ ខណ្ឌចំការមន។
កម្លាំងគណៈបញ្ជាការឯកភាពខណ្ឌចំការមនបានអោយដឹងថា ដើម្បីចូលរួមទប់ស្កាត់ និងការពារនូវការឆ្លងជំងឺកូវីដ១៩ នៅយប់ថ្ងៃទី ១០ ខែសីហា ឆ្នាំ២០២០នេះ គណៈបញ្ជាការឯកភាព ខណ្ឌចំការមន ដោយមានការបញ្ជាផ្ទាល់ពីលោក ថេង សុថុល អភិបាលខណ្ឌនៃគណៈអភិបាលខណ្ឌចំការមន ដឹកនាំផ្ទាល់ដោយលោក កែវ សំណាង អភិបាលរង និងលោក ហាយ វុទ្ធី ប្រធានការិយាល័យ សេដ្ឋកិច្ច និង អភិវឌ្ឍសង្គម បានដឹកនាំកម្លាំងសមត្ថកិច្ចចម្រុះ ចុះត្រួតពិនិត្យទីតាំងណេតចំនួន២កន្លែង ដែលស្ថិតនៅក្នុង សង្កាត់ទួលទំពូង១ ខណ្ឌចំការមន មានលិខិតអនុញ្ញាតត្រឹមត្រូវ តែខុសត្រង់មិនមានឧបករណ៍ ម៉ាស៊ីនវាស់កំដៅ និងទីតាំងមិនមានគម្លាតសុវត្ថិភាព ។
តាមប្រភពខាងលើបានបន្តថា ចំពោះភ្ញៀវដែលចូលលេង មិនមានពាក់ម៉ាស់អោយបានត្រឹមត្រូវ ដូចតាមសេចក្ដីណែនាំរបស់ក្រសួងសុខាភិបាល ដើម្បីចូលរួមទប់ស្កាត់នៃការឆ្លងរីករាលដាល ជំងឺកូវីដ១៩ នោះទេ ទើបអាជ្ញាធរបានធ្វើការបិទទីតាំង ទាំង២ជាបណ្តោះអាសន្នរហូតទាល់តែមានលិខិតអនុញ្ញាត និងអោយម្ចាស់ទីតាំងរៀបចំគម្លាតសុវត្ថិភាព តាមសេចក្ដីណែនាំរបស់ក្រសួងសុខាភិបាល អោយបានត្រឹមត្រូវបានអនុញ្ញាតអោយបើកអាជីវកម្មឡើងវិញ ។
គណៈបញ្ជាការឯកភាព លោកកែវ សំណាង អភិបាលរង បានបញ្ជាក់ទៀតថា ចំពោះទីតាំងខាងលើ មិនមានការភ្នាល់លេងល្បែងស៊ីសងនោះទេ ជាក់ស្ដែងគឺមានតែបើកអ៊ីនធឺណិតហ្គេមតែប៉ុណ្ណោះ ៕ (កែសម្រួលដោយ ៖ ធីតា)
ចែករំលែកព័តមាននេះ