ថៃ ៖ ការិយាល័យគណៈកម្មការអប់រំមូលដ្ឋាន របស់ប្រទេសថៃ បានណែនាំសាលារៀនទាំងអស់ឱ្យបន្តការរៀនក្នុងថ្នាក់ឡើងវិញនៅថ្ងៃព្រហស្បតិ៍។
អគ្គលេខាធិការរងរបស់ការិយាល័យគណៈកម្មការអប់រំមូលដ្ឋាន លោក Sanit Yamgesorn ការិយាល័យគណៈកម្មការអប់រំមូលដ្ឋាន បាននិយាយថា លោកបានចុះហត្ថលេខាលើបទបញ្ជាឱ្យសាលារៀនបន្តការបង្រៀននៅនឹងកន្លែង ប៉ុន្តែវានឹងចាប់ផ្តើមដោយផ្អែកលើការសាកល្បងក្នុងកំឡុងពេលកូវីដ ដោយសិស្សត្រូវការកត់ត្រាកន្លែងដែលខ្លួនទៅក្រោយពីចេញពីថ្នាក់រៀន និង ត្រូវធ្វើតាមវិធានការរបស់រដ្ឋាភិបាល។
លោកបានមានប្រសាសន៍ថា សាលារៀនក៏គួរតែផ្តោតលើសកម្មភាពនៅខាងក្រៅបន្ទប់រៀនផងដែរ ដើម្បីរក្សាការប្រើប្រាស់ក្នុងថ្នាក់ឱ្យទាបបំផុត។ ការសម្រេចកាលពីថ្ងៃព្រហស្បតិ៍ ត្រូវបានអនុម័តដោយនាយករដ្ឋមន្ត្រី ប្រាយុទ្ធ ចាន់អូចា។
ការិយាល័យគណៈកម្មការអប់រំមូលដ្ឋាន បានណែនាំដល់ការិយាល័យអប់រំទាំងអស់ឱ្យជូនដំណឹងដល់សាលារៀនដែលស្ថិតនៅក្រោមពួកគេ ឱ្យបើកឱ្យបានពេញលេញ ប៉ុន្តែត្រូវគោរពតាមវិធានការណ៍បង្ការដែលកំណត់ដោយក្រសួងសុខភាពសាធារណៈ។
ជាឧទាហរណ៍ស្រាប់ សាលារៀនត្រូវបានជម្រុញឱ្យជៀសវាងព្រឹត្តិការណ៍ប្រមូលផ្តុំដូចជាការជួបជុំ សកម្មភាពកម្សាន្ត ឬលេងហ្គេមកំសាន្តជាដើម។
រដ្ឋមន្ត្រីក្រសួងអប់រំ លោក Nataphol Teepsuwan បានសង្កត់ធ្ងន់នៅថ្ងៃអង្គារ៍ថា សាលារៀនទាំងអស់ត្រូវតែគោរពតាមវិធានការណ៍ដែលបានកំណត់ដោយក្រសួងសុខភាពសាធារណៈ ដូចជា ការពាក់ម៉ាសជាកំហិត ការលាងដៃដោយប្រើទឹកលាងដៃដែលមានជាតិអាល់កុល និងពិនិត្យមើលសីតុណ្ហភាពរបស់សិស្សមុនពេលពួកគេចូលក្នុងបរិវេណសាលា។
លោកបានណែនាំថា សិស្សដែលមានគ្រុនក្តៅ ត្រូវបានលើកទឹកចិត្តឱ្យឈប់ទៅសាលារៀនរហូតដល់ពួកគេជាសះស្បើយពេញលេញ៕ ដកស្រង់ចេញពីវេបសាយ ៖ bangkokpost (កែសម្រួលដោយ ៖ បុប្ផា)
ចែករំលែកព័តមាននេះ