ខេត្តមណ្ឌលគិរី ៖ បទល្មើសធនធានធម្មជាតិជាច្រើនករណី ត្រូវបានមន្ត្រីបរិស្ថានរឹប អូសនៅតាមតំបន់ដែនជម្រកការពារសត្វព្រៃ ក្រោយជនល្មើសបានធ្វើសកម្មភាពរំលោភយកដីព្រៃ កាប់ឈើប្រណីត និងបរបាញ់សត្វព្រៃជាដើម។
សេចក្តីរាយការណ៍បានឲ្យដឹងថា កាលពីថ្ងៃទី០៩ សីហា ឆ្នាំ២០២០ ក្រុមការងារដែនជម្រកសត្វព្រៃស្រែពក បានធ្វើការដកបង្គោលព្រំដីដែលបោះខុសច្បាប់តាមបណ្តោយផ្លូវ៩៥ ស្ថិតក្នុងភូមិណងបួរ ឃុំណងឃីលឹក ស្រុកកោះញែក ខេត្តមណ្ឌលគិរី បានចំនួន ២៧៨បង្គោល។
ដោយឡែក គិតចាប់ពីថ្ងៃទី ០៤-០៩ សីហា ឆ្នាំ២០២០ មន្ត្រីឧទ្យានុរក្សនៃដែនជម្រកសត្វព្រៃភ្នំព្រេច-លំផាត់ ប្រចាំស្នាក់ការកែរពៅ សហការជាមួយមន្ត្រីឧទ្យានុរក្សប្រចាំស្នាក់ការ ដេអេអូរច្បារ-ស្នាក់ការមេម៉ង់-ស្នាក់ការឡៅការ ស្នាក់ការខ្ទង់អន្ទ្រង និងបុគ្គលិកអង្គការWWF ផ្នែកអនុវត្តច្បាប់ បានសម្រេចលទ្ធផលការងារដូចជា ថ្ងៃទី ០៤ ខែសីហា ឆ្នាំ២០២០ បានចាប់ឃាត់គោយន្តកន្ត្រៃចំនួន០១គ្រឿង ដែលជនសង្ស័យលាក់ទុកចោលក្នុងព្រៃនៅចំណុចអូរជីមេះ ស្ថិតក្នុងភូមិជីក្លប់ ឃុំសុខសាន្ដ ស្រុកកោះញែក ខេត្តមណ្ឌលគិរី ។
ថ្ងៃទី០៥ ខែសីហា ឆ្នាំ២០២០ បានររុះរើជុំរុំ ០១កន្លែង និងរុករកជុំវិញបរិវេណជុំរុំឃើញរណាយន្តចំនួន០១គ្រឿង នៅចំណុចដៃអូរជីមេះ ស្ថិតក្នុងភូមិជីក្លប់ ឃុំសុខសាន្ត ស្រុកកោះញែក ខេត្តមណ្ឌលគិរី។ថ្ងៃទី០៥ ខែសីហា ឆ្នាំ២០២០ បានចាប់ឃាត់គោយន្តកន្ត្រៃចំនួន០១គ្រឿង ដែលជនសង្ស័យលាក់ទុកចោលក្នុងព្រៃនៅចំណុចក្បាលអូរជើងជ្រៃ ស្ថិតក្នុងភូមិចុងផាង ឃុំពូជ្រៃ ស្រុកពេជ្រាដា ខេត្តមណ្ឌលគិរី។
ថ្ងៃទី០៦ ខែសីហា ឆ្នាំ២០២០ បានចាប់ឃាត់គោយន្តកន្ត្រៃចំនួន០១គ្រឿង និងរណាយន្តចំនួន០១គ្រឿង ដែលជនសង្ស័យលាក់ទុកចោលក្នុងព្រៃ នៅចំណុចអូររម៉ាញ ស្ថិតក្នុងភូមិចុងផាង ឃុំពូជ្រៃ ស្រុកពេជ្រាដា ខេត្តមណ្ឌលគិរី។ថ្ងៃទី០៦ ខែសីហា ឆ្នាំ២០២០ បានដកហូតរណាយន្តចំនួន០១គ្រឿង ដែលជនសង្ស័យលាក់ទុកចោលក្នុងព្រៃ នៅចំណុចដៃអូរជើងជ្រៃ ស្ថិតក្នុងភូមិចុងផាង ឃុំពូជ្រៃ ស្រុកពេជ្រាដា ខេត្តមណ្ឌលគិរី។
គួរកត់សម្គាល់ថា វិសាលភាពដែនដីព្រៃឈើនៅខេត្តមណ្ឌលគិរី មានទំហំធេងខ្លាំងណាស់រាប់លានហិចតា តែក៏មានការរំលោភបំពានកាប់រានយកដីទាំងនោះជាកម្មសិទ្ឋ ធ្វើឲ្យមានការប៉ះពាល់ជាខ្លាំងលើជីវចម្រុះហើយក៏មានសត្វកម្រខ្លះបានផុតពួជផងដែរ។
ជាក់ស្តែង ក្រោយអំឡុងឆ្នាំ២០០៧សត្វខ្លាធំបានបាត់វត្តមានពីទឹកដីខេត្តមណ្ឌលគិរី រហូតមកដល់បច្ចុប្បន្នមន្ត្រី ការពារសត្វព្រៃ ប្រជាពលរដ្ឋពុំដែលបានឃើញសត្វខ្លាជាង១០ឆ្នាំមកហើយ ចំណែកកាមេរ៉ាបង្កប់ក្នុងដែនជម្រកសត្វព្រៃ ក៏មិនធ្លាប់ចាប់បានរូបភាពសត្វខ្លាប្រភេទនេះទៀតដែរ ដែលអ្នកជំនាញផ្នែកសត្វព្រៃបានសន្និដ្ឋានថា ខ្លាធំប្រហែលមិន មានវត្តមាននៅខេត្តមណ្ឌលគិរីទៀតនោះទេ ។
អភិបាលខេត្តមណ្ឌលគិរី ឯកឧត្ដម ស្វាយ សំអ៊ាង បានថ្លែងថា បើមិនរួមគ្នាក្នុងការថែរក្សាព្រៃឈើ និងសត្វព្រៃពីគ្រប់មជ្ឈដ្ឋាននោះទេ ធនធានធម្មជាតិទាំងនោះនឹងបាត់បង់ តួយ៉ាងសត្វខ្លាធំគឺបាត់ដានពីខេត្តមណ្ឌលគិរីតាំងពីឆ្នាំ២០០៧ ក្នុងបញ្ហានេះប្រសិនបើសាធារណៈជនចូលរួមជាមួយមន្ត្រីជំនាញ ទប់ស្កាត់បទល្មើសធនធានធម្មជាតិគ្រប់រូបភាព លោកជឿថា វិសាលភាពដែនជម្រកសត្វព្រៃជាង១លានហិកតានៅខេត្តមណ្ឌលគិរី នឹងក្លាយជាជម្រកសម្រាប់សត្វព្រៃគ្រប់ប្រភេទយ៉ាងគង់វង្ស ។
លោក សេង ទៀក តំណាងអង្គការWWFប្រចាំប្រទេសកម្ពុជាបានឲ្យដឹងថា ខ្លាធំជាសត្វស៊ីសាច់ជាអាហារលំដាប់លើគេក្នុងចំណោមសត្វព្រៃទាំងអស់ ហើយវាមានតួនាទីយ៉ាងសំខាន់បំផុតក្នុងការធ្វើឲ្យមានតុល្យភាព និងរក្សាលំនឹងប្រព័ន្ឋអេកូឡូស៊ី និងបរិស្ថានដែលផ្តល់ប្រយោជន៍ដល់សត្វព្រៃដទៃទៀតព្រមទាំងប្រជាពលរដ្ឋរាប់លាននាក់។
លោក សេង ទៀក បន្តថា ក្នុងឆ្នាំ២០១៦ ចំនួនសត្វខ្លាធំនៅទូទាំងពិភពលោកត្រូវប៉ាន់ប្រមាណថា មានការកើនឡើងបន្តិច គឺមានចំនួន៣ ៩០០ក្បាល បើប្រៀបធៀបនិងឆ្នាំ២០១០ មានចំនួន៣២០០ក្បាល ខណៈនៅដើមទស្សវតទី២០ ខ្លាធំមានចំនួនប្រហែល១០ម៉ឺនក្បាលើពិភពលោក ប៉ុន្តែត្រូវបានបាត់បង់រហូតជាង៩០% ។ចំនួនសត្វខ្លាធំដែលបានកើនឡើង ជាពិសេសមានក្នុងប្រទេសឥណ្ឌា នេប៉ាល់ នឹងរុស្សី។
ជាមួយកំណើនបន្តិចនេះ ក្រុមអ្នកស្រឡាញ់បរិស្ថានក៏បានបង្ហាញពីការព្រួយបារម្ភយ៉ាងខ្លាំងលើការគំរាមគំហែង ជាសាកលដល់សត្វខ្លាធំនៅលើពិភពលោក ដោយសារតែការបាត់បង់ទីជម្រក ការបរបាញ់ នឹងការជួញដូរ ជាបណ្តាញ និងជាប្រព័ន្ឋក្នុងពិភពលោក៕
ចែករំលែកព័តមាននេះ