ខេត្តព្រះវិហារ ៖ មួយរយៈពេលចុងក្រោយនេះ គេកត់សម្គាល់ឃើញមានអគ្គិភ័យដោយការផ្ទុះឆេះកន្លែងលក់ធុងហ្គាស និងកន្លែងស្ថានីយប្រេងផងដែរ ។ ព្រមជាមួយគ្នានោះមន្ត្រីជំនាញបានក្រើនរម្លឹកដល់ម្ចាស់ស្ថានីយប្រេង ឬឧស្ម័នឥន្ធនៈទាំងអស់ថា បើសិនជាម្ចាស់ស្ថានីយប្រេង ឬឧស្ម័នឥន្ធនៈ…
ខេត្តព្រះវិហារ ៖ មួយរយៈពេលចុងក្រោយនេះ គេកត់សម្គាល់ឃើញមានអគ្គិភ័យដោយការផ្ទុះឆេះកន្លែងលក់ធុងហ្គាស និងកន្លែងស្ថានីយប្រេងផងដែរ ។ ព្រមជាមួយគ្នានោះមន្ត្រីជំនាញបានក្រើនរម្លឹកដល់ម្ចាស់ស្ថានីយប្រេង ឬឧស្ម័នឥន្ធនៈទាំងអស់ថា បើសិនជាម្ចាស់ស្ថានីយប្រេង ឬឧស្ម័នឥន្ធនៈ ដំណើរការដោយគ្មានលិខិតអនុញ្ញាតនោះនឹងត្រូវផាកពិន័យចាប់ពី ២០០ ពាន់រៀល ដល់ ១០លានរៀល ។
យោងតាមរដ្ឋបាល ក្រសួងរ៉ែ និងថាមពល ក្នុងខេត្តព្រះវិហារ បានផ្សព្វផ្សាយនូវ «ច្បាប់ស្តីពីការគ្រប់គ្រងប្រេងកាត និងផលិតផលប្រេងកាត និងវគ្គបណ្តុះបណ្តាលស្តីពីហានិភ័យស្ថានីយ និងសារាចរសុវត្ថិភាពសម្រាប់ការរៀបចំស្ថានីយប្រេង និងឧស្ម័នឥន្ធនៈ» កាល ថ្ងៃទី១១ ខែសីហា ឆ្នាំ២០២០ ។
ក្នុងនោះក្រសួងបានឱ្យដឹងថា កម្ពុជាបានអនុលោមតាមច្បាប់ស្តីពីការគ្រប់គ្រងប្រេងកាត និងផលិតផលប្រេងកាត ហើយខ្លឹមសារនៃមាត្រាសំខាន់ៗមួយចំនួនទាក់ទងនឹងស្ថានីយប្រេង និងឧស្ម័នឥន្ធនៈរួមមាន ៖ មាត្រា៤២ ៖ ម្ចាស់ស្ថានីយប្រេង ឬឧស្ម័នឥន្ធនៈត្រូវមានវិញ្ញាបនបត្របញ្ជាក់បច្ចេកទេសសុវត្ថិភាពពីក្រសួងរ៉ែ និងថាមពល មុននឹងចាប់ផ្តើមសាងសង់ហេដ្ឋារចនាសម្ព័ន្ធ ។ មាត្រា៤១ ៖ ម្ចាស់ស្ថានីយប្រេង ឬឧស្ម័នឥន្ធនៈ ត្រូវមានលិខិតអនុញ្ញាតអាចដំណើរការពីក្រសួងរ៉ែ និងថាមពល ។ មាត្រា៦៦ ៖ ម្ចាស់ស្ថានីយប្រេង ឬឧស្ម័នឥន្ធនៈ ណាដែលគ្មានវិញ្ញាបនបត្របញ្ជាក់ បច្ចេកទេសសុវត្ថិភាពពីក្រសួងរ៉ែ និងថាមពល មុននឹងចាប់ផ្តើមសាងសង់ហេដ្ឋារចនាសម្ព័ន្ធ គឺត្រូវផាកពិន័យជាប្រាក់ចំនួន ៤លានរៀល និងផ្អាកសកម្មភាពសាងសង់នានា ចំពោះហេដ្ឋារចនាសម្ព័ន្ធមានតម្លៃក្រោម ៨០០លានរៀល ។
និងត្រូវផាកពិន័យជាប្រាក់ចំនួន ១០លានរៀល និងផ្អាកសកម្មភាពសាងសង់នានា ចំពោះហេដ្ឋារចនាសម្ព័ន្ធមានតម្លៃចាប់ពី ៨០០លានរៀល ។ ករណីនៅតែបន្តប្រព្រឹត្តអំពើល្មើសដដែល ត្រូវផាកពិន័យជាប្រាក់ចំនួនទ្វេដង ។ មាត្រា៦៤ ៖ ម្ចាស់ស្ថានីយប្រេង ឬឧស្ម័នឥន្ធនៈ ណាដែលគ្មានលិខិតអនុញ្ញាតអាចដំណើរការពីក្រសួងរ៉ែ និងថាមពល ត្រូវផាកពិន័យជាប្រាក់ពី ២០០ ពាន់រៀល ដល់ ១០លានរៀល ។ មាត្រា៦៧ ៖ បុគ្គលណាដែលធ្វើសកម្មភាពរារាំង ឬបង្កឱ្យការាំងស្ទះដល់ដំណើរការអធិការកិច្ច ត្រូវដាក់ពន្ធនាគារពី១ខែ ដល់១ឆ្នាំ និងពិន័យជាប្រាក់ពី១លានរៀល ទៅ ៥០លានរៀល ។ ហើយបើអ្នករាជការសាធារណៈ ឬពលរដ្ឋទទួលអាណត្តិសាធារណៈដោយការបោះឆ្នោតដែលធ្វើសកម្មភាពរារាំង ឬបង្កឱ្យការាំងស្ទះដល់ដំណើរការអធិការកិច្ច ត្រូវដាក់ពន្ធនាគារពី ២ឆ្នាំដល់ ៥ឆ្នាំ និងពិន័យជាប្រាក់ពី១០០លានរៀល ទៅ ២៥០លានរៀល ។
គួរបញ្ជាក់ផងដែរថា សិក្ខាសាលានេះ មានគោលបំណងបង្កើនការយល់ដឹងអំពីច្បាប់ អំពីហានិភ័យដែលអាចកើតមានឡើង និងអំពីបែបបទ និងនីតិវិធីក៏ដូចជាបច្ចេកទេសសុវត្ថិភាពក្នុងការគ្រប់គ្រង និងប្រកបអាជីវកម្មដល់ម្ចាស់ស្ថានីយ អ្នកសាងសង់ស្ថានីយ និងអ្នកធ្វើការស្តុកទុក ផលិតផលប្រេងកាត និងពង្រឹងសមត្ថភាពមន្ត្រីជំនាញបច្ចេកទេស មន្ទីររ៉ែ និងថាមពល និងស្ថាប័នពាក់ព័ន្ធឱ្យយល់ពីតួនាទីភារកិច្ច និងនីតិវិធីនានា ដើម្បីមានភាពងាយស្រួលក្នុងការបម្រើសេវាសាធារណៈជូនប្រជាពលរដ្ឋក៏ដូចជា ការចុះត្រួតពិនិត្យ និងធ្វើអធិការកិច្ចប្រកបដោយប្រសិទ្ធភាព ប្រសិទ្ធផល និងតម្លាភាព ស្របតាមច្បាប់ និងលិខិតបទដ្ឋានគតិយុទ្ធពាក់ព័ន្ធនានាជាធរមាន ៕
ចែករំលែកព័តមាននេះ