ទីក្រុងម៉ូស្គូ ៖ លោកប្រធានាធិបតីរុស្ស៊ី វ្ល៉ាឌីមៀ ពូទីន បានប្រកាសនៅព្រឹកថ្ងៃអង្គារនេះថា ប្រទេសរុស្ស៊ី បានចុះបញ្ជីផ្លូវការ វ៉ាក់សាំងដំបូងបង្អស់របស់ពិភពលោក ប្រឆាំងនឹងមេរោគកូវីដ-១៩…
ទីក្រុងម៉ូស្គូ ៖ លោកប្រធានាធិបតីរុស្ស៊ី វ្ល៉ាឌីមៀ ពូទីន បានប្រកាសនៅព្រឹកថ្ងៃអង្គារនេះថា ប្រទេសរុស្ស៊ី បានចុះបញ្ជីផ្លូវការ វ៉ាក់សាំងដំបូងបង្អស់របស់ពិភពលោក ប្រឆាំងនឹងមេរោគកូវីដ-១៩ ដែលវ៉ាក់សាំង ដូសនេះ មានប្រសិទ្ធិភាពក្នុងការបង្កើតភាពស៊ាំប្រឆាំងនឹងវីរុស ដែលកំពុងឆ្លងរាលដាលទូទាំងពិភពលោក នេះបើយោងតាមការចុះផ្សាយរបស់សារព័ត៌មាន RT ។
លោក វ្ល៉ាឌីមៀ ពូទីន បានប្រាប់អោយដឹងថា “តាមដែលខ្ញុំដឹង វ៉ាក់សាំងប្រឆាំងនឹងការឆ្លងវីរុសកូវីដ-១៩នេះ ត្រូវបានចុះបញ្ជី នៅព្រឹកនេះ (ម៉ោងនៅប្រទេសរុស្ស៊ី) ជាលើកដំបូង នៅលើពិភពលោក” ។ លោកបន្តថា “ខ្ញុំសូមថ្លែងអំណរគុណដល់អ្នករាល់គ្នា នេះជាពេលវេលាដ៏សំខាន់បំផុតសម្រាប់ពិភពលោកទាំងមូល” ។
លោកពូទីន បាននិយាយថា ការចាក់វ៉ាក់សាំង នៅក្នុងប្រទេសរុស្ស៊ី គួរតែធ្វើឡើងដោយស្ម័គ្រចិត្ត ដោយគ្មាននរណាម្នាក់ត្រូវបានបង្ខំឲ្យទទួលយកការចាក់ថ្នាំបង្ការឡើយ ។ លោកពូទីន ក៏បានបង្ហាញផងដែរថា កូនស្រីរបស់លោកម្នាក់ បានចាក់វ៉ាក់សាំងការពារនេះរួចហើយ ។
លោកប្រធានាធិបតី បានបន្ថែមថា “ខ្ញុំដឹងថា វាមានប្រសិទ្ធភាព និងមានសុវត្ថិភាព ហើយខ្ញុំនិយាយម្តងទៀត វាបានឆ្លងកាត់ការត្រួតពិនិត្យសំខាន់ៗទាំងអស់” ។
មានមនុស្សជាង ៧០០.០០០នាក់ហើយបានស្លាប់ ដោយសារជំងឺរាតត្បាតនេះ និងករណីឆ្លងមានសរុបជាង ២០លានករណី នៅទូទាំងពិភពលោក ខណៈកំពុងស្រែករកដំណោះស្រាយចំពោះវិបត្តិ Covid-19 ដែលបាននិងកំពុងបំផ្លាញសេដ្ឋកិច្ចពិភពលោកផងដែរ ។
លោកពូទីន បានស្នើសុំឲ្យលោក Mikhail Murashko រដ្ឋមន្ត្រីក្រសួងសុខាភិបាលរុស្ស៊ី ផ្តល់ព័ត៌មានលម្អិតបន្ថែមទៀត អំពីផែនការសម្រាប់ការចាក់ថ្នាំបង្ការ ទូទាំងប្រទេស ។
លោកសង្ឃឹមថាវ៉ាក់សាំងរុស្ស៊ី នឹងត្រូវបានចរាចរជាទូទៅ នៅខែមករា ប៉ុន្តែក្នុងពេលនេះ បុគ្គលិកពេទ្យ និងវេជ្ជបណ្ឌិត នឹងត្រូវបានផ្តល់អាទិភាព ។ យើងនឹងចាប់ផ្តើមការប្រើប្រាស់វ៉ាក់សាំង តាមដំណាក់កាលនីមួយៗ ដំបូងនិងសំខាន់បំផុត យើងចង់ផ្តល់ការចាក់វ៉ាក់សាំងដល់អ្នកដែលមានទំនាក់ទំនងជាមួយអ្នកជំងឺ នៅកន្លែងធ្វើការ (គឺជាបុគ្គលិកពេទ្យ) ។ បន្ទាប់មកកុមារ និងគ្រូបង្រៀន ។
កាលពីសប្តាហ៍មុន រដ្ឋមន្ត្រីក្រសួងសុខាភិបាលរុស្ស៊ី លោក Mikhail Murashko បានថ្លែងថា ការសាកល្បងតេស្តវ៉ាក់សាំងដំណាក់កាលចុងក្រោយ ដែលបង្កើតឡើងដោយមជ្ឈមណ្ឌលស្រាវជ្រាវ Gamelei នៅទីក្រុងមូស្គូ ត្រូវបានបញ្ចប់ ៕
ចែករំលែកព័តមាននេះ