ប្រទេសចិន-អាមេរិក ៖ ប្រទេសចិនកាលពីថ្ងៃទី១០ សីហា បានសម្រេចដាក់ទណ្ឌកម្មប្រឆាំងពលរដ្ឋអាមេរិក១១នាក់ ក្នុងនោះមានបណ្ដាសមាជិកសភាដែលបែបនោះជាប្រតិកម្មតបចំពោះការសម្រេចរបស់ក្រុងវ៉ាស៊ិនតោនដាក់ទណ្ឌកម្មប្រឆាំងមេដឹកនាំចិន និងហុងកុង១១នាក់
ដោយចោទប្រកាន់ពួកគេថារិតត្បិតសេរីភាពនយោបាយក្នុងអតីតដែនដីអាណានិគមអង់គ្លេសនោះ ។
ក្នុងចំណោមឥស្សរជនអាមេរិកដែលរងការដាក់ទណ្ឌកម្មរបស់ចិននោះមានព្រឹទ្ធសមាជិកលោក TED CRUZ លោក MARCO RUBIO, លោក TOM COTTON, លោក JOSH HAWLEY, លោក PAT TOOMEY ព្រមទាំងសមាជិកសភាលោក CHRIS SMITH រួមទាំងសមាជិកបណ្ដាអង្គការការពារសេរីភាពអាមេរិក ។
អ្នកនាំពាក្យក្រសួងការបរទេសចិនថ្លែងនាថ្ងៃទី១០ សីហាថា ជាការឆ្លើយតបចំពោះឥរិយាបថ
អយុត្តិធម៌របស់អាមេរិក ចិនបានសម្រេចដាក់ទណ្ឌកម្មប្រឆាំងបណ្ដាបុគ្គលដែលមានសកម្មភាពអាក្រក់លើបញ្ហាទាក់ទិននឹងក្រុងហុងកុង ។
ក្រសួងរតនាគារអាមេរិកកាលពីថ្ងៃទី៧ សីហា កន្លងមកនេះ បានប្រកាស ដាក់ទណ្ឌកម្មប្រឆាំង
ប្រមុខប្រតិបត្តិក្រុងហុងកុង លោកស្រីការីឡាមនិងអ្នកទទួលខុសត្រូវចិន និងហុងកុង៨រូបទៀត។
បណ្ដាសមាជិកព្រឹទ្ធសភានិងសភាអាមេរិកដែលរងការដាក់ទណ្ឌកម្មរបស់ចិនសុទ្ធតែជាអ្នកដែលវាយប្រហារចិនខ្លាំងក្លាបំផុតក្នុងឱកាសអនុម័តច្បាប់ស្ដីពីសន្តិសុខជាតិនៅហុងកុងដែលពង្រីកអំណាចរបស់ចិនលើហុងកុង ។
ដោយឡែកនិស្សិតស្រីក្រុងហុងកុងម្នាក់នាងAGNES CHOW ជាអ្នកប្រឆាំងដ៏សកម្មម្នាក់ បានត្រូវចាប់ខ្លួនពីបទរំលោភបំពានច្បាប់ថ្មីស្ដីពីសន្តិសុខជាតិ ។ អ្នកទទួលខុសត្រូវខាងសន្តិសុខក្រុងហុងកុងមួយរូបថ្លែងនាថ្ងៃទី១០ សីហា ថាបុរស៩នាក់ និងនារីម្នាក់ដែលមានអាយុចាប់ពី២៣ទៅ៧២ឆ្នាំ បានត្រូវចាប់ខ្លួនពីបទរំលោភបំពានច្បាប់សន្តិសុខជាតិក្នុងប្រតិបត្តិការមួយរបស់ប៉ូលិស។ មហាសេដ្ឋីថៅកែកាសែតស្និទ្ធប្រជាធិបតេយ្យក្រុងហុងកុង លោក JIMMY LAI ស្ថិតក្នុងចំណោមមនុស្សត្រូវចាប់ខ្លួន ៕ ដកស្រង់ចេញពីវេបសាយ ៖ xinhuanet (កែសម្រួលដោយ ៖ បុប្ផា)
ចែករំលែកព័តមាននេះ