រាជធានីភ្នំពេញ ៖ តើស្ត្រីដែលជាកងកម្លាំងមួកខៀវ មានផ្ទុកមេរោគកូវីដ១៩ រស់នៅសង្កាត់សិត្បូ ក្រុងតាខ្មៅ ខេត្តកណ្តាល គាត់បានចេញពីផ្ទះធ្វើសកម្មភាពជួបជុំពលរដ្ឋ ចែកទានប្រគេនចង្ហាន់ដល់ព្រះសង្ឃដែរឬអត់ ?…
រាជធានីភ្នំពេញ ៖ តើស្ត្រីដែលជាកងកម្លាំងមួកខៀវ មានផ្ទុកមេរោគកូវីដ១៩ រស់នៅសង្កាត់សិត្បូ ក្រុងតាខ្មៅ ខេត្តកណ្តាល គាត់បានចេញពីផ្ទះធ្វើសកម្មភាពជួបជុំពលរដ្ឋ ចែកទានប្រគេនចង្ហាន់ដល់ព្រះសង្ឃដែរឬអត់ ? នេះជាសំណួរ និងជាក្តីកង្វល់របស់ពលរដ្ឋ ត្បិតអីរបាយការណ៍របស់អាជ្ញាធរមូលដ្ឋាន និងមន្ទីរសុខាភិបាលខេត្តខុសគ្នា ។
លោកចៅសង្កាត់សិត្បូ ដែលនៅផ្ទាល់ជាប្រជាមួយពលរដ្ឋថា ស្ត្រីជាកងកម្លាំងមួកខៀវនោះបានធ្វើសកម្មភាពមនុស្សធម៌ ជួបជុំពលរដ្ឋចែកទាន ប្រគេនចង្វាន់ព្រះសង្ឃក្រោយពីគាត់បានមកដល់លំនៅដ្ឋាន ។ តែស្ថាប័នសុខាភិបាលថា មិនពិតទេ ។ ស្ត្រីរូបនោះមិនបានចេញទៅណាទេ ក្រោយពីបានត្រឡប់មកដល់ផ្ទះនៅថ្ងៃទី៣០ កក្កដានោះ ។ ស្ត្រីនោះបានជួបពលរដ្ឋមែន ឬមិនមាន បញ្ហានេះបានក្លាយជាចម្ងល់ និងជាការព្រួយបារម្ភរបស់ពលរដ្ឋ ។
ពលរដ្ឋបានលើកឡើងថា បញ្ហានេះពួកគាត់ចង់ឃើញឲ្យមានការសង្កេត ស្រាវជ្រាវបន្ថែមទៀត ជាពិសេសស្នើឲ្យមន្ត្រីសុខាភិបាលពិនិត្យ តាមដានសុខភាពពលរដ្ឋ នៅក្នុងសង្កាត់សិត្បូ ឲ្យបានហ្មត់ចត់ ។
អ្នកប្រើប្រាស់បណ្តាញសង្គម FACEBOOK បានលើកឡើងថា ប្រសិនជាស្ត្រីនោះ គាត់បានជួបជុំពលរដ្ឋដូចរបាយការណ៍លោកចៅសង្កាត់ សរសេរទៅកាន់អភិបាលក្រុងតាខ្មៅមែននោះ ប្រាកដជាមានការប្រឈមខ្លាំងណាស់ ពីព្រោះមិនដឹងថា មនុស្សប៉ុន្មាននាក់ បានជួប និងសិទ្ធិស្នាលជាមួយស្ត្រី ដែលមានផ្ទុកវីរុសកូរ៉ណានោះ ។ អ្នកប្រើប្រាស់បណ្តាញសង្គមម្នាក់បានបញ្ចេញយោបល់ថា «របាយការណ៍មួយណាពិតមួយណាមិនពិត មិនសំខាន់ទេ ។ សំខាន់អ្នករងគ្រោះ គឺរាស្ត្រផ្ទាល់ បន្ទាប់មករដ្ឋនឹងបាត់បង់ទំនុកចិត្តពីរាស្ត្រ»។ ពលរដ្ឋម្នាក់ទៀតនិយាយថា« ការធ្វើការហាក់ដូចផ្សេងពីគ្នាអត់សហការគ្នាសោះ លិខិត៣ខុសគ្នាទាំងអស់» ។
ពលរដ្ឋម្នាក់ទៀត បានសរសេរថា «ឃុំនិយាយផ្សេង ខេត្តនិយាយផ្សឹង អ្នកមិនដឹង គឺពលរដ្ឋ» ។ ចំណែកអ្នកប្រើប្រាស់បណ្តាញសង្គមម្នាក់ទៀត បានលើកឡើងថា «រឿងការឆ្លងកូវីដ១៩ របស់នារីមួកខៀវ ។ មិនដឹងឲ្យពលរដ្ឋទុកចិត្តខាងណាជាង ?ការស៊ើបអង្កេតបន្ថែមលើលិខិតចៅសង្កាត់អាចជួយបំភ្លឺបញ្ហានេះ» ។
សូមជម្រាបថា ស្ត្រីដែលជាកងកម្លាំងមួកខៀវកម្ពុជា រស់នៅក្នុងសង្កាត់សិត្បូនេះ បានត្រឡប់មកពីបំពេញបេសសកកម្មនៅប្រទេសម៉ាលី កាលពីថ្ងៃទី១០ កក្កដា ឆ្នាំ២០២០។ ក្រោយធ្វើចត្តាឡីស័ក១៤ថ្ងៃ និងការធ្វើតេស្តរកកូវីដ-១៩ ចំនួន៣ដង មានលទ្ធផលអវិជ្ជមាន ត្រូវបានមន្ត្រីសុខាភិបាល អនុញ្ញាតឱ្យស្ត្រីរូបនោះ មកលំនៅដ្ឋានក្នុងលំដ្ឋានខ្លួន ក្នុង សង្កាត់សិត្បូ ក្រុងតាខ្មៅ ខេត្តកណ្តាល ។ ក្រោយមកផ្ទះបានមួយសប្តាហ៍ស្ត្រីរូបនេះ ត្រូវបានក្រសួងប្រកាសរកឃើញជំងឺកូវីដ-១៩ ក្រោយធ្វើតេស្តលើកទី៥ នៅថ្ងៃទី៨សីហា ឆ្នាំ២០២០។ បច្ចុប្បន្នគាត់កំពុងសម្រាកព្យាបាលនៅក្នុងមន្ទីរពេទ្យ ។ អ្វីដែលជាចំណោទនិងកង្វល់នោះថា តើស្ត្រីរូបនេះ គាត់បានប៉ះពាល់ និងស្និទ្ធស្នាលនរណាខ្លះ។ តើបញ្ហានេះ គេគួរលាក់បាំងឬស៊ើបអង្កេតទៀត ។
ពលរដ្ឋកំពុងព្រួយបារម្ភ និងមានខ្វល់ពីបញ្ហានេះ បើតាមទស្សនៈ ពួកគាត់ដែលបានដកស្រង់ខាងលើ ។ រហូតមកដល់ព្រឹកថ្ងៃទី១១ សីហានេះ កម្ពុជាបានរកឃើញករណីកូវីដ១៩វិជ្ជមាន សរុប២៦៦នាក់ ក្នុងនោះអ្នកសម្រាកព្យាបាលក្នុងមន្ទីរពេទ្យមានចំនួន៤៦នាក់ ពោលកម្ពុជាបានព្យាបាលជាសះស្បើយ សរុប២២០នាក់ ។
ជាការកត់សម្គាល់មន្ត្រីសុខាភិបាលនៅតែសម្តែងការព្រួបារម្ភ ពីឱកាសដែលអាចឆ្លងរីករាលជំងឺនេះ ដល់សហគមន៍ប្រសិនពលរដ្ឋមានការធ្វេសប្រហែស ភ្លេចខ្លួនោះ ។ ជាមួយនេះ តាមរយៈការបញ្ចេញមតិជុំវិញករណីស្ត្រីកងកម្លាំងមួកខៀវពេលនេះ ពលរដ្ឋក៏ត្រូវការព័ត៌មានពិត ច្បាស់លាស់ ពីសមត្ថកិច្ចដែរ ជុំវិញករណីកូវីដ១៩នេះ ៕
ចែករំលែកព័តមាននេះ