អង់គ្លេស ៖ កីឡាករ Kostas Tsimikas ជឿជាក់ថាខ្លួនបានចូលរួមជាមួយក្លិបធំជាងគេបំផុតនៅលើពិភពលោក បន្ទាប់ពីសម្រេចការផ្ទេរជាផ្លូវការ ជាមួយក្លិបហង្សក្រហម Liverpool។
អតីតខ្សែការពារឆ្វេងរបស់ក្រុម Olympiacos វ័យ ២៤ឆ្នាំរូបនេះ បានចូលរួមជាមួយក្រុមម្ចាស់ជើងឯក Premier League ក្នុងតម្លៃប្រមាណ ១១,៧លានផោនជាមួយកិច្ចសន្យារយៈពេល៥ឆ្នាំ ដោយនឹងត្រូវពាក់លេខ២១ សម្រាប់ក្រុមថ្មី។ Tsimikas នឹងត្រូវធ្វើការប្រកួតប្រជែងខ្លាំង ដើម្បីដណ្តើមតំណែងខ្សែការពារឆ្វេងរបស់ក្រុម ដែលបច្ចុប្បន្នកាន់កាប់ដោយ Andy Robertson។
Tsimikas បានថ្លែងពីចំណាប់អារម្មណ៍យ៉ាងដូច្នេះថា «ខ្ញុំពិតជារីករាយណាស់។ ខ្ញុំពិតជាមានមោទនភាពណាស់ដែលបានមកដល់ទីនេះ។ ហើយខ្ញុំនឹងផ្តល់នូវអ្វីដែលល្អបំផុតជូនចំពោះក្រុមមួយនេះ។ សម្រាប់ខ្ញុំ Liverpool គឺជាក្លិបធំបំផុតនៅលើពិភពលោក»។
សូមរំលឹកជូនថា Kostas Tsimikas បានចូលរួមជាមួយក្លិប Olympiacos ក្នុងឆ្នាំ២០១៤ ក្នុងឈុតយុវជន មុនត្រូវបានកោះហៅឱ្យចូលក្រុមឈុតធំក្នុងឆ្នាំ២០១៥។ រូបគេបានបង្ហាញខ្លួនបានចំនួន ៤៦ប្រកួត។ អំឡុងពេលប្រកបអាជីពជាមួយក្រុមនៅលីគកំពូលក្រិកមួយនេះ រូបគេត្រូវបាន Olympiacos ឱ្យទៅក្លិប Esbjerg និង Willem II ខ្ចីជើងផងដែរ៕ (ដកស្រង់ចេញពី BBC)
ចែករំលែកព័តមាននេះ