ខេត្តស្វាយរៀង ៖ មានម្ចាស់មូលនិធិជំនួយដៃអាមេរិកកាំង សហការជាមួយសមាគមសុខាភិបាលខ្មែរអាមេរិក ដឹកនាំក្រុមគ្រូពេទ្យស្ម័គ្រចិត្ត ចំនួន៦០អង្គ/នាក់ មកពីសហរដ្ឋអាមេរិក និង៣៩អង្គ/នាក់មកពីរាជធានីភ្នំពេញ ធ្វើការមនុស្សធម៌លើវិស័យសុខាភិបាល ក្នុងការពិនិត្យ និងព្យាបាលជំងឺប្រជាពលរដ្ឋដោយឥតគិតថ្លៃ មានអ្នកមកទទួលសេវាសុខភាពចំនួន៥៣៨០នាក់ ។
ការពិនិត្យព្យាបាលនេះបានចាប់ផ្តើមកាលពីវេលាម៉ោង៧និង៣០នាទីព្រឹក ថ្ងៃទី២ ដល់ថ្ងៃទី៧ ខែកុម្ភៈ ឆ្នាំ២០១៥ នៅក្នុងបរិវេណ មន្ទីរពេទ្យបង្អែកខេត្តស្វាយរៀង ស្ថិនៅភូមិស្រះវង់ សង្កាត់ស្វាយរៀង ក្រុងស្វាយរៀង ។ បើតាមលោកវេជ្ជបណ្ឌិតតាន់ សុង ប្រធានក្រុមការងារគ្រូពេទ្យស្ម័គ្រចិត្ត សមាគមសុខាភិបាលខ្មែរអាមេរិកបានឲ្យដឹងថារយៈពេលប្រាំមួយថ្ងៃ ចាប់ពីថ្ងៃទី២កុម្ភៈ ដល់ថ្ងៃ៧កុម្ភៈ ២០១៥ មានប្រជាពលរដ្ឋមកទទួលសេវាព្យាបាលជំងឺចំនួន៥៣៨០នាក់ គឺលើសផែនការ ក្នុងគម្រោងត្រឹម២០០០នាក់ប៉ុណ្ណោះ ។
លោកវេជ្ជបណ្ឌិតបន្តទៀតថា អ្នកជំងឺមកទទួលសេវាចំនួន៥៣៨០នាក់ នោះរួមមានជំងឺត្រូវវះកាត់ធំចំនួន៤៦នាក់ វះកាត់មធ្យមចំនួន៣០នាក់ អ្នកជំងឺសរសៃប្រសាទ៦០នាក់ ជំងឺមាត់ធ្មេញ៥០០នាក់ ជំងឺសន្លាក់១១៨នាក់ ជំងឺភ្នែកចំនួន៣០០០នាក់ ចែកវែនតាជូន៣០០០ ព្យាបាលដោយចាក់ម្ជុលវិទ្យាសាស្ត្រចំនួន២០០នាក់ និងផ្តល់ដៃសិប្បនិមិត្តដល់ជនពិការដៃចំនួន៥៤នាក់ ។
បើតាមលោកស្រីវេជ្ជបណ្ឌិត TeriKtano បានឱ្យដឹងថា កម្មវិធីនេះមាន២ផ្នែក ១-អំណោយមនុស្សធម៌របស់មូលនិធិជំនួយដៃអាមេរិកកាំងជំនួយដៃដល់ជនពិការចំនួន៦០ប្រទេសជុំវិញពិភពលោក ហើយមូលនិធិនេះបង្កើតឡើងដោយលោកវិស្វករជនជាតិអាមេរិកកាំងម្នាក់ ដែលមានកូនស្រីម្នាក់គ្រោះថ្នាក់ចរាចរណ៍បាក់ដៃពិការដៃទាំងពីរកាលពី២៥ឆ្នាំមុន លោកវិស្វករបានង្កើតមូលនិធិជួយផ្តល់ដៃឱ្យជនពិការរហូតដល់បច្ចុប្បន្នចំនួន៦០ប្រទេសហើយ ។
ដោយឡែកនៅព្រះរាជាណាចក្រកម្ពុជាមូនិធិផ្តល់ក្តីសង្ឃឹម និងជំនួយដៃអាមេរិកកាំងមានគម្រោងជំនួយដៃ២០០០ដៃ ដល់ជនពិការកម្ពុជា ឆ្នាំ២០១៥នេះ ជំនួយដៃបានជាង៤០០ដៃហើយ គឺនៅខេត្តសៀមរាប១០០ដៃ ខេត្តបាត់ដំបង៤០ដៃ ខេត្តតាកែវ១០០ដៃ រាជធានីភ្នំពេញ១០០ដៃ និងនៅខេត្តកំពង់សោម១០០ដៃ ហើយនៅខេត្តស្វាយរៀងនេះ គម្រោងផ្តល់១០០ដៃ ។ ផ្នែកទី២-ក្រុមគ្រូពេទ្យស្ម័គ្រចិត្តសមាគមសុខាភិបាលខ្មែរអាមេរិក មកពីអាមេរិកមាន៦០អង្គ/នាក់ គឺព្រះសង្ឃ២អង្គ ហើយក្នុងនោះមានវេជ្ជបណ្ឌិត៣០នាក់ និងវេជ្ជបណ្ឌិតគ្រូពេទ្យស្ម័គ្រចិត្តនៅភ្នំពេញ៣៩អង្គ/នាក់ ព្រះសង្ឃ៤អង្គ ។ មកពិនិត្យព្យាបាលអ្នកជំងឺនៅកម្ពុជា ដោយឥតគិតថ្លៃក្នុងគម្រោង៥ម៉ឺននាក់ ទៅ១សែននាក់ ហើយការពិនិត្យព្យាបាល៥ខេត្តខាងលើ បានជាង២ម៉ឺននាក់ ហើយដោយឡែកខេត្តស្វាយរៀងគម្រោង២ពាន់នាក់ គឺពិនិត្យព្យាបាលជំងឺទូទៅផ្តល់សេវាវះកាត់ និងមានពិនិត្យព្យាបាលជំងឺមាត់ធ្មេញពិនិត្យព្យាបាលជំងឺភ្នែកផ្តល់វែនតា ។ល។
មួយក្រុមទៅពិនិត្យព្យាបាលជំងឺនៅមណ្ឌលសុខភាពក្រោលគោស្រុកស្វាយជ្រំរយៈពេល២ថ្ងៃ មានអ្នកជំងឺមកព្យាបាលចំនួន៩៤៩នាក់ ។ នៅមន្ទីរពេទ្យបង្អែកជីភូ អ្នកជំងឺចំនួនជាង៥០០នាក់ ហើយការផ្តល់សេវាពិនិត្យព្យាបាលជំងឺទូទៅ និងការវះកាត់ពិនិត្យព្យាបាលជំងឺភ្នែក និងផ្តល់វែនតាពិនិត្យព្យាបាលជំងឺមាត់ធ្មេញ ដោយមនុស្សធម៌មានប្រជាពលរដ្ឋមកទទួលសេវា ពិនិត្យព្យាបាលជំងឺចំនួន៥៣៨០នាក់ លើសការគ្រោងទុក ។ ហើយនៅពេលចាប់ពីម៉ោង០៧យប់ ដល់ម៉ោង០៩យប់រៀងរាល់ថ្ងៃ ចាប់ពីថ្ងៃទី២ ដល់ថ្ងៃទី០៦ បានបណ្តុះបណ្តាលមន្ត្រីសុខាភិបាលមន្ទីរពេទ្យបង្អែក ស្រុក-ខេត្ត និងនិស្សិតកម្មសិក្សាដែលកំពុងចុះស្តារតាមមន្ទីរពេទ្យ ដើម្បីពង្រីកចំណេះដឹងបន្ថែម និងមានជំនាញ ក្នុងការផ្តល់សេវាសុខភាពជូនប្រជាពលរដ្ឋឱ្យកាន់តែល្អប្រសើរ និងជាទំនុកចិត្តរបស់ប្រជាពលរដ្ឋ ៕
ចែករំលែកព័តមាននេះ