ខេត្តកំពត ៖ ខណៈជំនន់ទឹកភ្លៀងលិចផ្ទះសម្បែង អ្នកភូមិជាច្រើននាក់មកពីភូមិពងទឹក ឃុំស្ដេចគង់ខាងជើង ស្រុកបន្ទាយមាស បាននាំគ្នាមកកាយកំប្លោកដែលរសាត់មកកកស្ទះជាប់នឹងទ្វារទំនប់ទឹកស្ពានតន់ហន់ ជាប់នឹងព្រំប្រទល់ប្រទេសវៀតណាម ។
ដោយសារតែកំប្លោកនេះ ធ្វើឱ្យចាល់ទឹកហូរចេញមិនរួច ធ្វើឲ្យផ្ទះសម្បែង និងសន្ទូង ព្រមទាំង
ដំណាំផ្សេងទៀតរងផលប៉ះពាល់ជាច្រើនហិកតាទើបពួកគាត់លើកគ្នាមកកាយយកកំប្លោកចេញពីទ្វារទឹក តាំងពីដើមខែសីហានេះរហូតមកដល់ថ្ងៃទី៧ ខែសីហា ។
លោក អ៊ិន វណ្ណនី ជំទប់ទី១ឃុំស្ដេចគង់ខាងជើង បានឲ្យដឹងកាលពីរសៀលថ្ងៃទី៧ ខែសីហា ថា ទ្វារទំនប់ទឹកស្ពានតន់ហន់នេះជាទ្វារទឹកដែលក្រសួងធនធានទឹកនិងឧតុនិយមជាអ្នកកសាង ។
អ្នកភូមិជាច្រើននាក់ដែលលើកគ្នាមកកាយកំប្លោកចេញពីមុខទ្វារទឹកនេះ គឺដើម្បីឲ្យទឹកហូរបានលឿន កុំឲ្យលិចលង់ផ្ទះសម្បែង រួមនឹងដំណាំផ្សេងៗទៀតដែលនៅលើទំនប់ ។
លោកជំទប់ទី១ថ្លែងទៀតថា អ្នកភូមិពងទឹកបានលើកគ្នាមកកាយកំប្លោកដែលចាល់នៅមុខទ្វារទឹកនេះតាំងពីដើមខែសីហារហូតមក ។ ពួកគាត់នៅតែបន្តប្រឹងប្រែងការពារទំនប់ទឹកនេះជាប្រចាំ បើមិនដូច្នេះទេពលរដ្ឋរាប់រយពាន់គ្រួសារអាចប្រឈមនឹងជំនន់ទឹកភ្លៀង បើសិនមិនមើលថែឬកាយកំប្លោកចេញពីទ្វារទឹកទេនោះ ៕
ចែករំលែកព័តមាននេះ