ខេត្តមណ្ឌលគិរី៖ រដ្ឋមន្ត្រីក្រសួងទេសចរណ៍លោក ថោង ខុន បានថ្លែងថា ខេត្តមណ្ឌលគិរីមានសក្កានុពលដ៏សម្បូរបែបលើពហុវិស័យ រួមទាំងវិស័យទេសចរណ៍ ឧស្សាហកម្មរ៉ែ និងថាមពល កសិកម្មនិងកសិ-ឧស្សាហកម្ម ធនធានធម្មជាតិនិងវប្បធម៌ជនជាតិដើមភាគតិច ព្រមទាំងច្រកទ្វារភាគីដែលប្រៀបបាននឹងគ្រាប់ពេជ្រសម្រាប់ភូមិភាគឦសាន្តនិងសម្រាប់ កម្ពុជាដែលទ្រទ្រង់ការអភីវឌ្ឍន៍វិស័យនិងសេដ្ឋកិច្ចខេត្តទាំងមូលទាំងសម្រាប់បច្ចុប្បន្ននិង អនាគត ខណដែលចក្ខុវិស័យក្នុងការអភិវឌ្ឍន៍និងវិនិយោគរបស់ខេត្តស្ថិតក្នុងកម្រិតមួយខ្ពស់ ។
លោករដ្ឋមន្ត្រីបានថ្លែងបែបនេះនៅក្នុងឱកាសបើកសិក្ខាសាលាពិគ្រោះយោបល់លើ សេចក្តីព្រាងបឋមផែនការមេសម្រាប់ការអភិវឌ្ឍន៍វិស័យទេសចរណ៍ខេត្តមណ្ឌលគីរីកាលពី ថ្ងៃទី១០ ខែសីហា ឆ្នាំ២០២០ ដោយមានការចូលរួមពីលោក ស្វាយ សំអ៊ាង អភិបាលនៃគណ អភិបាលខេត្តរួមមានអភិបាលស្រុក ចៅសង្កាត់ មេឃុំ អង្គភាពជំនាញវិស័យឯកជន អង្គភាព ជាតិអន្តរជាតិ ។
លោករដ្ឋមន្ត្រីបានលើកឡើងថា បើគិតត្រឹមតែវិស័យទេសចរណ៍ ខេត្តមណ្ឌលគិរីមាន ភាពខ្លាំង និងអំណោយផលដល់ការអភិវឌ្ឍន៍ជាគោលដៅអេកូទេសចរណ៍ និងទេសចរណ៍ វប្បធម៌ (ជនជាតិដើមភាគតិច) លំដាប់ថ្នាក់អន្តរជាតិ ដែលនឹងអាចទាក់ទាញភ្ញៀវទេសចរ មកកម្សាន្តឲ្យបានច្រើន និងមកច្រើនដង បង្កើត និងបង្កើនការងារ បង្កើនចំណូល និងលើក កម្ពស់ជីវភាពប្រជាពលរដ្ឋមូលដ្ឋាន។
លោក ថោង ខុន គូសបញ្ជាក់ថា ខេត្ត មណ្ឌលគិរីមានសក្ដានុពលធំធេងសម្រាប់ ការអភិវឌ្ឍជាកសិដ្ឋានផ្កា បន្លែ ផ្លែឈើ ដើម្បីផ្គត់ផ្គង់តម្រូវការក្នុងស្រុក និងអាចឈានដល់ ការនាំចេញនៅបណ្ដាប្រទេសផ្សេងៗផងដែរ។ ទីតាំងភូមិសាស្ត្រខេត្តមណ្ឌលគិរីមាន លក្ខណៈប្រហាក់ប្រហែលនឹងខេត្តឈៀងម៉ៃ ប្រទេសថៃ និងខេត្តដាឡាត់ ប្រទេសវៀតណាម ជាពិសេសភាពអំណោយផលនៃអាកាសធាតុត្រជាក់បង្គួរនៅតំបន់នេះ រួមជាមួយដីដ៏មាន ជីជាតិ។
លោកក៏បានអះអាងថាដែរថាវិស័យទេសចរណ៍ខេត្តមណ្ឌលគិរីធ្វើឲ្យយើងអាចវាយតម្លៃថា ស្ថិតក្នុងដំណាក់ កាលទី២ នៃវដ្តជីវិតនៃការអភិវឌ្ឍទេសចរណ៍ (Life Cycle) ដែលជា ដំណាក់កាលកំណើនដំបូង (Growth Development) និងមានសក្តានុពលក្នុងការអភិវឌ្ឍខ្លាំង បន្ថែមទៀតនាពេលអនាគត និងបង្កើតបានជាកាលានុវត្តជាច្រើនសម្រាប់ការវិនិយោគ និងបង្កើតតម្លៃបន្ថែមក្នុងវិស័យ ទេសចរណ៍ និងវិស័យសេដ្ឋកិច្ចនានា។
លោក ថោង ខុន ក៏បានថ្លែងអំណរគុណយ៉ាងជ្រាលជ្រៅចំពោះរាជ-រដ្ឋាភិបាល ក្រោមការដឹកនាំប្រកបដោយភាពឈ្លាសវៃ និងគតិបណ្ឌិតរបស់សម្តេចតេជោនាយករដ្ឋមន្ត្រី ដែលបានអនុញ្ញាតឲ្យមានការសិក្សាសាងសង់ព្រលានយន្តហោះខេត្តមណ្ឌលគិរី ដែលនឹង ទាក់ទាញភ្ញៀវទេសចរ និងការតភ្ជាប់ពីគោលដៅទេសចរណ៍ខេត្តសៀមរាប រាជធានីភ្នំពេញ និងតំបន់ឆ្នេរមកកាន់ខេត្តមណ្ឌលគិរី និងភូមិភាគឦសាន្តទាំងមូលឲ្យមានភាពកាន់តែងាយស្រួល។
លោកបន្ថែមថា អនាគត ព្រលានយន្តហោះខេត្តមណ្ឌលគិរីនេះ អាចនឹងត្រូវប្រើប្រាស់ ជាព្រលានយន្តហោះក្នុងតំបន់ តភ្ជាប់ខេត្តមណ្ឌលគិរីទៅគោលដៅទេសចរណ៍ជិតខាង រួមមាន ប្រទេសថៃ វៀតណាម និងឡាវ ព្រមជាមួយទីក្រុងសំខាន់ៗរបស់អាស៊ាន និងប្រទេសផ្សេង ទៀត ដូចជាប្រទេសជប៉ុន កូរ៉េ អូស្ត្រាលិ និងតំបន់មជ្ឈឹមបូព៌ាជាដើម ដែលប្រើរយៈពេល ហោះហើរចន្លោះពី ៥-៧ម៉ោង ។
លោករដ្ឋមន្ត្រីក៏បានបង្ហាញនូវភាពគាំទ្រចំពោះការរៀបចំផែនការមេសម្រាប់អភិវឌ្ឍន៍ វិស័យទេសចរណ៍ខេត្តមណ្ឌលគិរី ដែលមានលក្ខណៈជាផែនការសមា-ហរណកម្មជាមួយ វិស័យផ្សេងៗ ដែលនឹងក្លាយជាត្រីវិស័យដ៏សំខាន់ចង្អុលបង្ហាញយន្តការ និងទិសដៅ យុទ្ធសាស្ត្រសំខាន់ៗ ដើម្បីឆ្លើយតបទៅនឹងចក្ខុ វិស័យនៃការអភិវឌ្ឍជាតិក្នុងរយៈពេល ២០២០-២០៣៥ និងបណ្តាឆ្នាំខាងមុខ ដោយផ្អែកលើស្ថានភាពបច្ចុប្បន្ន និងការប្តេជ្ញាចិត្ត ច្បាស់លាស់របស់រាជរដ្ឋាភិបាល។
នាឱកាសនោះលោករដ្ឋមន្ត្រីក៏បានស្នើឲ្យអាជ្ញាធរខេត្ត ដែលនៅទីនេះមានគ្រប់សមត្ថកិច្ច គ្រប់កម្រិត និងជំនាញ រាប់ចាប់ពីរដ្ឋបាលឃុំ-សង្កាត់ ស្រុក ក្រុង មន្ទីរជំនាញ និងគណៈបញ្ជាការឯកភាពខេត្ត អនុវត្តឲ្យបានខ្ជាប់ខ្ជួន និងម៉ឺងមាត់ដាច់ខាតនូវបទបញ្ជា របស់ប្រមុខរាជរដ្ឋាភិបាល ក្នុងការទប់ស្កាត់ការទន្ទ្រានដីរដ្ឋ ដីព្រៃជាកម្មសិទ្ធិឯកជន ដែលបម្រើ តែផលប្រយោជន៍បុគ្គលមួយក្រុមតូច។
លោក ស្វាយ សំអ៊ាង អភិបាលនៃគណអភិបាលខេត្តមណ្ឌលគិរី បានឲ្យដឹងថា ចំពោះការរៀបចំផែនការមេនេះ ក្រុមការងារបច្ចេកទេសបានចែកជា ២ ដំណាក់កាលរួមមាន ដំណាក់កាលទី១៖ គឺជាដំណាក់កាលនៃការចុះប្រមូលទន្និន័យ តាមរយៈការចុះធ្វើអង្កេត (Survey) និងចុះជួបសម្ភាសន៍ជាមួយភ្ញៀវទេសចរ ផ្នែកឯកជន ប្រជាពលរដ្ឋមូលដ្ឋាន និងការចុះជួបពិភាក្សាជាមួយអង្គភាពជំនាញសំខាន់ៗក្នុងខេត្ត។ ចំណែកដំណាក់កាលទី២៖ ជាដំណាក់កាលនៃការសរសេរផែនការមេ ដែលក្រុមការងារបច្ចេក ទេសបានរៀបចំ និងបានកំពុងដាក់ជូនអង្គសិក្ខាសាលាពិនិត្យ និងពិភាក្សាលើសេចក្តីព្រាង បឋមនាពេលនេះ។
លោក ស្វាយ សំអ៊ាង បានបញ្ជាក់ថា ផែនការមេសម្រាប់អភិវឌ្ឍន៍ វិស័យទេសចរណ៍ខេត្តមណ្ឌលគិរីនេះ ត្រូវបានរៀបចំជាផែនការដែលមានលក្ខណៈ សមាហ រណកម្មជាមួយវិស័យផ្សេងៗ ដើម្បីជាត្រីវិស័យដ៏សំខាន់ចង្អុលបង្ហាញយន្តការ និងទិសដៅ យុទ្ធសាស្ត្រសំខាន់ៗ ឆ្លើយតបទៅនឹងចក្ខុវិស័យនៃការអភិវឌ្ឍជាតិក្នុងរយៈពេល ២០២០-២០៣៥ និងបណ្តាឆ្នាំខាងមុខ ដោយផ្អែកលើស្ថានភាពបច្ចុប្បន្ន និងការប្តេជ្ញាចិត្តច្បាស់ លាស់របស់រាជរដ្ឋាភិបាល។
លោកអភិបាលខេត្តបានបញ្ជាក់បន្ថែមថា ជាលទ្ធផល ផែនការមេអភិវឌ្ឍន៍ វិស័យទេសចរណ៍ខេត្តមណ្ឌលគិរី បានកំណត់ទិសដៅយុទ្ធសាស្ត្រអាទិភាព ចំនួន ០៦ រួមមាន៖ ទី១៖ ការបែងចែកតំបន់ទេសចរណ៍អាទិភាពសម្រាប់ការអភិវឌ្ឍ ។ ទី២៖ ការអភិវឌ្ឍផលិតផលទេសចរណ៍ និងវិនិយោគក្នុងវិស័យទេសចរណ៍ ។ ទី៣៖ ការពង្រឹង គុណភាពទេសចរណ៍ និងធនធានមនុស្សគាំទ្រ ។ ទី៤៖ ការផ្សព្វផ្សាយ និងពង្រឹងរូបភាព វិស័យទេសចរណ៍ក្នុងខេត្តមណ្ឌលគិរី ។ ទី៥៖ ការអភិវឌ្ឍហេដ្ឋារចនាសម្ព័ន្ធ អន្តរវិស័យគាំទ្រដល់ការអភិវឌ្ឍវិស័យទេសចរណ៍ ។ ទី៦៖ ការសម្រួលការធ្វើដំណើរ ការតភ្ជាប់ និងការធ្វើសមាហរណកម្ម ក្នុងក្របខណ្ឌជាតិ និងតំបន់ ។គិតត្រឹមថ្ងៃធ្វើសិក្ខាសាលាពិគ្រោះយោបល់នេះ ការរៀបចំផែនការមេ សម្រេចបានប្រមាណ ៨០% នៃផែនការដែលបានកំណត់។
លោកថោង រដ្ឋសក្តិ អគ្គនាយកអភិវឌ្ឍន៍ទេសចរណ៍ និងសហប្រតិបត្តិការអន្តរជាតិបានមានប្រសាសន៍ថា ដើម្បីសិក្សារៀបចំផែនការមេសម្រាប់ការអភិវឌ្ឍវិស័យទេសចរណ៍ខេត្តមណ្ឌលគិរី បានមានប្រសាសន៍ថា ចំពោះការរៀបចំផែនការមេនេះ ក្រុមការងារបច្ចេកទេសបានចែកជា ២ ដំណាក់កាល៖ – ដំណាក់កាលទី១៖ គឺជាដំណាក់កាលនៃការចុះប្រមូលទន្និន័យ តាមរយៈការចុះធ្វើអង្កេត (Survey) និងចុះជួបសម្ភាសន៍ជាមួយភ្ញៀវទេសចរ ផ្នែកឯកជន ប្រជាពលរដ្ឋមូលដ្ឋាន និងការចុះជួបពិភាក្សាជាមួយអង្គភាពជំនាញសំខាន់ៗក្នុងខេត្ត។ –
ដំណាក់កាលទី២៖ ជាដំណាក់កាលនៃការសរសេរផែនការមេ ដែលក្រុមការងារបច្ចេកទេសបានរៀបចំ និងបានកំពុងដាក់ជូនអង្គសិក្ខាសាលាពិនិត្យ និងពិភាក្សាលើសេចក្តីព្រាងបឋមនាពេលនេះ។ តាមរយៈការសិក្សាបែបលក្ខណៈបច្ចេកទេស ផែនការមេសម្រាប់អភិវឌ្ឍន៍វិស័យទេសចរណ៍ខេត្តមណ្ឌលគិរីនេះ ត្រូវបានរៀបចំជាផែនការដែលមានលក្ខណៈសមាហរណកម្មជាមួយវិស័យផ្សេងៗ ដើម្បីជាត្រីវិស័យដ៏សំខាន់ចង្អុលបង្ហាញយន្តការ និងទិសដៅយុទ្ធសាស្ត្រសំខាន់ៗ ឆ្លើយតបទៅនឹងចក្ខុវិស័យនៃការអភិវឌ្ឍជាតិក្នុងរយៈពេល ២០២០-២០៣៥ និងបណ្តាឆ្នាំខាងមុខ ដោយផ្អែកលើស្ថានភាពបច្ចុប្បន្ន និងការប្តេជ្ញាចិត្តច្បាស់លាស់របស់រាជរដ្ឋាភិបាល។
លោកបន្តថាផែនការមេអភិវឌ្ឍន៍វិស័យទេសចរណ៍ខេត្តមណ្ឌលគិរី បានកំណត់ទិសដៅយុទ្ធសាស្ត្រអាទិភាព ចំនួន ០៦ រួមមាន៖ ទី១៖ ការបែងចែកតំបន់ទេសចរណ៍អាទិភាពសម្រាប់ការអភិវឌ្ឍ ទី២៖ ការអភិវឌ្ឍផលិតផលទេសចរណ៍ និងវិនិយោគក្នុងវិស័យទេសចរណ៍ ទី៣៖ ការពង្រឹងគុណភាពទេសចរណ៍ និងធនធានមនុស្សគាំទ្រ ទី៤៖ ការផ្សព្វផ្សាយ និងពង្រឹងរូបភាពវិស័យទេសចរណ៍ក្នុងខេត្តមណ្ឌលគិរី ទី៥៖ ការអភិវឌ្ឍហេដ្ឋារចនាសម្ព័ន្ធអន្តរវិស័យគាំទ្រដល់ការអភិវឌ្ឍវិស័យទេសចរណ៍ ទី៦៖ ការសម្រួលការធ្វើដំណើរ ការតភ្ជាប់ និងការធ្វើសមាហរណកម្ម ក្នុងក្របខណ្ឌជាតិ និងតំបន់៕ (កែសម្រួលដោយ ៖ធីតា)
ចែករំលែកព័តមាននេះ