ខេត្តកំពង់ឆ្នាំង ៖ ផ្លូវទៅកាន់រមណីយដ្ឋានទឹកធ្លាក់ថ្មក្រាល ដែលបានកាត់ផ្ដាច់ដោយសារជំនន់ទឹកភ្លៀងកាលពីវេលារំលងអធ្រាត្រឈានចូលថ្ងៃទី៧ ខែសីហា ឆ្នាំ២០២០ ត្រូវបានជួសជុលឡើងវិញហើយ ភ្ញៀវទេសចរអាចទៅលេងកម្សាន្តបាន ។ នេះបើតាមការអះអាងរបស់អាជ្ញាធរស្រុកទឹកផុស កាលពីរសៀលថ្ងៃទី៨ ខែសីហា ។
លោក សុខ សុន្ធី អភិបាលស្ដីទីស្រុកទឹកផុសថ្លែងថា កាលពីយប់ថ្ងៃទី៦ ខែសីហា ឆ្នាំ២០២០ ភ្លៀងបានធ្លាក់យ៉ាងខ្លាំងនៅតំបន់ផ្នែកខាងលើ ហើយបន្ទាប់មកនៅវេលារំលងអធ្រាត្រឈានចូលថ្ងៃទី៧ ខែសីហា បានបាក់ដាច់ផ្លូវទៅកាន់រមណីយដ្ឋានទឹកធ្លាក់ថ្មក្រាលអស់ប្រហែល៥
ម៉ែត្រ ដែលជាហេតុមិនអាចឲ្យបងប្អូនប្រជាពលរដ្ឋ ឬភ្ញៀវទេសចរធ្វើដំណើរបាន ។
នៅព្រឹកថ្ងៃទី៧ ខែសីហានោះ លោកក៏បានជូនដំណឹងដល់ប្រជាពលរដ្ឋក៏ដូចជាតាមបណ្តាញសង្គមដល់ភ្ញៀវទេសចរ សុំផ្អាកមួយរយៈខ្លីសិន ។ ប៉ុន្តែនៅថ្ងៃដដែលនោះដែរ ដោយកម្លាំងសាមគ្គីរបស់ប្រជាពលរដ្ឋសហគមន៍ ដឹកនាំដោយរូបលោកផ្ទាល់ ក៏បានយកឈើធ្វើជាស្ពានបណ្ដោះអាសន្ន ដែលអាចឱ្យភ្ញៀវធ្វើដំណើរឆ្លងកាត់បាន ។ ការជួសជុលបានប្រើរយៈពេលមួយថ្ងៃនេះ រហូតដល់វេលាម៉ោង៣និង៣០នាទីរសៀលថ្ងៃទី៨ ខែសីហា ទើបរួចរាល់ជាស្ថាពរ ។
លោកបានបញ្ជាក់ថា ប៉ុន្តែអនុញ្ញាតតែរថយន្តធុនតូចប្រភេទទេសចរណ៍ធម្មតាប៉ុណ្ណោះ ឯរថយន្តធុនធំដឹកធ្ងន់ចាប់ពីចំណុះ៣តោនឡើង ទៅមិនអនុញ្ញាតឱ្យបើកបរលើផ្លូវនោះឡើយ ។ លោកក៏សូមបញ្ជាក់ជាថ្មីថា ភ្ញៀវទេសចរអាចទៅលេងកម្សាន្តនៅថ្ងៃអាទិត្យនេះបាន ។
សូមបញ្ជាក់ថា រមណីយដ្ឋានទឹកធ្លាក់ថ្មក្រាល គឺជារមណីយដ្ឋានមួយដែលទើបត្រូវបានបង្កើតឡើងរយៈពេល៣-៤ឆ្នាំចុងក្រោយនេះ និងមានភ្ញៀវទៅលេងកម្សាន្តយ៉ាងច្រើនកុះករ ។ រមណីយដ្ឋាននេះ ស្ថិតក្នុងឃុំជៀប ស្រុកទឹកផុស មានចម្ងាយជាង៥០គីឡូម៉ែត្រពីក្រុងកំពង់ឆ្នាំង៕
ចែករំលែកព័តមាននេះ