ADផ្ទាំងផ្សព្វផ្សាយពាណិជ្ជកម្ម

នាងប៉ុនប៉ងច្រើនលើក តែមិនបានសម្រេច លុះលើកនេះជួយមិនទាន់

3 ឆ្នាំ មុន

កំពង់ចាម
១០ ខែ សីហា ឆ្នាំ ២០២០ ម៉ោង ១៤:៥៦

ខេត្តកំពង់ចាម ៖ មនុស្សម្នារាប់រយនាក់បាននាំគ្នាភ្ញាក់ផ្អើល បន្ទាប់ពីឃើញស្ត្រីម្នាក់ជិះម៉ូតូមួយគ្រឿងមកលោតទឹកពីលើស្ពានកោះប៉ែន ស្ថិតនៅក្នុងឃុំកោះមិត្ត ស្រុកកំពង់ សៀម កាលពីវេលាម៉ោង៨និង១០នាទីព្រឹក ថ្ងៃទី៩សីហា ២០២០ លុះក្រោយមកត្រូវបានអ្នកនេសាទប្រទះឃើញសពមានចំងាយប្រមាណ២ទៅ៣គីឡូម៉ែត្រពីស្ពានកោះប៉ែន រួចចេញទូកទៅជួយយកសពមកដាក់នៅច្រាំងទន្លេ ដើម្បីធ្វើការត្រួតពិនិត្យនិងកោសល្យវិច័យ។

សមត្ថកិច្ចមូលដ្ឋានបានប្រាប់ឲ្យដឹងថា ស្ត្រីរងគ្រោះឈ្មោះហួន និមល អាយុ៣១ឆ្នាំ មានស្រុកកំណើតក្នុងសង្កាត់បឹងកុក ក្រុងកំពង់ចាម និងមានទីលំនៅបច្ចុប្បន្នភូមិកំពង់រលីង សង្កាត់សំបូរមាស ក្រុងកំពង់ចាម ដោយបានលោតទឹកត្រង់ផ្នែកកណ្ដាលស្ពាននិងបានបន្សល់ទុកម៉ូតូមួយគ្រឿងម៉ាកស្កុបពី ពណ៌ខៀវ ស៊េរីឆ្នាំ២០២០ ពាក់ស្លាកលេខកំពង់ចាម1R-8550 ។

នគរបាលមូលដ្ឋានបានប្រាប់បន្តថា បន្ទាប់ពីសមត្ថកិច្ចក៏បានទទួលដំណឹងថា មានមនុស្សលោតទឹកពីលើស្ពានកោះប៉ែនរួចមក ក៏បានទាក់ទងតាមវិទ្យុទៅបណ្ដាប៉ុស្តិ៍នៅផ្នែកខាងក្រោមឲ្យជួយមើលក្រែងឃើញសពអណ្ដែត លុះក្រោយមកនៅចម្ងាយប្រមាណជាង២គីឡូម៉ែត្រពីស្ពានកោះប៉ែនគេបានឃើញកាបូបស្ពាយនៅជាប់នឹងខ្នងជនរងគ្រោះបានផុសណ្តែតឡើងលើផ្ទៃទឹក ក្នុងគ្រានោះមានបងប្អូនអ្នកនេសាទខ្មែរអ៊ិស្លាមបានប្រទះឃើញក៏ចេញទៅជួយសង្គ្រោះដែរ ប៉ុន្តែហួសពេលទៅហើយ គឺស្ត្រីរងគ្រោះបាត់បង់ជីវិតបាត់ទៅហើយ ។

តាមប្រភពដដែលបានបន្តថា បន្ទាប់មកក៏បានលើកសពដាក់លើទូកម៉ាស៊ីនយកមកដាក់នៅច្រាំងទន្លេក្នុងឃុំកោះមិត្តស្រុកកំពង់សៀម នឹងបានហៅមន្ត្រីជំនាញព្រហ្មទណ្ឌស្រុករួមនឹងពេទ្យមណ្ឌលសុខភាពចុះមកពិនិត្យកោសល្យវិច័យ បានបញ្ជាក់ថា ស្ត្រីរងគ្រោះពិតជាបាត់បង់ជីវិតដោយលង់ទឹក រួចក៏បានប្រគល់សពទៅឱ្យឪពុកដឹកតាមរថយន្ត មួយគ្រឿងយកទៅរៀបចំធ្វើបុណ្យតាមប្រពៃណី នៅភូមិកំពង់រលីង សង្កាត់សំបួរមាស ក្រុងកំពង់ចាម។

សមត្ថកិច្ចមូលដ្ឋានបញ្ជាក់ថា នាពេលកន្លងមកស្ត្រីរងគ្រោះធ្លាប់បានប៉ុនប៉ងលោតទឹកពីលើស្ពានគីហ្សុណា នាក្រុងកំពង់ចាម ចំនួន២ទៅ៣ដងរួចមកហើយ តែមិនបានសម្រេច ព្រោះសមត្ថកិច្ចយាមនៅទីនោះក៏ឃាត់ទាន់ពេល។ លុះលើកនេះ មិនអាចជួយទាន់ បណ្ដាលឲ្យស្ត្រីរងគ្រោះបាត់បង់ជីវិតតែម្តង ។ ចំណែកមូលហេតុគឺដោយសារស្ត្រីរងគ្រោះមានជំងឺផ្លូវចិត្ត និងលេបថ្នាំជារៀងរាល់ថ្ងៃផងដែរ៕ (កែសម្រួលដោយ ៖ ធីតា)