រាជធានីភ្នំពេញ ៖ មន្ត្រីជាន់ខ្ពស់ក្រសួងសុខាភិបាលបានឲ្យដឹងថា ក្រសួងរកឃើញមានអ្នកប៉ះពាល់ជាមួយស្ត្រីមួកខៀវដែលឆ្លងជំងឺកូវីដ១៩ មានចំនួន៩នាក់ ហើយអ្នកទាំង៩ នាក់នោះ ត្រូវបានយកមកដាក់ធ្វើចត្តាឡីស័កនៅមណ្ឌលចត្តាឡីស័កវិទ្យាល័យតាខ្មៅហើយ ។ ពេលនេះ ក្រសួងកំពុងធ្វើការតាមដានអ្នកប៉ះពាល់ដោយប្រយោលជាបន្តបន្ទាប់។
លោក វេជ្ជបណ្ឌិត លី សូវ៉ាន់ ប្រធាននាយកដ្ឋានប្រយុទ្ធនឹងជំងឺឆ្លងនៃក្រសួងសុខាភិបាល បានឲ្យកោះសន្តិភាពដឹងនៅព្រឹកថ្ងៃទី១០ សីហា ឆ្នាំ២០២០ ថា «យើងគ្រាន់ តែយកសំណាកយកទៅមើលទេ ហើយកំពុងពិនិត្យតាមដានសុខភាពគាត់ទៀត (អ្នកទាំង ៩នាក់) ។ យើងបានសម្រេចយកគាត់ទាំង៩នាក់នេះ ដាក់ធ្វើចត្តាឡីស័កនៅមណ្ឌលសុខភាពចត្តាឡីស័កតាខ្មៅហើយ» ។
លោកបានបន្តថា មនុស្ស៩នាក់នេះគឺជាអ្នកប៉ះពាល់ដោយប្រយោល ដូច្នេះអ្វីដែលធ្វើនេះ គឺតាមជំនាញពេទ្យរបស់យើង។ ពេលនេះ ក្រុមការងារកំពុងតែធ្វើការតាមដានស្វែងរកអ្នកដែលប៉ះពាល់ជាមួយស្ត្រីរូបនេះបន្តទៀតថាដែលធម្មតានោះធ្វើការតាមដានរហូតដល់១៤ថ្ងៃ។
លោកបានបញ្ជាក់ថា «យើងមិនអាចសួរតែគាត់មួយបានទេ វាមិនគ្រប់គ្រាន់នោះទេ យើងត្រូវសួរអ្នកដែលនៅជុំវិញផ្ទះគាត់ ពីណាខ្លះ ដូច្នេះយើងកំពុងធ្វើការងារហ្នឹង»។
សូមជម្រាបថា យ៉ាងហោចណាស់មានមនុស្សចំនួន៩នាក់ ត្រូវបានដាក់ក្នុងការតាមដានស្វែងកូវីដ-១៩ ក្រោយពួកគេបានប៉ះពាល់ជាមួយនឹង ស្ត្រីកងទ័ពមួកខៀវដែលវិជ្ជមានកូវីដ១៩ នៅសង្កាត់សិត្បូ ខេត្តកណ្តាល ។
ចែករំលែកព័តមាននេះ