រាជធានីភ្នំពេញ ៖ អ្នកជំនាញម្នាក់បានលើកឡើងថា កូនអ្នកមានឬមនុស្សដែលកើតមកក្នុងគ្រួសារដែលមានទ្រព្យសម្បត្តិស្តុកស្តម្ភ មិនជាសូវមានការតស៊ូដូចអ្នកដែលកើតមកក្នុងគ្រួសារមធ្យម ឬក្រីក្រនោះទេ ។
អ្នកជំនាញបានបន្តថា ចំពោះកូនអ្នកមាន កើតមកអ្វីៗគ្រប់យ៉ាង គឺត្រូវបានរៀបចំ និងមានជាស្រេចនូវអ្វីៗដែលឪពុកម្តាយបានផ្តល់ឱ្យ សូម្បីតែការរៀបអាពាហ៍ពិពាហ៍ក្តី ក៏ឪពុកម្តាយជារៀបចំឱ្យដែរ ។ ចំពោះកូនអ្នកក្រវិញអ្វីៗគ្រប់យ៉ាងត្រូវតែខំដោយខ្លួនឯង ហើយបើជួបឧបសគ្គវិញ ក៏ត្រូវតែដោះខ្លួនឯងដែរ។
លោក ឌិន សុមេធារិទ្ធ ស្ថាបនិក ភូមិផ្កាត្រកួន «អ្នកជំនាញម្នាក់បានធ្វើការប្រៀបធៀបដូចនេះថា គេតែងតែប្រៀបធៀបមនុស្ស ២ ប្រភេទ ទៅនិងដើមឈើពីរប្រភេទ ដូចជាដើមចេក និងដើមឬស្សី ។ គាត់បាននិយាយថា កូនអ្នកមាន ឬអ្នកដែលកើតមកក្នុងគ្រួសារមានទ្រព្យសម្បត្តិច្រើន គឺប្រៀបដូចជា ដើមចេក រីឯកូនអ្នកក្រ ឬអ្នកដែលកើតមកក្នុងគ្រួសារក្រីក្រជាដើម គឺប្រៀបបានដូចជា ដើមឬស្សី។
ងាកមកនិយាយពីដើមចេកវិញ ដុះលឿន ឆាប់ធំ មានផ្លៃបរិភោគ ប៉ុន្តែខ្យល់បកតែបន្តិចទេ នឹងដួលហើយ មានន័យថាធំមែន តែមិនប្រាកដថារឹងមាំ ។ រីឯដើមឬស្សីវិញ មានដើមតូចជាង ដុះយូរ ប៉ុន្តែទោះបីមានព្យុះភ្លៀងខ្លាំងប៉ុណ្ណាក៏មិនងាយរលំដែល ហើយមានរឹសមាំទៀត។ កូនអ្នកមានបានកើតមក ត្រូវបានឪពុកម្តាយរៀបចំជាស្រេច ក្នុងការសិក្សា ដំណើរជីវិត មុខវិជ្ជាជំនាញ ជំនួញមានស្រាប់ ធ្វើការក៏រៀបឱ្យ រហូតដល់ទៅទុកដាក់ឱ្យមានគ្រួសារទៀត ចឹងអ្វីៗត្រូវបានងាយស្រួលរួចទៅហើយ សូម្បីតែមានបញ្ហាអ្វីក៏ដោយ ក៏ឪពុកម្តាយដោះស្រាយឱ្យដែរ។
ដូចនេះពួកគាត់ ដូចជាដើមចេកចឹង ជួបឧបសគ្គតិចតូច ដួលបាត់ ។ លោកបានបន្តថា «មានសុភាសិតមួយ បាននិយាយថា មានមិនដែលបី.ត ក្រមិនដែលបីជាន់ ។ មានមិនដែលបី.ត មានន័យថា អ្នកមានភាគច្រើនទំរើសកូន ដល់ពេលទំរើសកូនទៅ ធ្វើឱ្យកូនមិនពូកែទេ ។ ក្រមិនដែលបីជាន់ គឺយើងកើតមកហើយតែមិនចង់ក្រ ចឹងយើងខំប្រឹងធ្វើយ៉ាងណាមិនចង់នៅតែក្រទេ។ ដូចនេះទោះជួប ឧបសគ្គយ៉ាងណា ក៏នៅតែអរគុណភាពលំបាកឬឧបសគ្គដែល ហើយក៏ត្រូវគិតថា គេគ្រាន់តែចង់មកសាកល្បងយើងប៉ុណ្ណោះ»។
ក្រឡែកមកមើល ដើមឬស្សីវិញ លោក ឌិន សុមេធារិទ្ធ បាននិយាយថា កូនអ្នកក្រកាន់តែជួបឧបសគ្គ កាន់តែទៅមុខ កាន់តែខុសកាន់តែធ្វើទាល់តែត្រូវ កាន់តែជួបបញ្ហា កាន់តែត្រូវដោះស្រាយ ព្រោះមិនចង់ក្រទៀត ។ លោកបន្តថា បន្តថា «ចឹងសួរថាយើងចង់បានជីវិតជួប ឧបសគ្គឬមិនចង់ជួប ខ្ញុំឱ្យយុវជនទាំងអស់វិភាគ និងពិចារណា។ គ្រូខ្ញុំបានផ្តាំថា ប្រសិនបើយើងជួបឧបសគ្គ យើងត្រូវអរគុណវា អរគុណព្រះ ទេវតាដែលបានសាកល្បងខ្ញុំ ហើយដែលបានធ្វើឱ្យខ្ញុំកាន់តែខ្លាំង»។
ភាគច្រើននៃអ្នកជោគជ័យឬអ្នកមាន គឺតែងតែធ្លាប់ជួបការលំបាក បញ្ហា ឧបសគ្គ ភាពបរាជ័យ និងការជំពាក់បំណុលគេដែរ លោកប្រធានាធិបតី ដុលណា ត្រាំ ក៏ធ្លាប់ជួបបញ្ហាម្តងដែរ ដោយជំពាក់លុយគេ រាប់លាន ប៉ុន្តែគេនៅតែដោះបាន៕
ចែករំលែកព័តមាននេះ