ខេត្តពោធិ៍សាត់ ៖ កាលពីថ្ងៃទី៥ សីហា ឆ្នាំ២០២០កន្លងទៅ មានព័ត៌មានថា នាវេលាម៉ោងប្រមាណ២និង៣០នាទីរសៀល មានករណីសមត្ថកិច្ចមួយក្រុមស្ទាក់គោយន្ដដឹកអុសចាក់សាំងដុតកម្ទេចចោល រួចហើយក៏បើករថយន្ដបន្តដំណើរទៅមុខបាត់ទៅ ។…
ខេត្តពោធិ៍សាត់ ៖ កាលពីថ្ងៃទី៥ សីហា ឆ្នាំ២០២០កន្លងទៅ មានព័ត៌មានថា នាវេលាម៉ោងប្រមាណ២និង៣០នាទីរសៀល មានករណីសមត្ថកិច្ចមួយក្រុមស្ទាក់គោយន្ដដឹកអុសចាក់សាំងដុតកម្ទេចចោល រួចហើយក៏បើករថយន្ដបន្តដំណើរទៅមុខបាត់ទៅ ។ ករណីនេះបានកើតឡើងនៅភូមិដំបូក១០០ ឃុំស្វាយស ស្រុកក្រគរ និងពុំមានអ្នកណាដឹងក្រៅពីម្ចាស់គោយន្ដពីរនាក់ប្ដីប្រពន្ធនោះឡើយ ។
ក្រោយពីមានការផ្សព្វផ្សាយតាមបណ្ដាញសង្គមហ្វេសប៊ុក ក៏មានការបញ្ចេញមតិយោបល់ចោទប្រកាន់ទៅលើសមត្ថកិច្ចនិងអាជ្ញាធរមូលដ្ឋានថាធ្វើបាបប្រជាពលរដ្ឋសាហាវហួស គ្មានក្ដីមេត្តា គ្មានការយោគយល់អ្វីឡើយ ។ ប្រជាពលរដ្ឋក្រីក្រ ខំយកប្លង់ដីទៅបញ្ចាំនៅធនាគារដើម្បីខ្ចីលុយយកមកទិញគោយន្ដរកស៊ីដឹកអុសលក់ មិនទាន់ទាំងបានស្អីផងក៏ត្រូវសមត្ថកិច្ចនិងអាជ្ញាធរដុតកម្ទេចចោលយ៉ាងឃោរឃៅបែបនេះ ។
ស្នងការដ្ឋាននគរបាលខេត្តពោធិ៍សាត់ នៅថ្ងៃទី៦ ខែសីហា ឆ្នាំ២០២០ ក្រោយពីបានឃើញការចុះផ្សាយដ៏ភ្ញាក់ផ្អើលបែបនេះ ក៏បានចង្អុលការចាត់ឲ្យក្រុមការងារប្រតិកម្មរហ័សចុះទៅសិក្សាស្រាវជ្រាវ ជួបជាមួយអាជ្ញាធរមូលដ្ឋាន សាក្សី និងជនរងគ្រោះ ដើម្បីប្រមូលព័ត៌មានជាបន្ទាន់។
ក្រោយពីការស្រាវជ្រាវបានដឹងថា នៅថ្ងៃនោះមានរថយន្ដមួយគ្រឿងជិះគ្នា៤នាក់ ក្នុងនោះមានជនបរទេសម្នាក់ និងស្លៀកពាក់ឯកសណ្ឋានអាវុធហត្ថ២នាក់ ហើយស្នងការដ្ឋាននគរបាលខេត្ត ក៏បានចេញសេចក្ដីបំភ្លឺព័ត៌មាន ដោយធ្វើការសន្និដ្ឋានថា ការដុតកម្ទេចគោយន្ដដឹកអុសរបស់ប្រជាពលរដ្ឋខាងលើនេះ គឺជាសកម្មភាពរបស់ក្រុមការងារអង្គការសម្ព័ន្ធមិត្តសត្វព្រៃ(Wild Aids) មិនមានការពាក់ព័ន្ធជាមួយសមត្ថកិច្ចនគរបាលនិងអាជ្ញាធរមូលដ្ឋានរបស់ខេត្តពោធិ៍សាត់នោះទេ ៕
ចែករំលែកព័តមាននេះ