ការប្រកួតនៅលីគកំពូលប្រេស៊ីលត្រូវផ្អាក ក្រោយរកឃើញកីឡាករ១០នាក់ឆ្លងកូវីដ១៩
ប្រេស៊ីល ៖ ការប្រកួតមួយក្នុងចំណោម ការប្រកួតបើករដូវកាលថ្មី នៃក្របខណ្ឌលីគកំពូលប្រេស៊ីល (Campeonato Brasileiro Série A) រវាងក្រុមម្ចាស់ផ្ទះ…
ប្រេស៊ីល ៖ ការប្រកួតមួយក្នុងចំណោម ការប្រកួតបើករដូវកាលថ្មី នៃក្របខណ្ឌលីគកំពូលប្រេស៊ីល (Campeonato Brasileiro Série A) រវាងក្រុមម្ចាស់ផ្ទះ Goias ទល់នឹងក្រុម Sao Paulo ត្រូវបានផ្អាក បន្ទាប់ពីកីឡាករ១០នាក់របស់ក្រុម Goias បានធ្វើតេស្តវិជ្ជមានកូវីដ១៩។
នៅប៉ុន្មានម៉ោងមុនចាប់ផ្តើមការប្រកួតកាលពីថ្ងៃអាទិត្យ ស្រាប់តែក្លិប Goias បានប្រកាសថា ពួកគេបានទទួលដំណឹងថា កីឡាករចំនួន១០នាក់ ក្នុងចំណោមកីឡាករសរុបទាំង២៦នាក់របស់ពួកគេ បានទទួលលទ្ធផលវិជ្ជមាន ហើយ៨នាក់មានវីរុសនេះ ក៏មានឈ្មោះសម្រាប់ការប្រកួតមួយនេះផងដែរ។ ខណៈក្លិបបញ្ជាក់ថា ការធ្វើតេស្តកាលពីថ្ងៃព្រហស្បតិ៍ត្រូវបានចាត់ទុកថា មិនត្រឹមត្រូវតាមបច្ចេកទេសស្តង់ដា ពីសហព័ន្ធបាល់ទាត់ប្រេស៊ីល (CBF)។
ប្រធានគណៈកម្មការវេជ្ជសាស្ត្ររបស់ CBF លោក Jorge Pagura បានប្រាប់ SporTV ថានៅពេលដែលដឹងច្បាស់ថាលទ្ធផលបានចេញមក ពួកយើងចាប់ផ្តើមទាក់ទងទៅកាន់ផ្នែកវេជ្ជសាស្ត្ររបស់ក្លិប Goias ភ្លាមតែម្តង។
នៅក្នុងថ្ងៃដដែលនោះផងដែរ ការប្រកួតមួយក្នុងចំណោមការប្រកួត នៅលីគលំដាប់ទី៣ ក៏ត្រូវបានលុបចោលផងដែរ បន្ទាប់ពីកីឡាករក្រុម Imperatriz ចំនួន ១២នាក់បានធ្វើតេស្តវិជ្ជមានវីរុសនេះ មុនពេលការប្រកួតរបស់ពួកគេទល់នឹងក្រុម Treze។
បច្ចុប្បន្ននៅមិនទាន់មានការបញ្ជាក់ណាមួយពី CBF ថាត្រូវបន្ត ឬផ្អាករាល់សកម្មភាព ការប្រកួតលីគបាល់ទាត់ក្នុងស្រុក ឬយ៉ាងណានៅឡើយទេ៕ (ដកស្រង់ចេញពី ESPN)
ចែករំលែកព័តមាននេះ