ខេត្តមណ្ឌលគិរី ៖ សេចក្តីរាយការណ៍បានឲ្យដឹងថា ភ្លៀងធ្លាក់ជាប់គ្នាប្រមាណជិតមួយសប្តាហ៍មកនេះ បានធ្វើឲ្យខេត្តមណ្ឌលគិរី មានតំបន់ខ្លះក្នុងស្រុកកោះញែក មានទឹកជន់លិចផ្លូវច្រើនកន្លែង នេះបើយោងតាមរបាយការណ៍របស់មេឃុំណងឃីលឹក ដែលទើបទទួលបាននៅព្រឹកថ្ងៃទី០៧ សីហា ២០២០។
តាមរបាយការណ៍របស់មេឃុំណងឃីលឹក លោក ផៃ ខាំផុត បញ្ជាក់ថា ចាប់ពីថ្ងៃទី៣១ កក្កដា ២០២០ រហូតដល់ថ្ងៃទី០៥ សីហា ២០២០ មានភ្លៀងធ្លាក់ជាខ្លាំងជាប់គ្នាផ្ទួនៗបណ្ដាលឲ្យមានជំនន់ ទឹកភ្លៀងលិចផ្លូវ និងលូចំនួន៣កន្លែងក្នុងឃុំក្នុងនោះអូរណងវែង លិចផ្លូវប្រវែង១០ម៉ែត្រ អូរអ៊ីឆុយលិចផ្លូវ ប្រវែង១៥ម៉ែត្រ និងអូរឡាំកុក លិចផ្លូវប្រវែង១០ម៉ែត្រម៉ែត្រ ចំណែកទឹកទន្លេស្រែពកបានហក់ឡើង កម្ពស់ប្រមាណ២ម៉ែត្រផងដែរ។
អភិបាលស្រុកកោះញែក លោក ស៊ិន វណ្ណវុឌ្ឍ បានឲ្យដឹងនៅថ្ងៃទី០៧ សីហា ថា សម្រាប់ស្រុកកោះញែកមានឃុំចំនួនពីរ ដែលបានរងផលប៉ះពាល់ដោយជំនន់ទឹកភ្លៀង ប៉ុន្មានថ្ងៃនេះ ប៉ុន្តែមិនធ្ងន់ធ្ងរអ្វីនោះទេ ក្នុងនោះមានឃុំសុខសាន្ត និងឃុំណងឃីលឹក។ សម្រាប់ឃុំសុខសាន្ត មានការលិចលង់ស្រូវប្រជាពលរដ្ឋមួយចំនួនតូច ប៉ុន្តែមិនខូចខាតនោះទេ៕ ដោយ ៖ សាយ ករុណា
ចែករំលែកព័តមាននេះ