រាជធានីភ្នំពេញ ៖ ប្រជាពលរដ្ឋពីបណ្ដាខេត្តនានា និងពលរដ្ឋរស់នៅភ្នំពេញជាច្រើនបានចាប់ផ្ដើមកក់សេវាកម្មស្នាក់នៅខេត្តកំពត និងកែបបណ្ដើរៗហើយ ខណៈនៅខេត្តមណ្ឌលគិរីវិញត្រូវបានគេរាយការណ៍មកថា គឺត្រូវបានកក់អស់ហើយ សម្រាប់ទេសចរក្នុងស្រុកចេញទៅកម្សាន្តនៅឱកាសថ្ងៃឈប់សម្រាករយៈពេលជិត១០ថ្ងៃ ដែលរដ្ឋាភិបាលសងជូនវិញសម្រាប់ការខកខានមិនបានឈប់សម្រាក់កាលពីចូលឆ្នាំខ្មែរក្នុងខែមេសាកន្លងមកនោះ ។
អ្នកនាង ចាន់ធី បានឲ្យដឹងថា អ្នកនាង និងក្រុមគ្រួសារគ្រោងទៅលេងកម្សាន្តនៅខេត្តមណ្ឌលគិរី តែពេលទំនាក់ទំនងទៅកក់បន្ទប់ ត្រូវបានគេប្រាប់ថា គេកក់អស់ហើយ ក្រោយពីព្យាយាមទាក់ទងទៅម្ចាស់ទីតាំងរីសត និងសណ្ឋាគារនោះ ។ «ខាងភ្នាក់ងារខាងរីសត និងសណ្ឋាគារដែលខ្ញុំបានទាក់ទងទៅ ៤ ទៅ ៥ ទីតាំងអះអាងថា ពុំមានបន្ទប់ទំនេរទេ ចាប់ពីថ្ងៃទីសៅរ៍ទី ១៥ រហូតដល់ថ្ងៃទី ២៣ ព្រោះគេប្រាប់ថា ភ្ញៀវកក់អស់ហើយ ដែលក្នុងនោះភ្ញៀវខ្លះកក់ ៣ យប់ ៤ ថ្ងៃ ខ្លះកក់ដល់ទៅពេញមួយសប្តាហ៍ក៏មាន ។ អ៊ីចឹងខ្ញុំ និងក្រុមគ្រួសារក៏សម្រេចថា ទៅខេត្តកំពត និងកែប ហើយហួសទៅលេងខេត្តព្រះសីហនុបន្ត» ។ នេះជាការបញ្ជាក់របស់អ្នកស្រី ចាន់ធី ដោយអ្នកនាងបន្ថែមថា ពេលសាកសួរអ្នកស្គាល់ៗគ្នា គឺគេបានប្រាប់ថាកក់ទីតាំងទៅលេងមណ្ឌលគិរី ដែលល្បីថា មានទេសភាពធម្មជាតិស្អាតនោះមិនបានទេ ។
បើតាមលោក ងិន ភារម្យ ជំនួយការផ្នែកលក់ និងការកក់នៃ Try palace Resort & Spa ស្ថិតក្នុងខេត្តកែប ឯនេះវិញបានអោយដឹងថា សម្រាប់ថ្ងៃឈប់សម្រាករយៈពេលប្រមាណជាង១អាទិត្យខាងមុខនេះ រីសតដែលលោកកំពុងធ្វើការនេះឃើញថា មានការកក់ច្រើនពីសំណាក់ភ្ញៀវ ហើយឆ្នាំនេះខុសពីឆ្នាំមុនដោយឆ្នាំភ្ញៀវដែលកក់ការស្នាក់នៅភាគច្រើន គឺសុទ្ធតែភ្ញៀវខ្មែរ ដោយមានភ្ញៀវបរទេសតិចតួចប៉ុណ្ណោះ ។ លោកបានបន្តថា ចាប់ពីថ្ងៃទី ១៧ រហូតដល់ថ្ងៃទី២១ ខែសីហាខាងមុខនេះ បន្ទប់ស្នាក់នៅក្នុងរីសតមានការកក់ជិតអស់ហើយ ហើយភ្ញៀវដែលបានកក់ភាគច្រើនមកពីរាជធានីភ្នំពេញ ។
លោកបានបន្ថែមថា « បើទោះបីជាថ្ងៃឈប់សម្រាកខាងមុខមានភ្ញៀវកក់ច្រើនរហូតដល់ជិតអស់បន្ទប់ស្នាក់នៅក្ដី ក៏តម្លៃសេវាស្នាក់នៅរបស់រីសត យើងមិនមានការឡើងថ្លៃនោះទេ គឺរក្សាតម្លៃដដែល ក៏ប៉ុន្តែ សម្រាប់ថ្ងៃធម្មតា មិនមែនជាថ្ងៃបុណ្យ ឬថ្ងៃឈប់សម្រាកតម្លៃសេវាកម្មស្នាក់នៅក្នុងរីសតមានការបញ្ចុះតម្លៃមួយចំនួនសម្រាប់ភ្ញៀវ » ។
លោកបន្ថែមថា រីសតរបស់លោកបានបិទ អស់រយៈពេលជាច្រើនខែកន្លងមក ដោយសារតែកូវីដ១៩ ពោលគឺចាប់ពីខែមីនា រហូតដល់ចុងខែឧសភា ទើបបើកដំណើរការឡើងវិញ ហើយនៅពេលបើកដំណើរការឡើងវិញក៏ឃើញថាមានភ្ញៀវចូលមកស្នាក់នៅជាហូរហែរ រហូតមកដល់បច្ចុប្បន្ន ។
បើតាមលោក សោម ចិន្ដាប្រធានមន្ទីរទេសចរណ៍ខេត្តកែប ក៏បានអោយដឹងផងដែរថា ខាងថ្នាក់ខេត្តបានអញ្ជើញម្ចាស់អាជីវកម្មទេសចរណ៍ទាំងអស់មកប្រជុំនិងណែនាំអោយរក្សាតម្លៃសេវាកម្មនៅដដែល ទាំងសេវាកម្មម្ហូបអាហារនិងស្នាក់នៅ ក្នុងថ្ងៃឈប់សម្រាករយៈពេលប៉ុន្មានថ្ងៃខាងមុខ ធ្វើយ៉ាងណាមិនអោយភ្ញៀវមកកម្សាន្តនៅខេត្តកែបហើយទៅវិញមានអារម្មណ៍អាក់អន់ចិត្តជាមួយនឹងតម្លៃសេវាកម្មនៅខេត្តមួយនេះ ។ លោកបានបន្តថា ដោយសារតែខេត្តកែបមានកន្លែងស្នាក់នៅតិចតួចនៅឡើយ ដូច្នេះភ្ញៀវដែលមកកម្សាន្តក្នុងខេត្តនេះ អាចទៅសម្រាកនៅខេត្តកំពតនៅពេលយប់បាន ព្រោះកំពតគេមានផ្ទះសំណាក់និងសណ្ឋាគារច្រើនជាងខេត្តកែប ។
លោកបានបន្ថែមថា ភ្ញៀវ មក លេងខេត្តកែប ភាគច្រើនមកពីខេត្តផ្សេងៗ ហើយបំណង មកមើលទឹកសមុទ្រនិងលេង តាមឆ្នេរ ព្រោះថា បើធៀបនឹង ជាមួយនឹងខេត្តកំពត ឆ្នេរ ខេត្តកែប មានប្រវែង វែងងជាង ហើយភ្ញៀវក៏អាចលេង ទឹកបានស្រួលផងដែរ ។ ក្រៅពីឆ្នេរ នៅក្នុងទីរួមខេត្ត កែបក៏មានកោះចំនួនពីរដែលជាគោលដៅទេសចរណ៍ដ៏ទាក់ទាញមួយសម្រាប់ភ្ញៀវទេសចរផងដែរ
ដោយឡែកបុគ្គលិកផ្នែកកក់នៃសណ្ឋាគារ Kampot Diamond Hotel ក៏បាននិយាយតាមទូរស័ព្ទអោយដឹងផងដែរថា សម្រាប់ថ្ងៃឈប់សម្រាកខាងមុខក្នុងសណ្ឋាគារក៏មានភ្ញៀវមកកក់បន្ទប់ស្នាក់នៅជាហូរហែដែរ តែមិនទាន់ពេញនៅឡើយ ដោយសារតែកំពតបច្ចុប្បន្ននេះ មានសណ្ឋាគារនិងផ្ទះច្រើន ដូច្នេះហើយភ្ញៀវមកសម្រាកច្រើនក៏នៅតែមានបន្ទប់សម្រាប់ទទួលដែរ ។
សូមរំលឹកផងដែរថា ខេត្តកំពត និងខេត្តកែបត្រូវជាប់ជាខេត្តទទួលបានភ្ញៀវទេសចរទៅកម្សាន្តច្រើនជាងគេ ក្នុងខែកក្កដាកន្លងទៅនេះដោយកំពតជាប់លេខ១ និងខេត្តកែបជាលេខ២ ដូច្នេះខេត្តទាំងពីរក៏កំពុងត្រៀមទទួលភ្ញៀវទេសចរជាតិនិងអន្តរជាតិទៅកម្សាន្តជាច្រើនទៀតក្នុងថ្ងៃឈប់សម្រាកខាងមុខនេះ ៕
អត្ថបទសរសេរ ដោយ
អត្ថបទសរសេរ ដោយ
ចែករំលែកព័តមាននេះ