សង្ស័យសារាចរណែនាំគ្មានតម្លៃ
ទោះបីសាលារាជធានីភ្នំពេញចេញសារាចរណែនាំច្រើនលើកច្រើនសារ គ្រប់អាណត្តិចៅហ្វាយក្រុងដែលបង្គាប់ឱ្យក្រុមហ៊ុនរកស៊ីដឹកដី ថ្ម ខ្សាច់ គ្របឱ្យបាន
ទោះបីសាលារាជធានីភ្នំពេញចេញសារាចរណែនាំច្រើនលើកច្រើនសារ គ្រប់អាណត្តិចៅហ្វាយក្រុងដែលបង្គាប់ឱ្យក្រុមហ៊ុនរកស៊ីដឹកដី ថ្ម ខ្សាច់ គ្របឱ្យបានត្រឹមត្រូវមុននឹងដឹកជញ្ជូន យ៉ាងណាក្តី ក៏ប៉ុន្តែ ក្រុមហ៊ុនមួយចំនួនហាក់ដូចជាមិនខ្វល់ ឬក៏មិនបានយកចិត្តទុកដាក់ទាល់តែសោះចំពោះសេចក្តីណែនាំទាំងនោះ។ ផ្ទុយទៅវិញពួកគេបានបំភ្លេចចោលសារាចរណែនាំរបស់សាលារាជធានីភ្នំពេញ ឬក៏ម្ចាស់សារាចរគេងលក់ ?
ហេតុអី្វបានជាក្រុមហ៊ុនទាំងនោះមិនខ្លាចរអា មិនព្រមអនុវត្តតាម ឬមួយមកពីភាពចន្លោះប្រហោងរបស់សាលារាជធានីដែលមិនបានតាមដានត្រួតពិនិត្យមើលការអនុវត្តរបស់បណ្តាក្រុមហ៊ុនទាំងនោះ ដែលប្រៀបដូចគេងលក់ ?
ជារៀងរាល់ថ្ងៃ មានរថយន្តដឹកដី ថ្ម និង ខ្សាច់ជាច្រើនធ្វើចរាចរតាមបណ្តាផ្លូវនានាក្នុងរាជធានីភ្នំពេញ ជាពិសេសតាមបណ្តោយផ្លូវ២៧១ ហើយរថយន្តទាំងនោះមិនបានយកក្រណាត់កៅស៊ូក្រាល ឬគ្របពីលើឱ្យបានត្រឹមត្រូវនោះទេ ដែលជាហេតុធ្វើឱ្យជ្រុះរប៉ាត់រប៉ាយពេញថ្នល់ ធ្វើឱ្យខូចសម្រស់បេះដូងរាជធានីភ្នំពេញ ។ លើសពីនេះមានរថយន្តខ្លះផ្ទុកខ្សាច់សើម ដោយមិនបានក្រាលទ្រាប់បាតត្រឹមត្រូវ ទឹកស្រក់ហូរតាមបណ្តោយផ្លូវរហូត ធ្វើឱ្យរអិលហើយពេលខ្លះអាចបណ្តាលឱ្យប្រឡាក់ដល់អ្នកដំណើរទៀតផង ។
ដោយឡែករថយន្តដែលដឹកដីឬកម្ទេចថ្មធំៗវិញ ជួនកាលធ្លាក់មកលើថ្នល់ ដែលអាចបណ្តាលឱ្យមានគ្រោះថ្នាក់ចរាចរណ៍ ឬអាចធ្លាក់ត្រូវអ្នកធ្វើដំណើរជាយថាហេតុនៅថ្ងៃណាមួយ ប្រសិនបើអ្នកប្រកបមុខរបរទាំងនោះមិនបានប្រុងប្រយ័ត្ន ។ ស្ថិតក្នុងទីក្រុងកំពុងអភិវឌ្ឍចៀសមិនផុតពីការដឹកជញ្ជូនបែបនេះទេ តែសូមមេត្តាប្រុងប្រយ័ត្នផង…បានអត់ ? អ្នកទទួលបានផលចំណេញពីមុខរបរនេះ អ្នកគួរតែធ្វើឱ្យប្រជាពលរដ្ឋចំណេញដែរ គឺទទួលបានទីក្រុងស្អាត បរិស្ថានល្អ និងសុខភាពល្អផងដែរ ។
ដើម្បីទប់ស្កាត់កុំឱ្យមានបញ្ហានេះកើតឡើងបន្តទៀត សាលារាជធានីភ្នំពេញ ត្រូវតែចាត់វិធានការឱ្យបានតឹងរឹុង ព្រមទាំងផាកពិន័យឱ្យបានធ្ងន់ធ្ងរបំផុត បន្ទាប់ពីដាក់ឱសានវាទ និងណែនាំដល់បណ្តាក្រុមហ៊ុនទាំងនោះជាមុន ។ ការធ្វើដូច្នេះមិនមែនមានន័យថា ដាក់គំនាបទៅលើការរកស៊ីរបស់ក្រុមហ៊ុនទាំងនោះទេ ក៏ប៉ុន្តែសុំគិតពីអ្នកដទៃផង ។
ជាមួយគ្នានេះដែរ យើងសង្ឃឹមថា ក្រុមហ៊ុនដែលប្រកបមុខរបររកស៊ីដឹកខ្សាច់ ថ្ម ដី នឹងផ្លាស់ប្តូរទម្លាប់ចាស់ ហើយងាកមកអនុវត្តតាមសេចក្តីណែនាំឱ្យបានត្រឹមត្រូវដើម្បីកែលម្អសម្រស់ទីក្រុងរបស់យើងឱ្យបានល្អប្រសើរ ស្របតាមសម័យកាលសមាហរណកម្មអាស៊ានឆ្នាំ២០១៥ ដែលកំពុងឈានមកដល់ ។ បាតុភូតទាំងនេះសង្ស័យណាស់សារាចរណែនាំគ្មានតម្លៃ ៕
ដោយ ហេង ដេត
ចែករំលែកព័តមាននេះ