រាជធានីភ្នំពេញ ៖ ក្រោយភ្លៀងមួយមេធំកាលពីវេលាយប់ថ្ងៃទី៦ ខែសីហា ឆ្នាំ២០២០រួចមក ទឹកភ្លៀងបានជន់លិចផ្លូវ និងប៉ះពាល់ធ្ងន់ធ្ងរដល់លំនៅឋានពលរដ្ឋមួយចំនួនធំ ដែលរស់នៅជាប់ និងក្បែរប្រឡាយបង្ហូរទឹកស្អុយបឹងទំពន់ (…
រាជធានីភ្នំពេញ ៖ ក្រោយភ្លៀងមួយមេធំកាលពីវេលាយប់ថ្ងៃទី៦ ខែសីហា ឆ្នាំ២០២០រួចមក ទឹកភ្លៀងបានជន់លិចផ្លូវ និងប៉ះពាល់ធ្ងន់ធ្ងរដល់លំនៅឋានពលរដ្ឋមួយចំនួនធំ ដែលរស់នៅជាប់ និងក្បែរប្រឡាយបង្ហូរទឹកស្អុយបឹងទំពន់ ( ចំណុចស្ពាន៣ ) ស្ថិតក្នុងសង្កាត់បឹងទំពន់ទី១ ព្រំប្រទល់ជាមួយសង្កាត់បឹងទំពន់២ ខណ្ឌមានជ័យ រាជធានីភ្នំពេញ ។
ប្រជាពលរដ្ឋដែលរងគ្រោះក្នុងការជន់លិចមានចំនួន២ភូមិ គឺភូមិសន្សំកុសលទី១ និងសន្សំកុសលទី២ ប៉ុន្តែក្នុងនោះមិនមែនមានន័យថា ទឹកត្រូវជន់លិចទូទាំងភូមិទាំង២ខាងលើនោះទេ ពោលគឺជន់លិចផ្ទះប្រជាពលរដ្ឋមួយចំនួនធំដែលរស់នៅជាប់មាត់ប្រឡាយ និងនៅក្បែរទីនោះតែប៉ុណ្ណោះ ។
ក្រុមប្រជាពលរដ្ឋបានលើកឡើងថា កន្លងមក នៅចំណុចនេះ ក៏តែងជួបការជន់លិចជារឿយៗផងដែរ រាល់ពេលមានភ្លៀងខ្លាំងម្តងៗ ហើយពេលលិចម្តងៗ ទឹកក៏ឆាប់ស្រកទៅវិញផងដែរ ឬបើយូរបំផុតត្រឹមតែកន្លះថ្ងៃគឺស្រកទៅវិញដែរ សំខាន់គឺផ្អែកទៅលើបរិមាណទឹកភ្លៀង ថាតើភ្លៀងតិច ឬច្រើនប៉ុណ្ណោះ ។ ពួកគាត់បន្តថា កាលពីម្សិលមិញ គឺមានភ្លៀងធ្លាក់ ហើយភ្លៀងតាំងពីវេលាក្បាលល្ងាចរហូតដល់យប់ ភ្លៀងធ្លាក់ខ្លាំងឥតឈប់ឈរ ដូច្នេះហើយ ទើបបង្កអោយមានជាទឹកជន់លិចផ្លូវ និងលិចចូលដល់ក្នុងលំនៅឋានរបស់ពួកគាត់ថែមទៀតផង ។
ជាក់ស្តែង នៅវេលាព្រឹកថ្ងៃទី៧ ខែសីហា ឆ្នាំ២០២០នេះ គេសង្គេតឃើញបងប្អូនប្រជាពលរដ្ឋមួយចំនួនធំមិនថា អ្នកដំណើរ ឬប្រជាពលរដ្ឋរងការលិចលង់ផ្ទះនោះទេ គឺនាំគ្នាបណ្តើរម៉ូតូទាំងអស់គ្នា ព្រោះតែមិនអាចជិះធ្វើដំណើរកើត គឺជិះម៉ូតូបានតែបន្តិចក៏រលត់ម៉ាស៊ីនដោយសារចូលទឹក, រីឯអ្នកខ្លះទៀតបានដើរដោយថ្មើរជើង ដោយស្ថានភាពទឹកលិចដល់ពាក់កណ្តាលខ្លួនឯណោះ ។ បើរថយន្តវិញ គឺត្រូវរលត់ម៉ាស៊ីននៅជាប់ក្នុងទឹកតែម្តង ព្រោះកម្ពស់ទឹកខ្ពស់ ។
ឆ្លើយឆ្លងជាមួយកោះសន្តិភាព នាព្រឹកថ្ងៃទី៧ សីហា លោកសួស សារិន ចៅសង្កាត់បឹងទំពន់ទី១ បានបញ្ជាក់ថា ៖ ទឹកដែលបានជន់លិច ក្រោយភ្លៀងមួយមេធំកាលពីម្សិលមិញរួចមក បានប៉ះពាល់ដល់លំនៅឋានរស់នៅរបស់ពលរដ្ឋប្រមាណ២០០គ្រួសារ ដែលពួកគាត់រស់នៅក្នុងភូមិចំនួន២ គឺភូមិសន្សំកុសល១ និងសន្សំកុសល២ ហើយការជន់លិច គឺជន់លិចនៅចំណុចជាប់មាត់ប្រលាយបង្ហូរទឹក ព្រោះចំណុចនេះ ជាចរន្តសម្រាប់បង្ហូរទឹកជន់ ប៉ុន្តែប្រសិនបើភ្លៀងខ្លាំងពេក កន្លែងនេះក៏ត្រូវជន់លិចផងដែរ ។
លោកចៅសង្កាត់បន្តថា បច្ចុប្បន្នមន្ត្រីអាជ្ញាធរសង្កាត់ បានសហការជាមួយខណ្ឌ មន្ទីរសាធារណះការរាជធានីភ្នំពេញ បាននឹងកំពុងព្យាយាមប៊ូមទឹកចេញពីតំបន់ខាងលើហើយ ដោយបូមនៅចំណុចស្ថាននីយ៍ប៊ូមទឹកបឹងទំពុន ហើយទម្លាក់ទឹកទៅខាងបឹងជើងឯកជាបណ្តោះអាសន្ន ដើម្បីរំដោះទឹកចេញ ។
លោកបញ្ជាក់ថា ប្រសិនបើល្ងាចនេះ មិនមានភ្លៀងនោះទេ ទឹកនៅតំបន់នេះនឹងស្រកជាក់ជាមិនខាន ក្រោយការបូមចេញរួច ប៉ុន្តែប្រសិនបើភ្លៀងនៅបន្តភ្លៀងខ្លាំងទៀតនោះ លោកនៅមិនទាន់ដឹងថា ស្ថានភាពទឹកជន់នឹងបែបណាទៀតនោះទេ ជាក់ស្តែងទៅលើស្ថានភាពទឹកភ្លៀងជាមុនសិន ប៉ុន្តែទោះបីជាយ៉ាងណា គិតត្រឹមវេលាថ្ងៃត្រង់នេះ នៅតំបន់ខាងលើ ទឹកបានស្រកស្ទើរពាក់កណ្តាលហើយ ៕ (កែសម្រួលដោយ ៖ ធីតា)
ចែករំលែកព័តមាននេះ