ខេត្តបាត់ដំបង ៖ លោកលឹម គានហោ រដ្ឋមន្ត្រីក្រសួងធនធានទឹក និងឧតុនិយម បានចុះពិនិត្យទំនប់ទឹកដូនទ្រី ស្រុករុក្ខគីរី និងទំនប់ស្ទាក់ទឹកសាលាតាអន ក្នុងស្រុកឯកភ្នំ ខេត្តបាត់ដំបង ដែលកំពុងសាងសង់សម្រេចបាន ៧០ភាគរយហើយ រួមមានប្រឡាយពង្វាងទឹកតាមមាត់ស្ទឹង១ខ្សែ ប្រវែង៣៨០ ម៉ែត្រ, ទ្វារទឹកស្ទាក់ស្ទឹងសង្កែ ប្រវែង៧៤ ម៉ែត្រ ចំនួន១កន្លែង , ប្រឡាយធ្វើពីបេតុងចំនួន៤ខ្សែ ប្រវែងជិត១៨គីឡូម៉ែត្រ ,សំណង់ក្បាលហុង ចំនួន៤កន្លែង , សំណង់ស្ទាក់ទឹក ប្រឡាយមេចំនួន១៣កន្លែង ,សំណង់ចែកចាយទឹក ចំនួន ២១ កន្លែង ,ស្ពានឆ្លងកាត់ប្រឡាយ ចំនួន២៣កន្លែង , និង ជណ្តើរចុះក្នុងប្រឡាយមេ សម្រាប់អ្នកភូមិប្រើប្រាស់ចំនួន២៧៤កន្លែង ។
អមដំណើរដោយលោក សឿម ប៊ុនរិទ្ធ អភិបាលខេត្តបាត់ដំបងស្តីទី, លោក លឹម គានហោ រដ្ឋមន្ត្រីក្រសួងធនធានទឹកនិងឧតុនិយម បានមានប្រសាសន៍ក្នុងដំណើរចុះត្រួតពិនិត្យការសាងសង់នៅថ្ងៃទី៦ សីហា ឆ្នាំ២០២០នេះថា គម្រោងអភិវឌ្ឍន៍ទំនប់សាលាតាអន ជាតំបន់ទេសចរណ៍ដ៏ទាក់ទាញមួយ សម្រាប់ភ្ញៀវទេសចរចូលមកកាន់ខេត្តនេះ និងមានសារប្រយោជន៍ស្ទាក់ទឹកគម្រោងអភិវឌ្ឍន៍ទំនប់សាលាតាអន គឺជាគម្រោងមួយក្រោមហិរញ្ញប្បទានសម្បទានរបស់សាធារណរដ្ឋកូរ៉េ ហើយគម្រោងនេះ បានចាប់ផ្តើមដំណើរការធ្វើការសាងសង់កាលពីខែមករា ឆ្នាំ២០១៩ ហើយគ្រោងនឹងបញ្ចប់នៅខែមិថុនា ឆ្នាំ២០២១ បច្ចប្បន្ននេះ គម្រោងបានធ្វើការសម្រេចបានប្រមាណ ៧០% លើទំហំការងារសរុបរបស់គម្រោង ។
ចំពោះគម្រោងស្ទាក់ទឹកសាលាតាអន នេះត្រូវបានសាងសង់បញ្ចប់ គម្រោងអភិវឌ្ឍន៍ទំនប់សាលាតាអន អាចផ្គត់ផ្គង់ទឹកសម្រាប់ការ ស្រោចស្រពលើ ផ្ទៃដីស្រូវវស្សាបាន ចំនួន ១១.០០០ ហិកតា ផ្ទៃដីស្រូវប្រាំងបាន ចំនួន ៤.០០០ ហិកតា។
ក្រោយពីគណៈប្រតិភូម បានធ្វើការពិនិត្យគម្រោងអភិវឌ្ឍន៍ទំនប់សាលាតាអនរួចមក គណៈប្រតិភូមបានបន្តដំណើរអញ្ជើញចុះពិនិត្យគម្រោងអភិវឌ្ឍន៍ទំនប់ដូនទ្រី ដែលស្ថិតនៅស្រុករុក្ខគីរី ដែលជាគម្រោងមួយក្រោមហិរញ្ញប្បទានសម្បទានរបស់សាធារណរដ្ឋកូរ៉េដូចគ្នាទៅនឹងគម្រោងអភិវឌ្ឍន៍សាលាតាអនផងដែរ ដែលគម្រោងអភិវឌ្ឍន៍ទំនប់ដូនទ្រី នេះ បានចាប់ផ្តើមធ្វើការសាងសង់កាលពីថ្ងៃទី២៥ ខែមិថុនា ឆ្នាំ២០១៨ ហើយគ្រោងនឹងបញ្ចប់នៅក្នុងឆ្នាំ២០២៣ ដោយបច្ចុប្បន្ននេះ ការងារសម្រេចបានប្រមាណ ២៦% លើទំហំការងារសរុបរបស់គម្រោង ។
ក្រោយពីបញ្ចប់ការសាងសង់ គម្រោងអភិវឌ្ឍន៍ទំនប់ដូនទ្រី អាចផ្គត់ផ្គង់ទឹកសម្រាប់ការស្រោចស្រពលើផ្ទៃដីស្រូវវស្សាបាន ចំនួន៣៣.០០០ហិកតា ផ្ទៃដីស្រូវប្រាំងបានចំនួន៤.៥០០ហិកតាផងដែរ៕
ចែករំលែកព័តមាននេះ