រាជធានីភ្នំពេញ ៖ មានពលរដ្ឋមួយចំនួនបានលើកឡើងថា យកលុយទៅដាក់ធនាគារ ដើម្បីសន្សំមិនចង់ទុកលុយជាប់ខ្លួន ព្រោះមានលុយក្នុងដៃចេះតែចាយ តែមានឯណាដាក់លុយក្នុងធនាគារខ្លះ កាន់តែងាយចាយ ហើយចាយអស់មិនដឹងខ្លួនទៀត ។
ដោយសារសេវាធនាគារកាន់តែទំនើប មានដៃគូអាជីវកម្មរបស់គេកាន់តែច្រើន ក្នុងការទូទាត់ប្រាក់តាមកាត ឬក៏ស្កែនកូដតែប៉ុណ្ណោះ ។
សុខា ធារី អ្នករស់នៅភ្នំពេញម្នាក់និយាយបែបលេងសើចផងថា «បច្ចុប្បន្នទិញអីបន្តិច ក៏គេឲ្យបាញ់លុយតាមធនាគារដែរ ។ ឯងយកលុយទៅដាក់ធនាគារថា សន្សំ មានឯណា ទៅទិញអីក៏គេបាញ់លុយតាមធនាគារ ។ ចេះតែស្រួលចាយ ដល់ពាក់កណ្តាលខែអស់លុយពីគណនី យ៉ាប់ជាងទុកក្នុងកាបូបទៀត » ។ ដោយសារបច្ចេកវិទ្យាកាន់តែទំនើប ការទូតទាត់ប្រាក់តាមកាតធនាគារជាច្រើនប្រភេទបានកំពុងដំណើរការ ។
ធនាគារ គ្រឹះស្ថានមីក្រូហិរញ្ញវត្ថុមានការរីកចម្រើនឆ្នាំ នៅទីណាក៏មានកន្លែងដកប្រាក់ ឬការទូទាត់ប្រាក់តាមកាត ដែលធ្វើឲ្យពលរដ្ឋងាយស្រួលក្នុងការទូទាត់ និងគ្រប់គ្រងសាច់ប្រាក់របស់ខ្លួន។
បច្ចុប្បន្ននេះអ្វីដែលគេពេញនិយមប្រើនោះ គឺពាក្យថា «ធនាគារនៅក្នុងដៃ» ពីព្រោះថា នៅទីណាក៏អាចទូទាត់ការចំណាយបានមិនបាច់មានប្រាក់ក្នុងហោប៉ៅនោះឡើយ ។
E-Banking បានកំពុងជំនួសការចាយសាច់ប្រាក់ដោយផ្ទាល់នៅក្នុងសម័យបចេ្ចកវិទ្យា ៤.០នេះ ។ តែទោះយ៉ាងណាអ្នកសេដ្ឋកិច្ចតែងតែផ្តាំផ្ញើថា ការចេះគ្រប់គ្រងហិរញ្ញវត្ថុខ្លួនឯង ចាយវាយតាមតម្រូវការ ជាជាងការចាយតាមចំណង់ ជាកក្តាឈានដល់ការជោគជ័យក្នុងការគ្រប់គ្រងហិរញ្ញវត្ថុ ប្រចាំជីវិត ហើយថាសេវាគ្រប់គ្រងប្រាក់គ្រាន់តែធ្វើឲ្យមនុស្សកាន់តែងាយស្រួលប៉ុណ្ណោះ កុំឲ្យបច្ចេកវិទ្យានេះ នាំដល់ការចាយវាយខ្ចះខ្ចាយ មិនអាចគ្រប់គ្រងខ្លួនឯងបាននោះ ៕
ចែករំលែកព័តមាននេះ