ខេត្តកំពង់ចាម ៖ លំនៅឋានរបស់ប្រជាពលរដ្ឋសាងសង់អំពើឈើប្រក់ស័ង្កសីមានទំហំ៤គុណ៥ម៉ែត្រ ត្រូវបានអគ្គិភ័យលេបត្របាក់ខ្ទេច ដោយមានអណ្តាតភ្លើង និងផ្សែង ហុយខ្មួលខ្មាញ់ទៅលើអាកាស
ខេត្តកំពង់ចាម ៖ លំនៅឋានរបស់ប្រជាពលរដ្ឋសាងសង់អំពើឈើប្រក់ស័ង្កសីមានទំហំ៤គុណ៥ម៉ែត្រ ត្រូវបានអគ្គិភ័យលេបត្របាក់ខ្ទេច ដោយមានអណ្តាតភ្លើង និងផ្សែង ហុយខ្មួលខ្មាញ់ទៅលើអាកាស ។ ហេតុការណ៏នេះកើតឡើងវេលាម៉ោង២ និង៣០នាទីរសៀល ថ្ងៃទី២ កុម្ភៈ ២០១៥ នៅភូមិថ្មីឃុំក្រូច ស្រុកព្រៃឈរ ក្នុងពេលដែលម្ចាស់ចេញទៅចំការបាត់ ។
លោកវរសេនីយ៏ត្រី កែវ ស៊ាងហ៊ន់ អធិការនគរបាលស្រុកព្រៃឈរ បានប្រាប់ឲ្យដឹងថា នៅពេលមុនកើតហេតុបុរសម្ចាស់ផ្ទះឈ្មោះ រឹម រ៉ែន អាយុ៣៦ឆ្នាំ និងប្រពន្ធឈ្មោះ ជួប ធី អាយុ៣៧ឆ្នាំ បានដាំបាយនៅពេលព្រឹក ដោយមិនបានពន្លត់ភ្លើងចង្ក្រានឲ្យអស់នោះទេ រួចបានបិទទ្វារផ្ទះចាក់សោរចេញចេញទៅចំការ នៅត្រង់ចំនុចត្រង់ត្រពាំងអំពិល ឃុំថ្មពូន ដើម្បីដឹកដំឡូង ។
លោកវរសេនីយ៏ត្រី កែវ ស៊ាងហ៊ន់ អធិការនគរបាលស្រុកព្រៃឈរ ប្រាប់បន្តថា លុះដល់វេលាម៉ោងខាងលើ ស្រាប់តែភ្លើងបានឆាបចេញចេញពីចង្ក្រានបាយ ដោយមានផ្សែងហុយឡើងទ្រលោម បង្កឲ្យមានការភ្ញាក់ផ្អើលដល់ប្រជាពលរដ្ឋនៅក្បែរនោះ បាននាំគ្នារត់មកជួយពន្លត់ដោយបានដឹកទឹកពាងមកជះលើជញ្ជាំងស្លឹកតែភ្លើងបានថមថយនោះទេ ។ គឺបានឆេះរាលដាលលឿនយ៉ាងពេញបន្ទុក មិនអាចនរណាម្នាក់ទៅជញ្ជូនទ្រព្យលើផ្ទះបានឡើយ ហើយភ្លើងក៏បានឆេះទៅដល់ផ្ទះអ្នកភូមិណាមួយទេដោយសារតែនៅដាច់ឆ្ងាយពីគ្នា ។ ចំពោះទ្រព្យបាត់បង់មាន ផ្ទះ១ខ្នង ប្រាក់ចំនួន១លានរៀលស្រូវ៣០ថាំង សៀវភៅគ្រួសារ សំបុត្រកំណើត ប្លង់ដី សំលៀកបំពាក់ភួយមុង រទេះគោ១គ្រឿង ។
លោកវរសេនីយ៏ត្រីកែវ ស៊ាងហ៊ន់ អធិការនគរបាលស្រុកព្រៃឈរបញ្ជាក់ថា ពេលដែលមានគ្រោះអគ្គីភ័យខាងលើកើតឡើង រថយន្តពន្លត់អគ្គីភ័យ១គ្រឿងរបស់ អធិការដ្ឋាននគរបាលស្រុកព្រៃឈរ បានចេញទៅជួយអន្តរាគមន៏ដែរ តែដោយសារផ្លូវទីនោះតូចចង្កៀតចូលមិនដល់ ទើបឆេះផ្ទះខ្ទេច ។
ដោយឡែកនៅព្រឹកថ្ងៃទី៣ កុម្ភៈ លោកសុខ ស្រ៊ុន ប្រធានសាខាកាកបាទក្រហមខេត្ត អមដំណើរដោយលោកទេព រៀមមុនី ប្រធានសាខាកាកបាទក្រហម ស្រុកព្រៃឈរ បានយកអំណោយ ទៅចែកជូនដល់គ្រួសាររងគ្រោះអគ្គីភ័យនេះ ដោយទទួលបានមាន ៖ អង្ក៥០គីឡូក្រាម កន្ទេល១ មី១កេស ស័ង្កសី១៥សន្លឹក ត្រីខ១០កំប៉ុង មុង១ ភួយ១ សារុង ព្រមទាំងសំភារៈផ្សេងៗទៀតជាច្រើនផងដែរ ៕
ចែករំលែកព័តមាននេះ