ទីក្រុងបេរូត ៖ កូនក្រមុំ វ័យ២៩ឆ្នាំ ជនជាតិលីបង់ ឈ្មោះ Israa Seblani កំពុងឈរញញឹមញញែមពីមុខកាមេរ៉ា ដើម្បីថតវីដេអូអាពាហ៍ពិពាហ៍របស់នាង ត្រឹមតែពីរបីវិនាទី មុនពេលមានការផ្ទុះដ៏ធំមួយរញ្ជួយរដ្ឋធានីបេរូត ធ្វើឲ្យឈុតរៀបការនេះត្រូវខ្ទេចខ្ទី ដោយសារតែខ្យល់បក់បោកចេញពីរូបនាង ។
នាង Israa Seblani និងប្តីឈ្មោះ Ahmad Subeih អាយុ៣៤ឆ្នាំ ជាអ្នកជំនួញនៅបេរូត ដែលពួកគេកំពុងថតរូបជុំគ្នា ក្បែរកន្លែងកើតហេតុ មុនពេលមានការផ្ទុះមួយបានកើតឡើង ទោះជាយ៉ាងណាសំណាងល្អ កូនក្រមុំរស់រានមានជីវិត ។
Israa Seblani នាងបានប្រាប់ រ៉យទ័រថា “ខ្ញុំបានរៀបចំខ្លួន សម្រាប់ថ្ងៃដ៏ធំរបស់ខ្ញុំ អស់រយៈពេល២សប្តាហ៍ហើយ ខ្ញុំពិតជាសប្បាយរីករាយ ដូចក្មេងស្រីដទៃទៀតដែរ ព្រោះខ្ញុំបានរៀបការហើយ” ។ Israa Seblan បានទៅដល់ក្រុងបេរូត កាលពីបីសប្តាហ៍មុន ដើម្បីរៀបចំពិធីមង្គលការរបស់នាង ។
នាងបន្តថា ក្នុងអំឡុងពេលផ្ទុះលាន់ឮឡើង នៅទីនេះ ក្នុងអារម្មណ៍របស់នាងគិតថា “តើមានអ្វីកើតឡើង.. មិនមានពាក្យអ្វីត្រូវពន្យល់ទេ.. ខ្ញុំមានការភ្ញាក់ផ្អើល ខ្ញុំឆ្ងល់ថា តើមានអ្វីកើតឡើង តើខ្ញុំនឹងត្រូវស្លាប់ហើយឫ ? ” បន្ទាប់មក នាងឃើញ គំនរកញ្ចក់បែកចេញពីបង្អួច នៃសណ្ឋាគារពាសពេញលើដី រួមជាមួយសំណល់ផ្កាដែលគេរៀបចំតុបតែងក្នុងពិធីជប់លៀង ។
នាងនិយាយថា “យើងចាប់ផ្តើមដើរជុំវិញហើយ ប៉ុន្តែវាគួរឱ្យសោកស្តាយណាស់ វាត្រូវបំផ្លិចបំផ្លាញដោយការផ្ទុះនេះ” ។ យើងនៅតែតក់ស្លុត.. ខ្ញុំមិនដែលជួបប្រទះនឹងសំឡេងនៃការផ្ទុះដ៏ខ្លាំងបែបនេះទេ ពីមុនមក ។ ប៉ុន្តែខ្ញុំសប្បាយចិត្តព្រោះនៅរស់រានមានជីវិតបន្ទាប់ពីផ្ទុះនេះ ។
Israa Seblan បានបន្ថែមថា “ខ្ញុំមានអារម្មណ៍សោកសៅ ចំពោះអ្វីដែលបានកើតឡើងចំពោះជនជាតិលីបង់ និងប្រទេសរបស់ខ្ញុំ” ។
ក្រោយពីហេតុការណ៍ផ្ទុះនេះ នាងនិងស្វាមី ព្យាយាមតុបតែងខ្លួន ហើយបន្តធ្វើបញ្ចប់ពិធីនេះ ដោយមានភ្ញៀវមិនច្រើនទេ ចូលរួមញ៉ាំអាហារពេលល្ងាច ។
រូបភាពវីដេអូនេះ បានចាប់យកនៅពេលដែលការផ្ទុះដ៏ធំមួយ ធ្វើឱ្យរញ្ជួយរដ្ឋធានីលីបង់ នៅថ្ងៃអង្គារ ទី៤ សីហា ដោយបានសម្លាប់មនុស្សយ៉ាងហោចណាស់ ១៣៥ នាក់ និងរងរបួសជាង ៥.០០០ នាក់ ។
សូមជម្រាបដែរថា អាម៉ូញ៉ូមនីត្រាត ជិត៣ពាន់តោន ផ្ទុះបំផ្លាញកំពង់ផែបេរូត ចម្ងាយ ៩គីឡូម៉ែត្រជុំវិញ(វីដេអូ)
ចែករំលែកព័តមាននេះ