ស្ត្រីអនាថាម្នាក់ដើរដួលសន្លប់តាមផ្លូវ ទូរស័ព្ទហៅរថយន្តសង្គ្រោះ មិនព្រមមក
រាជធានីភ្នំពេញ ៖ ស្ត្រីអនាថា អាយុជាង៣០ឆ្នាំម្នាក់ បានដួលសន្លប់នៅលើចិញ្ចើមផ្លូវ អស់រយៈពេលជាច្រើនម៉ោង ក្រោយមកក៏មានអន្តរាគមន៍ពីអាជ្ញាធរមូលដ្ឋាន
រាជធានីភ្នំពេញ ៖ ស្ត្រីអនាថា អាយុជាង៣០ឆ្នាំម្នាក់ បានដួលសន្លប់នៅលើចិញ្ចើមផ្លូវ អស់រយៈពេលជាច្រើនម៉ោង ក្រោយមកក៏មានអន្តរាគមន៍ពីអាជ្ញាធរមូលដ្ឋាន ដោយបានទូរស័ព្ទហៅរថយន្តសាមុយពីមន្ទីរពេទ្យមួយចំនួន ដើម្បីដឹកនាងយកទៅសង្គ្រោះ តែមិនឃើញមានរថយន្តណាមកទេ ។ ហេតុការណ៍នេះកើតឡើងកាលពីវេលាម៉ោង១២និង៣០នាទីថ្ងៃត្រង់ ថ្ងៃទី១ កុម្ភៈ នៅមុខផ្ទះលេខ៥៤A មហាវិថីព្រះនរោត្តម ក្នុងសង្កាត់ទន្លេបាសាក់ ខណ្ឌចំការមន ។
តាមប្រភពព័ត៌មានបានឱ្យដឹងថា មុនពេលកើតហេតុ ស្ត្រីអនាថាម្នាក់នេះ បានធ្វើដំណើរតែម្នាក់ឯងក្នុងទិសដៅពីត្បូងទៅជើង សំដៅទៅវិមានឯករាជ្យ ស្រាប់តែដល់កន្លែងកើតហេតុក៏ដួល និងសន្លប់បាត់ស្មារតីនៅលើផ្លូវតែម្តង ។ ក្រោយពីបានឃើញបែបនេះ ប្រជាពលរដ្ឋដែលមានទីលំនៅក្បែរនោះ ក៏បានទូរស័ព្ទទៅអាជ្ញាធរមូលដ្ឋានឱ្យចុះមកជួយអន្តរាគមន៍ ។
ខណៈពេលអាជ្ញាធរមូលដ្ឋានចុះដល់កន្លែងកើតហេតុហើយ ក៏បានលើកនាងយកទៅដាក់លើចិញ្ចើមផ្លូវ រួចយកទឹក និងទឹកដោះគោ ទៅបញ្ចុកនាង ប៉ុន្តែនៅតែមិនទាន់ដឹងខ្លួន និងបានសន្លប់អស់រយៈពេលជាច្រើនម៉ោង ។ ក្នុងអំឡុងពេលនោះ អាជ្ញាធរបានទូរស័ព្ទទៅរថយន្តសង្គ្រោះដែរ តែពុំឃើញមានរថយន្តសាមុយពីមន្ទីរពេទ្យណាមួយ មកដឹកទៅសង្គ្រោះឡើយ ។
ដោយសារតែទូរស័ព្ទទៅកាន់មន្ទីរពេទ្យជាច្រើនហើយ នៅតែមិនឃើញបញ្ជូនរថយន្តសាមុយមកទទួលនោះ អាជ្ញាធរមូលដ្ឋានក៏សម្រេចបញ្ជូននាងតាមរថយន្តកូរ៉េរបស់សាលាសង្កាត់ទន្លេបាសាក់ ទៅកាន់មន្ទីរពេទ្យបង្អែករាជធានី ។
ប្រជាពលរដ្ឋមួយចំនួនដែលឃើញហេតុការណ៍នេះ បានរិះគន់ខ្លាំងៗចំពោះមន្ទីរពេទ្យមួយចំនួន ដែលសុទ្ធតែជាមន្ទីរពេទ្យរបស់រដ្ឋ មិនគួរណាមិនចេញរថយន្តមកទទួលយកស្ត្រីរងគ្រោះទៅសង្គ្រោះបែបនេះឡើយ ឬក៏គិតថាគាត់ជាជនអនាថាពុំមានថវិកាដើម្បីព្យាបាល ទុកឱ្យស្លាប់តាមយថាកម្ម ?
ចែករំលែកព័តមាននេះ