ជប៉ុន ៖ ប្រទេសជប៉ុន នៅថ្ងៃព្រហស្បតិ៍នេះ កត់សម្គាល់រយៈពេល៧៥ឆ្នាំ ចាប់តាំងពីការវាយប្រហារដោយគ្រាប់បែកបរមាណូដំបូងបង្អស់នៅលើពិភពលោក។ ដោយសារតែពេលនេះមានការរីករាលដាលរបស់កូវីដ១៩ គេអាចត្រឹមតែធ្វើពិធីរំលឹកដល់អ្នកបាត់បង់ជីវិតកាលសម័យនោះ ក្នុងទ្រង់ទ្រាយតូច។
អ្នករស់រានមានជីវិត សាច់ញាតិ និងឥស្សរជនបរទេសមួយចំនួនតូចនឹងចូលរួមក្នុងព្រឹត្តិការណ៍ដ៏សំខាន់នៅឆ្នាំនេះ នៅហ៊ីរ៉ូស៊ីម៉ា ដើម្បីបួងសួងដល់ជនរងគ្រោះ និងអំពាវនាវឱ្យមានសន្តិភាពពិភពលោក។ ប៉ុន្តែសាធារណជនទូទៅ មិនអាចចូលរួមបាននោះទេ ដោយអាចត្រឹមតែទស្សនាតាមអ៊ីនធើរណេតប៉ុណ្ណោះ។
ព្រឹត្តិការណ៍ផ្សេងទៀតរួមទាំងការប្រមូលផ្ដុំគ្នា ដើម្បីបណ្តែតគោមតាមដងទន្លេ Motoyasu ត្រូវបានលុបចោល ដោយសារករណីឆ្លងវីរុសកើនឡើងនៅផ្នែកខ្លះនៃប្រទេសជប៉ុន។
អភិបាលក្រុងលោក Kazumi Matsui បានប្រាប់អ្នកយកព័ត៌មានថា ការរំលឹកខួបប្រចាំឆ្នាំ គឺជាបេសកកម្មរបស់ហ៊ីរ៉ូស៊ីម៉ា ក្នុងការអំពាវនាវឱ្យប្រជាជននៅទូទាំងពិភពលោកធ្វើការឆ្ពោះទៅរកសន្តិភាព។ អ្នកចូលរួមនឹងធ្វើការអធិស្ឋាន ដោយស្ងៀមស្ងាត់នៅម៉ោង ៨ និង ១៥ នាទីព្រឹក (ម៉ោងក្នុងប្រទេសជប៉ុន) ដែលជាពេលវេលាដូចគ្នាទៅនឹងពេលដែលគ្រាប់បែកនោះបានធ្លាក់។
គួរបញ្ជាក់ផងដែរថា មនុស្សប្រហែល ១៤០,០០០នាក់ត្រូវបានសម្លាប់ ដែលភាគច្រើននៃពួកគេបានបាត់បង់ជីវិតភ្លាមៗ ដោយអ្នកផ្សេងទៀតបានបាត់បង់ជីវិតក្នុងប៉ុន្មានសប្តាហ៍ និងប៉ុន្មានខែបន្ទាប់មកទៀត ដោយសារតែការទទួលរងកាំរស្មីរលាកធ្ងន់ធ្ងរ និងការរងរបួសផ្សេងៗទៀត។ បីថ្ងៃក្រោយមក សហរដ្ឋអាមេរិកបានទម្លាក់គ្រាប់បែកបរមាណូជាលើកទី២ ទៅលើណាហ្គាសាគី ដែលមនុស្ស ៧៤,០០០នាក់ ត្រូវបានសម្លាប់៕ ដកស្រង់ចេញពីវេបសាយ ៖ bangkokpost (កែសម្រួលដោយ ៖ បុប្ផា)
ចែករំលែកព័តមាននេះ