រាជធានីភ្នំពេញ ៖ អស់រយៈពេលជាច្រើនសប្ដាហ៍មកហើយ សង្វៀនប្រដាល់របស់ទូរទស្សន៍អាស៊ីអាគ្នេយ៍ និងប៉ុស្តិ៍លេខ៥ ដែលសុទ្ធតែមានសក្ដានុពលក្នុងការលើកស្ទួយវិស័យប្រដាល់ បានបន្តបិទចោលកម្មវិធីប្រដាល់របស់ខ្លួនទាំងស្រុង ។ មកទល់ពេលនេះ សង្វៀនទាំងពីរនៅតែមិនទាន់កំណត់ថាត្រូវបើកជាថ្មីឡើងវិញពេលណា ឬបិទយូរទៀតនោះទេ ខណៈអ្នកគ្រប់គ្រងទូទៅបានតែលើកឡើងថា កំពុងរៀបចំ ស្របពេលដែលសង្វៀនផ្សេងគឺមានតែបង្កើនការប្រកួត។
ប្រភពពីស្ថាប័នទូរទស្សន៍ទាំងពីរ អះអាងថា ខាងស្ពុនស័រចង់ឱ្យបម្រាមនៃការបិទទ្វារមិនឱ្យចូលទស្សនា ត្រូវបានបើកសិនចាំបើកសង្វៀនឡើងវិញ ខណៈដែលអ្នករៀបចំក៏បានបង្ហើបថា ការប្រកួតជ្រើសរើសជើងឯករដូវកាលថ្មី ឬប្រកួតមិត្តភាព នឹងមិនអាចដំណើរការទេ ដោយសារតែកីឡាករដែលជាសមាសភាពប្រកួតល្អៗ គឺពិបាករកអ្នកប្រកួតឱ្យទាក់ទាញនោះផង។
លោក ញាណ សុធី អ្នករៀបចំកម្មវិធីប្រដាល់ប្រចាំទូរទស្សន៍អាស៊ីអាគ្នេយ៍ បានថ្លែងថា សង្វៀនប្រដាល់របស់លោកនឹងបន្តបិទទ្វារ មិនដឹងពេលណាទើបអាចដំណើរការវិញនោះទេ ដោយលោកបោះពាក្យថា ទំនងជារហូតដល់ចប់កូវីដ-១៩ ហើយមានការបើកទ្វារឱ្យមហាជនចូលទស្សនាឡើងវិញ ។ លោកថាហេតុផលគឺការរៀបចំកាលពីមួយរយៈពេលមុន គឺនៅតែមិនទាន់ល្អនៅឡើយ ទើបលោកបន្តបិទទ្វារ ។
យ៉ាងណាមិញមានការបង្ហើបថា ហេតុផលសំខាន់គឺដោយសារតែស្ថាប័នទូរទស្សន៍រកស្ពុនស័រដើម្បីរៀបចំមិនទាន់បានប៉ុណ្ណោះ ទើបដំណើរការទៅមិនរួច ។ ការទម្លាយនេះ ស្របពេលដែលសង្វៀនផ្សេងបែរជាមានលទ្ធភាពបង្កើតបន្ថែមនូវការប្រដាល់របស់ខ្លួន បើទោះជាចំហាយកូវីដ-១៩នៅតែវាយលុក ។ នៅសង្វៀនCNC និង CTN ដំណើរការរហូតដល់ទៅ៥សង្វៀន ខណៈដែលសង្វៀនបាយ័ន និង PNN ក៏បង្កើន ហើយមើលទៅរឹងមាំទៀតផង ។
មុននេះ សង្វៀនបាយ័នទើបតែប្រកាសបើកមួយសង្វៀនបន្ថែមទៀត ទើបជាការចាប់អារម្មណ៍ ដែលសង្វៀនអាស៊ីអាគ្នេយ៍ ដែលមុនកូវីដ-១៩មានរហូតដល់៣សង្វៀន និងពេលខ្លះមានដល់៤សង្វៀន ស្រាប់តែបិទស្ងាត់ឈឹងបែបនេះ ។ ឆ្លើយតបនឹងបញ្ហានេះ លោក ញាណ សុធី ថាវាគឺជារឿងមួយផ្នែក ប៉ុន្តែមូលហេតុសំខាន់គឺអាចស្ថានភាពនៃការរៀបចំនៅមិនទាន់ទៅរួចប្រសិនបើនៅរៀបចំពេលនេះ ។
លោកថា សង្វៀនទូរទស្សន៍អាស៊ីអាគ្នេយ៍ល្បីនឹងការប្រកួតអន្តរជាតិ ហើយនៅក្នុងកាលៈទេសៈដែលកីឡាករ បរទេសមិនទាន់អាចមកប្រកួតនៅកម្ពុជាបាន ហាក់ធ្វើឱ្យលោកមិនទាន់ចង់បើកជាថ្មី។ យ៉ាងណាមិញលោកថា កំពុងស្វះស្វែង ដោយអាចបើកមុនកូវីដ-១៩ចប់ទាំងស្រុង ឬអាចបើកវិញឆាប់ៗ។
ងាកទៅមើលស្ថាប័នទូរទស្សន៍ប៉ុស្តិ៍លេខ៥ ឯណោះវិញ លោក សេង កដិកា អ្នករៀបចំកម្មវិធីប្រដាល់ ក៏បានត្រឹមតែអះអាងថា កំពុងរៀបចំ មិនដឹងពេលណាបើកវិញនោះដែរ។
លោកថា ស្ថាប័នរបស់លោកសម្រេចចិត្តបិទចោលការប្រកួត ហើយមិនទាន់បើកវិញ គឺដោយសារតែហេតុផលស្ពុនស័រផ្អាក និងស្វែងរកកីឡាករមកប្រកួតនៅក្នុងប្រភេទទម្ងន់ថ្មីមិនទាន់គ្រប់ ។ លោកថា អ្នកខ្លះទៅស្រុក ហើយអ្នកខ្លះមិនទាន់ចូលក្លិប ធ្វើឱ្យការជ្រើសរើសកីឡាករដើម្បីប្រកួតរដូវកាលថ្មី នៅតែមិនស្រួលដូចមុន ។
លោកថា ការបិទទ្វារជាថ្មីនេះ ពិតជាប៉ះពាល់គ្រប់ផ្នែកដែលពាក់ព័ន្ធនឹងវិស័យប្រដាល់ទាំងអស់ តែលោកថាធ្វើម៉េចបើនេះគឺជាបញ្ហារបស់ពិភពលោក ហើយប៉ុស្តិ៍លេខ៥ក៏មិនចង់បើកប្រកួតក្នុងសភាពស្ងប់ស្ងាត់ផងដែរ ទើបសុខចិត្តសម្ងំសិន ។ លោកថា ការប្រកួតនៅស្ថាប័នរបស់លោក គឺជាការប្រកួតដណ្ដើមជើងឯក ដូច្នេះទើបមិនចង់ឱ្យការប្រកួតនេះ កើតឡើងក្នុងសភាពដែលគ្មានអ្នកទស្សនាដូចរាល់ថ្ងៃនោះទេ ។
លោកថា ការប្រកួតនឹងមិនល្អមើលនោះទេ ខណៈដែលកីឡាករក៏មិនប្រកួតអស់ដៃ ដោយសារតែហេតុផលនេះ ។ លោកទទូចឱ្យកីឡាករដែលរងផលប៉ះពាល់ កុំបោះបង់ការហ្វឹកហាត់ កុំបណ្ដោយឱ្យកម្លាំង និងសមត្ថភាពចុះខ្សោយ ហើយលោកក៏ទទូចឱ្យតែបើកសង្វៀន ម្ចាស់ស្ពុនស័រទាំងអស់បន្តការគាំទ្រនៅក្នុងវិស័យមួយនេះ ជាពិសេសនៅពេលការប្រដាល់ទាំងមូលដំណើរការឡើងវិញ៕
ចែករំលែកព័តមាននេះ